ភ្នំពេញ ៖ បុរសម្នាក់ជិះម៉ូតូបោះពួយលឿនដូចហោះគេចម៉ូតូមួយគ្រឿងផុតជ្រុលទៅបុកពីក្រោយម៉ូតូមួយគ្រឿងទៀតជិះដោយបុរសនារី២នាក់ដួលអូសជាង៣០ម៉ែត្របណ្ដាលអោយរងរបួសធ្ងន់។ ហេតុការណ៍នេះបានកើតឡើងកាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី១២ខែមករាឆ្នាំ២០១៥ ត្រង់ចំណុចខាងត្បូងក្រសួងមហាផ្ទៃ មុខធនាគារសិនហានខ្មែរ តាមបណ្ដោយផ្លូវព្រះនរោត្ដម ស្ថិតក្នុងសង្កាត់ទន្លេបាសាក់ ខណ្ឌចំការមន។
ប្រភពព័ត៌មានពីកន្លែងកើតហេតុបានអោយដឹងថា មានម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កំពង់ចាម 1J-3524 ជិះដោយបុរសម្នាក់ធ្វើដំណើរតាមបណ្ដោយផ្លូវព្រះនរោត្ដម ទិសដៅពីជើងទៅត្បូងក្នុងល្បឿនយ៉ាងលឿន ស្រាប់តែមកដល់ចំណុចកើតហេតុម៉ូតូបង្កបំរុងបុកប៉ះម៉ូតូមួយគ្រឿងជិះនៅពីមុខក្នុងទិសដៅស្របគ្នា តែម្ចាស់ម៉ូតូដឹងក៏គេចផុត ស្រាប់តែទៅបុកមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ព្រះសីហនុ 1C-0907 ជិះដោយបុរសនារី២នាក់កំពុងជិះនៅពីមុខដួលអូសជាង៣០ម៉ែត្របណ្ដាលអោយរងរបួសធ្ងន់ទាំង៣នាក់។
បើតាមសម្ដីបុរសដែលជិះម៉ូតូគេចផុតហើយមិនរងគ្រោះថ្នាក់បានប្រាប់ទាំងហួសចិត្តថា ផ្លូវជិះធ្វើដំណើរស្ងាត់មានតែម៉ូតូ៣គ្រឿងជិះធ្វើដំណើរ ក៏ជិះម៉ូតូមកបុកត្រូវ ពិតជាហួសចិត្តមែន។
បន្ទាប់ពីកើតហេតុសមត្ថកិច្ចក៏បានចុះមកអន្តរាគមន៍ ហៅរថយន្តសាមុយដឹងបញ្ជូនជនរងគ្រោះទៅមន្ទីរពេទ្យភ្លាមៗ ចំណែកម៉ូតូសមត្ថកិច្ចជំនាញក៏បានវាស់វែងយកទៅរក្សាទុកនៅអធិការដ្ឋាននគរបាលខណ្ឌចំការមនដើម្បីធ្វើការដោះស្រាយតាមផ្លូវច្បាប់៕
