ភ្នំពេញ៖ បុរស3នាក់ចេញពីផឹកស៊ីនៅផ្ទះមិត្តភ័ក្តិជិះម៉ូតូត្រឡប់ទៅផ្ទះវិញបុករទេះលក់សាច់អាំងខ្ទេច រងរបួសធ្ងន់ម្នាក់ស្រាល2នាក់។ ហេតុការណ៍នេះបានកើតឡើងកាលពីវេលាម៉ោង9យប់ ថ្ងៃទី22 ខែធ្នូ ឆ្នាំ2014 ត្រង់ចំណុចក្បែររោងចក្រអេសអិល តាមបណ្ដោយផ្លូវលេខ371 ស្ថិតក្នុង សង្កាត់ស្ទឹងមានជ័យ ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថា បុរស3នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ 125 ពណ៌ខ្មៅ ពាក់ស្លាកលេខ ភ្នំពេញ 1AX-6965 ទើបចេញពីផឹកស៊ីនៅផ្ទះមិត្តភ័ក្តិ ម្ដុំចាក់អង្រែក្រោម ធ្វើដំណើរតាមបណ្ដោយផ្លូវលេខ371 បំណងទៅផ្ទះវិញនៅម្ដុំសាលាខណ្ឌដង្កោ ក្នុងទិសដៅពីកើតទៅលិច ស្រាប់តែមកដល់ចំណុចកើតហេតុក៏មានរទេះអាំងសាច់មួយកំពុងឆ្លងផ្លូវ ក៏ត្រូវម៉ូតូបុកចំពេញទំហឹងបណ្ដាលអោយបុរសម្នាក់របួសធ្ងន់ត្រង់ជើងនិង2នាក់រងរបួសស្រាល ចំណែកម៉ូតូខ្ទេចមួយកំណាត់មុខហើយរទេះអាំងសាច់ក៏រងការខូចខាតផងដែរ។
បន្ទាប់ពីកើតហេតុភាគីរទេះអាំងសាច់ខ្លាចមានរឿងវែងឆ្ងាយឆ្លៀតឱកាសគេចបាត់ពីកន្លែងកើតហេតុ ហើយសមត្ថកិច្ចមូលដ្ឋានក៏បានមកដល់ត្រួតពិនិត្យមើល ដោយភាគីខាងម៉ូតូមិនដឹងត្រូវដោះស្រាយ យ៉ាងមិចក៏ហៅម៉ូតូរ៉ឺម៉កកង់3ដឹកម៉ូតូយកទៅផ្ទះជួសជុលដោយខ្លួនឯង៕
