ភ្នំពេញ=បុរសម្នាក់ដោយសារស្រវឹងជោកជាំបានបើករថយន្តទៅមុខលែងរួច ក៏ឈប់សម្រាកលង់លក់នៅកន្លែងលក់មីឆា ដោយទុករថយន្តរបស់ខ្លួនចោលនៅកណ្តាលផ្លូវ ។ ហេតុការណ៍នេះកើតឡើងកាលពីវេលាម៉ោង១០និង២០នាទីយប់ថ្ងៃទី០៨ខែមករាឆ្នាំ២០១៥ នៅជិតការ៉ាអូខេ នគរសំរិទ្ធ តាមបណ្តោយផ្លូវលេខ១៨ ២ស្ថិតក្នុងសង្កាត់ទឹកល្អក់២ ខណ្ឌទួលគោក ។
ប្រភពព័ត៌មានពីអ្នករត់ម៉ូតូនៅជិតកន្លែងនិងអ្នកលក់មីឆាបានឱ្យដឹងថា បុរសម្នាក់ខាងលើនេះបានបើករថយន្តកាមរី ឆ្លាមមួយគ្រឿង ពណ៌ ខ្មៅ ពាក់ស្លាក់លេខ ភ្នំពេញ 2F-0076 ដោយមើលទៅក្នុងស្ថានភាពស្រវឹងជោកជាំ លុះពេលមកដល់ចំណុចខាងលើស្រាប់បុរសនោះឈប់រថយន្ត ក៏ដើររេពេញផ្លូវ មកកន្លែងលក់មីឆា អង្គុយលើកៅអីហើយថែមទាំងប្រាប់គេអោយដាក់មីឆាអោយខ្លួន មួយចានទៀត តែមិនទាន់បានញុំមីឆាផងនោះ បុរសនេះក៏ដេកលង់លក់ស្កប់ស្កល់ តែម្តង សូម្បីតែអ្នកលក់មីឆា នាំគ្នាទៅចាប់អង្រួនដាស់ក៏មិន ព្រមភ្ញាក់ដែរ ។
ដោយឃើញបែបនេះអ្នកលក់មីឆា បានរាយការណ៍ទៅសមត្ថកិច្ចអោយចុះជួយព្រោះតែបុរសម្នាក់នេះគាត់បានចត់រថយន្តនៅកណ្តាលផ្លូវ ហើយដេកធ្វើមិន ដឹង ដូចគ្មានជំពាក់អ្នកណាសោះ ។ ភ្លាមៗសមត្ថកិច្ចក៏មកដល់កន្លែងកើតហេតុក៏បានដើរទៅដាស់បុរសនេះជាងកន្លះម៉ោង ក៏នៅតែមិនព្រមភ្ញាក់ ទៀត ។ ទោះយ៉ាងណាបុរសដែរដេក លង់លក់ស្កប់ស្កល់នេះបានក៏ដឹងខ្លួនវិញប្រហែលជាពីរម៉ោងក្រោយ ក៏ក្រោកឡើងវិញក៏បុរសរូបនេះបានឡើងបើករថយន្ត ខ្លួនចេញចាក់ចេញទៅវិញតែម្តង ៕
