សៀមរាប ៖ តាមសេចក្ដីរាយការណ៍ បានអោយដឹងថា អ្នកកាសែត១ រូបត្រូវក្រុមឈ្មួញរកស៊ីដឹកឈើប្រើអំពើហិង្សា ដេញវាយចំងាយ២គីទ្បូម៉ែត្រ ចាប់ពីកន្លែងបន្ទាយទ័ពអាកាសអតីតបន្ទាយកងពលតូច អន្តរាគមន៍លេខ៥ រហូតដល់ប៉ុស្ដិ៍នគរបាលរដ្ឋបាលស្រែណូយ បំរុងប៉ុនប៉ងមនុស្សឃាតនៅចំពោះមុខនគរបាល ដោយមិនខ្លាចញញើតផ្លូវច្បាប់អ្វីទ្បើយកាលពីវេលាម៉ោង២និង២៥នាទីរសៀលថ្ងៃទី ១៤ មករា ២០១៥នេះ។
ប្រភព័ត៌មានពីប្រជាពលរដ្ឋបានអោយដឹងថា ក្រុមឈ្មួញដុះស្លែរកស៊ីដឹកឈើខុសច្បាប់ខាងលើជាទាហាននៃអគ្គបញ្ជាការទ័ពអាកាស ដែលមានមូលដ្ឋានឈរជើងក្នុងបន្ទាយទាហានកងពលតូចអន្តរាគមន៍លេខ៥ ។ហេតុការណ៍ខាងលើឃើញបក្ខពួកជនល្មើសជាង១០នាក់ក្នុងឯកសណ្ឋានជាទាហាន បានចេញមកពីក្នុងបន្ទាយព្រួតគ្នាដេញវាយអ្នកកាសែតម្នាក់យ៉ាងឃោរឃៅប៉ុន្តែជនរងគ្រោះបានខំរត់គេចទៅរកនគរបាលប៉ុស្តិ៍ស្រែណូយ អោយជួយអន្តរាគមន៍។
ប្រជាពលរដ្ឋបញ្ជាក់ថា ការដេញវាយធ្វើទារុណកម្មលើជនរងគ្រោះនេះដោយសារឈ្មួញឈើខឹងសម្បារអ្នកកាសែតជាជនរងគ្រោះតាមប្រមាញ់ថតរូបភាពពីសកម្មភាពរថយន្ដពណ៌ត្រេអ៊ី ដឹកបទល្មើសឈើប្រណីតខុសច្បាប់ចេញពីស្រែណូយ យកទៅលក់ក្នុងក្រុងសៀមរាប ដែលចរាចរតាមដងផ្លូវជាតិលេខ៦៧។ឈ្មួញឈើទុច្ចរិតខាងលើឈ្មោះ រ័ត្ន មុខរបរធ្វើទាហានពាក់សក្ដិ៣ ដែលមានមេកើយនៅពីក្រោយខ្នងឈ្មោះ វ៉ាន់ ។
ជនរងគ្រោះជាអ្នកកាសែត ក្នុងអង្គភាពមួយប្រចាំខេត្តសៀមរាប សូមមិនបញ្ចេញឈ្មោះ បានរៀបរាប់អោយដឹងថា គាត់មានការភិតភ័យយ៉ាងខ្លាំងនៅពេលបក្ខពួកឈ្មួញឈើឈ្មោះ រ័ត្ន បានហៅបក្ខពួកចេញពីបន្ទាយទ័ពអាកាសមកព្រួតវាយដំរូបគាត់តែម្នាក់ឯង ខណះគាត់តាមថតរូបភាពរថយន្ដដឹកឈើខុសច្បាប់១គ្រឿងមកដល់មុខបន្ទាយ។គាត់ បានរត់គេចខ្លួនរហូតដល់មុខប៉ុស្ដិ៍នគរបាលស្រែណូយ ដើម្បីអោយសមត្ថកិច្ចជួយអន្តរាគមន៍ប៉ុន្ដែឈ្មួញឈើជាជនល្មើសបានតាមក្របួចករកវាយដំបន្ថែមទៀតដោយមិនខ្លាចញញើតច្បាប់អ្វីទ្បើយ។
ជនរងគ្រោះនិយាយថា ដើម្បីសុវត្ថិភាពផ្ទាល់ខ្លួនគាត់មិនបានដាក់ពាក្យបណ្ដឹងជនល្មើសជាឈ្មួញឈើនោះទេដោយមានឈ្មោះ វ៉ាន់ ជាមេ កើយអង្គភាពបានទៅដល់ប៉ុស្ដិ៍នគរបាលដើម្បីដោះស្រាយសម្រួលបញ្ចប់រឿងត្រឹមនគរបាលមូលដ្ឋាន។
លោក ណុប សារ៉ាក់ អធិការនគរបាលស្រុកវ៉ារិនបានអោយដឹងថា ពិតជាមានករណីឈ្មួញឈើជាទាហានបង្កហិង្សាដេញវាយអ្នកកាសែតម្នាក់ប្រាកដមែនប៉ុន្ដែបានសម្រួលគ្នាចប់ហើយនៅថ្ងៃនេះ។ខាងទាហានជាឈ្មួញឈើបានធ្វើកិច្ចសន្យានៅចំពោះមុខសមត្ថកិច្ចនគរបាលថាទៅខាងមុខគាត់ឈប់ប្រព្រឹត្តហិង្សាវាយដំលើជនរងគ្រោះទៀតហើយ៕ ដោយ ខេង ឧត្តម
