ភ្នំពេញ៖ជនសង្ស័យម្នាក់ ត្រូវបាននគរបាលខណ្ឌដង្កោឃាត់ខ្លួនសួរនាំករណីបង្កអំពើ ហឹង្សាទៅលើស្ត្រីម្នាក់ បណ្តាលឲ្យមានរបួសក្បាល ស្រាប់តែធ្លាយចេញ១រឿងផ្សេងទៀត គឺករណីលួចទូរស័ព្ទដៃចំនួន ០២គ្រឿង
ជនសង្ស័យឈ្មោះ រិទ្ធ សុខកែវ ហៅ ទិត្យ សុគា ភេទប្រុស អាយុ២៨ឆ្នាំ មុខរបរមិនពិត ប្រាកដ មានទីលំនៅភូមិទួលសំបូរ សង្កាត់ព្រៃវែង ខណ្ឌដង្កោ។ ចំណែកជនរងគ្រោះឈ្មោះ សន ស្រីពៅ ភេទស្រី អាយុ៣៣ឆ្នាំ មុខរបររើសអេតចាយ រស់នៅភូមិទួលសំបូរ សង្កាត់ព្រៃវែង ខណ្ឌដង្កោ ។
សមត្ថកិច្ចប្រាប់ឲ្យដឹងថា កាលពីថ្ងៃទី៧ ខែមករា ឆ្នាំ២០១៥ វេលាម៉ោង ២១និង៤០នាទី ជនសង្ស័យឈ្មោះ រិទ្ធ សុខកែវ ហៅ ទិត្យ សុគា បានដើរមកផ្ទះជនរងគ្រោះ ដើម្បីសួរ រកស៊ីមទូរស័ព្ទដែលឈ្មោះ ចាន់ សុផល ត្រូវជាប្តីជនរងគ្រោះបានខ្ចីពីជនសង្ស័យ ។ ពេលនោះជនរងគ្រោះបានឆ្លើយប្រាប់ជនសង្ស័យថា ប្តីរបស់គាត់ឈ្មោះ ចាន់ សុផល មិននៅផ្ទះទេ តែជនសង្ស័យមិនព្រមស្តាប់សំដីជនរងគ្រោះនោះទេ នៅតែទារកស៊ីទូរស័ព្ទពីប្តីរបស់ជនរងគ្រោះដដែលៗ ។
សមត្ថកិច្ចប្រាប់បន្តថា ដោយឮបែបនេះជនរងគ្រោះក៏បាននិយាយទៅកាន់ជនរងសង្ស័យម្តងទៀតថា ចាំថ្ងៃស្អែករូបគាត់សន្យាទិញស៊ីមទូរស័ព្ទថ្មីសងវិញ គ្រាន់តែប៉ុណ្នឹងធ្វើឲ្យជនសង្ស័យខឹង ក៏ដោះខ្សែក្រវ៉ាត់ពីចង្កេះវាយទៅលើជនរងគ្រោះ បណ្តាលឲ្យបែកចិញ្ចើមខាងឆ្វេងហូរឈាមពេញផ្ទៃមុខ មិនតែប៉ុណ្ណោះជនសង្ស័យបានស្ទុះទៅវាយកញ្ចក់តុដាក់ទូរទស្សន៍បណ្តាលឲ្យបែក និងផ្តាច់ខ្សែមុងរបស់ជនរងគ្រោះចោលទៀត។ គ្រាហ៍នោះដែរជនរងគ្រោះ បានស្រែកហៅរកសាចញាតិជិតខាងឲ្យមកជួយ ពេលនោះប្អូនថ្លៃជនរងគ្រោះក៏បានរត់ចេញពីផ្ទះនៅក្បែរនោះ ដើម្បីមកជួយ ស្រាប់តែជនសង្ស័យបានឃើញដូច្នេះក៏ស្រវ៉ារត់គេចខ្លូនបាត់ស្រមោល។ លុះព្រឹកឡើងថ្ងៃទី៨ ខែមករា ឆ្នាំ២០១៥ ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រៃវែង រហូតវេលាម៉ោង ១៥និង៣០នាទី ថ្ងៃដដែល ទើបតាមស្រាវ ជ្រាវឃាត់ខ្លួនជនសង្ស័យបាន នៅចំណុចភូមិទួលសំបូរ សង្កាត់ព្រៃវែង ខណ្ឌដង្កោ រាជធានី ភ្នំពេញ។
សមត្ថកិច្ចប្រាប់បញ្ជាក់ឲ្យដឹងថា ក្រោយពីសួរនាំនៅប៉ុស្តិ៍រដ្ឋបាលព្រៃវែងទៅលើ ជនសង្ស័យខាងលើ ក៏ធ្លាយ១រឿងផ្សេងទៀត គឺករណីលួចទូរស័ព្ទដៃចំនួន ០២គ្រឿង ក្នុងនោះ១គ្រឿង ម៉ាក ខេមហ្វូន និង១គ្រឿងទៀត ម៉ាក សាំស៊ុង របស់ជនរងគ្រោះ ឈ្មោះ សាយ សុខលី ភេទប្រុស អាយុ៥៣ឆ្នាំ មុខរបរលក់បន្លែ ទីលំនៅភូមិទួលសំបូរ សង្កាត់ព្រៃវែង ខណ្ឌដង្កោ ហើយជនរងគ្រោះក៏បានដាក់ពាក្យបណ្តឹងប្តឹងជនសង្ស័យផងដែរ ។
សមត្ថកិច្ចបញ្ជាក់បន្តថា ជនសង្ស័យក្រោយពីធ្វើការសាកសួរជំហ៊ានដំបូងនៅប៉ុស្តិ៍រដ្ឋ បាលព្រៃវែង បានបញ្ជូនបន្តទៅកាន់អធិការដ្ឋាននគរបាលខណ្ឌដង្កោ ដើម្បីចាត់ការបន្តទៀត៕
