បុរសជនជាតិវៀតណាមម្នាក់ ត្រូវបានសមត្ថកិច្ចចំរុះចាប់ខ្លួន បញ្ជូនទៅតុលាការ កាលពីថ្ងៃទី១១ ខែមករា ឆ្នាំ២០១៥ ដោយជននោះបានបើកទូក បំបុកទូកអភិបាលរងស្រុកអោយក្រឡាប់ ខណៈពេលអភិបាលរងស្រុកដឹកនាំកម្លាំងចំរុះ ចុះទៅបង្ក្រាបក្រុមជនជាតិវៀតណាម ដែលចូលមកលួចឆក់ត្រី ។ 
ហេតុការណ៍ខាងលើ បានកើតឡើងនៅចំណុចបឹងព្រែកល្ពៅ ស្ថិតក្នុងភូមិកែវកាំភ្លើង ឃុំព្រៃខ្លា ស្រុកកោះអណ្ដែត ខេត្តតាកែវ កាលពីថ្ងៃទី១០ ខែមករា ឆ្នាំ២០១៥ វេលាម៉ោង១៥និង៣០នាទី ។
ក្រោយពេលឃាត់ខ្លួនជនសង្ស័យ មានក្រុមឆក់ត្រីជាង១០ទូក បើកចូលមកក្នុងគោលបំណង វាយរំដោះជនសង្ស័យ តែត្រូវបានលោកឧត្តមសេនីយត្រី អ៊ុក សំណាង ស្នងការនគរបាលខេត្ត បញ្ជូនកម្លាំងនគរបាលទៅការពារទាន់ពេលវេលា ។ ការចុះបង្ក្រាបក្រុមឆក់ត្រីខាងលើនេះ បានធ្វើអោយប្រជាពលរដ្ឋ នៅតំបន់នោះមានចិត្តសប្បាយរីករាយជាខ្លាំង ព្រោះកន្លងមក គេឃើញក្រុមឆក់ត្រីដែលជាជនជាតិវៀតណាម ចូលមកឆក់ត្រីយ៉ាងគគ្រឹកគគ្រេង ដោយគ្មានការបង្ក្រាបឡើយ ។ 
លោក ឃី វណ្ណា អធិការស្រុកកោះអណ្ដែត បានអោយដឹងថា ពេលក្រុមចំរុះចុះបង្ក្រាប គេប្រទះឃើញទូកឆក់ត្រីចំនូន២គ្រឿង កំពុងធ្វើសកម្មភាព ភ្លាមនោះទូកមួយគ្រឿង បានបើករត់គេច ប៉ុន្តែទូកមួយគ្រឿងទៀត មិនបើករត់គេចទេ តែបែជាបើកមកបំបុកទូករបស់អភិបាលរងស្រុក យ៉ាងពេញទំហឹង បណ្ដាលអោយបែកទូកលិចទឹក ទាំង២គ្រឿង ទើបសមត្ថកិច្ចចាប់ខ្លួនជនសង្ស័យបានម្នាក់ ជនសង្ស័យនោះឈ្មោះ ជិន វ៉ាងស៊ីង ហៅ ទី ភេទប្រុស អាយុ៣៨ឆ្នាំ ជាជនជាតិវៀតណាម រស់នៅភូមិយិនដុង ឃុំយិនដុង ស្រុកទិនបៀង ខេត្តអាងយ៉ាង ។
ពេលឃាត់ខ្លួនជនសង្ស័យ សមត្ថកិច្ចដកហូតបានទូកជ័រ ប្រវែង៥ម ១គ្រឿង ម៉ាស៊ីនម៉ាក ហ៊ីណូតា១៣សេះ ១គ្រឿង ដងឆក់មានកន្ត្រងចំនួន១ អាំងវិចទ័រធំ១គ្រឿង អាគុយ១២០វ៉ុល១គ្រឿង ឌីណាម៉ូ អ៊ុកសីសែន១គ្រឿង និងដាវសាម៉ូរៃ ស្រោមបំពង់ទីប១ ៕
