ហេតុការណ៍គ្រោះថ្នាក់ចរាចរណ៍មួយដែលងបង្កឡើងដោយម៉ូតូពីរគ្រឿងជិះឆ្លងផ្លូវមិនប្រយ័ត្នជ្រុលបុកគ្នាពេញទំហឹងបណ្តាលអោយមនុស្សប្រុសស្រី៥នាក់រងរបួសធ្ងន់ស្រាល។ដែលហេតុការណ៍គ្រោះថ្នាក់ខាងលើនេះកើតឡើងនៅចំណុចស្តុបសន្ធរមុខក្នុងសង្កាត់ទឹកល្អក់ទី១ខណ្ឌទួលគោកកាលពី
វេលាម៉ោង១២និង៣០នាទីយប់ឈានចូលថ្ងៃទី១៧ខែធ្នូឆ្នាំ២០១៤។ យោងតាមប្រភពព័ត៌មានពីសាក្សីដែលបានឃើញហេតុការណ៍បានរៀបរាប់អោយដឹងថានៅមុនពេលកើតហេតុគេសង្គេតឃើញយុវជន៣នាក់ជិះម៉ូតូមួយគ្រឿងម៉ាកសង់សេ១២៥ស៊េរីឆ្នាំ២០០៩ពណ៌ខ្មៅពាក់ស្លាកលេខភ្នំពេញ1CJ-4882 ជិះឌុបគ្នាធ្វើដំណើរតាមបណ្តោយផ្លូវកម្ពុជាក្រោមទិសដៅពីលិចទៅ
កើតក្នុងល្បឿនល្មមខណៈមកដល់ចំណុចកើតហេតុយុវជនទាំង៣នាក់បានជិះម៉ូតូឆ្លងផ្លូវកម្ពុជាក្រោមបំណងបត់ស្តាំឡើងមកផ្លូវម៉ៅសេទុងភ្លាមៗនោះស្រាប់តែមានម៉ូតូមួយគ្រឿងទៀតម៉ាកឃ្លីកពណ៌ក្រហមពាក់សា្លកលេខភ្នំពេញ1CR – 7474 ជិះធ្វើដំណើរដោយប្តីប្រពន្ធពីរនាក់តាមបណ្តោយផ្លូវម៉ៅសេទុងទិសដៅពីត្បូងទៅជើងក្នុងល្បឿនធម្មតាខណៈជិះមកដល់ចំណុចស្តុប
ខាងលើក៏បានបត់ឆ្លងឡើងទៅផ្លូវកម្ពុជាក្រោមវិញ ( ដោយភាគីខាងម្ចាស់ម៉ូតូសង់ធ្វើដំណើរពីផ្លូវកម្ពុជាក្រោមឡើងមកផ្លូវម៉ៅសេទុងរីឯម៉ូតូឃ្លីកវិញធ្វើដំណើរពីផ្លូវម៉ៅសេទុងឆ្ពោះទៅកម្ពុជាក្រោម ) ដោយក្នុងទិសដៅបញ្ច្រាសក៏រេចង្កូតជ្រុលបុកគ្នាចំពីមុខពេញទំហឹងបណ្តាលអោយមនុស្សី២នាក់ក្នុងនោះមានស្រីម្នាក់ប្រុសម្នាក់ត្រូវរងរបួសធ្ងន់ធ្ងរបានរថយន្តសាមុយមកដឹកយកទៅសង្គ្រោះភ្លាមៗចំណែកបុរស៣នាក់ទៀតត្រូវរងរបួសស្រាល ( រលាត់ដៃរលាត់ជើងបន្តិចបន្តួច ) ។ចំណែកម៉ូតូរងការខូចខាត។
ក្រោយកើតហេតុសមត្ថកិច្ចមូលដ្ឋានបានសហការជាមួយជំនាញចុះធ្វើការអន្តរាគមន៍វាស់វែងរួចទៅហើយប៉ុន្តែមិនបានយកទៅណានោះទេដោយសារតែមានការសម្របសម្រួលត្រូវគ្នាពីសំណាក់សាច់ញាតិភាគីទាំងសងខាងទើបបញ្ចប់រឿងនៅនឹងកន្លែងកើតហេតុភ្លាមៗតែម្តងទៅដោយភាគីទាំង២បញ្ចប់រឿងទៅដោយគ្មានអ្នកណាសងអ្នកណា ( គឺរួចខ្លួនដូចគ្នា ) ព្រោះពួកគាត់គិតថាមានកំហុសដូចគ្នាទើបមិនចង់អោយមានរឿងវែងឆ្ងាយបន្ត៕
