ភ្នំពេញៈ យុវជន២នាក់បានរងរបួសធ្ងន់និងស្រាលដោយសារតែពួកគេបានជិះម៉ូតូលឿនចាប់ហ្វ្រាំងមិនទាន់ក៏ជ្រុលទៅបុករថយន្តចំពាក់កណ្តាលពេញទំហឹងបានរងការខូចខាត។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតទ្បើងកាលពីវេលាម៉ោង១០នឹង៥០
នាទីយប់ថ្ងៃទី៧ខែមករាឆ្នាំ២០១៥តាមបណ្តោយផ្លូវលេខ១០៦កែងនឹងផ្លូវលេខ១០៨ស្ថិតក្នុងសង្កាត់វត្តភ្នំខណ្ឌដូនពេញ។ សាក្សីនៅកន្លែងកើតហេតុបានឱ្យដឹងថានៅមុនពេលកើតហេតុគេបានឃើញនារីម្នាក់ជិះរថយន្តវីស្តូពណ៍ ក្រហមមួយគ្រឿងពាក់ស្លាកលេខភ្នំពេញ 2Z-5411 ធ្វើដំណើរតាមបណ្តោយផ្លូវលេខ១០៦ក្នុងទិសដៅពីកើតទៅលិចខណះ
មកដល់ចំណុចផ្លូវបំបែកជា៤កែងនឹងផ្លូវលេខ១០៨ស្រាប់តែមានយុវជន២នាក់បានជិះម៉ូតូធូដេជិះឌុបគ្នាតាមបណ្តោយផ្លូវលេខ១០៨ទិសដៅពីត្បូងទៅជើងក្នុងល្បឿនយ៉ាងលឿនចាប់ហ្វ្រាំងមិនទាន់ក៏ជ្រុលទៅបុកចំពាក់កណ្តាលរថយន្តពេញទំហឹងបណ្តាលឱ្យអ្នកឌុបផ្លោងទៅបោកក្បាលជាមួយនឹងកញ្ចក់រថយន្តរងរបួសធ្ងន់ចំណែកម្នាក់ទៀតរងរបួសស្រាល។ ក្រោយពេលកើតហេតុភាគីទាំងសងខាងបានធ្វើការសម្របសម្រួលគ្នាដោយភាគីខាងរថយន្តមិនចង់វែងឆ្ងាយច្រើនក៏ចេញថ្លៃព្យាបាលឱ្យទៅខាងភាគីម៉ូតូដើម្បីបញ្ចប់រឿងព្រោះមិនចង់រំខានដល់សមត្ថកិច្ច៕
