ស្ទឹងត្រែង៖រដ្ឋមន្ត្រីក្រសួងរ៉ែនិងថាមពលដាក់បទបញ្ជាឲ្យគណៈកម្មការថ្នាក់ខេត្ត និងក្រុមហ៊ុន វ៉ារីអគ្គីសនីសេសានក្រោម២រៀបចំលំនៅដ្ឋានថ្មី ឲ្យចេញជាលទ្ធផលជាក់ស្តែងជូនប្រជាពលរដ្ឋ ដែលរងផលប៉ះពាល់ពីទំនប់ដើម្បីបង្កើនជំនឿឲ្យពួកគាត់ចូលរួមគាំទ្រទៅលើ
គម្រោងសាងសង់ ទំនប់វ៉ារីអគ្គីសនីនៅខេត្តស្ទឹងត្រែងនេះ ក្នុងពេលដែលនៅមានប្រជាពលរដ្ឋ ជិត៣០០គ្រួសារទៀត មិនទាន់ចូលរួម ហើយទាមទារ សំណងជាក់ស្តែង។
ក្នុងកិច្ចប្រជុំពិនិត្យលទ្ធផលការដោះស្រាយផលប៉ះពាល់ពីទំនប់វ៉ារីអគ្គីសនីសេសានក្រោម២ជូនប្រជាពលរដ្ឋ នៅសាលាខេត្តស្ទឹងត្រែងថ្ងៃទី៦មករា ឆ្នាំ២០១៥ លោក ស៊ុយ សែម រដ្ឋមន្ត្រីក្រសួងរ៉ែ និងថាមពលមានប្រសាសន៍ ជំរុញឲ្យគណៈកម្មការថ្នាក់ខេត្ត និងក្រុមហ៊ុនត្រូវពន្លឿនការសាងសង់ គ្រប់ហេដ្ឋារចនាសម្ពន្ធ័នៅក្នុងភូមិអភិវឌ្ឍន៍ថ្មីតាមគោលនយោបាយ ឲ្យបានឆាប់ដើម្បីឲ្យប្រជាពលរដ្ឋ ចេញពីភូមិចាស់ បានទៅរស់នៅកន្លែងថ្មី ទៅតាមការសន្យា។
លោករដ្ឋមន្ត្រីមានប្រសាសន៍ទៀតថា៖ទន្ទឹមនិងសកម្មភាពសាងសង់អាជ្ញាធរពាក់ព័ន្ធ នៅតាមមូលដ្ឋានក៍ត្រូវព្យាយាមពន្យល់ប្រជាពលរដ្ឋមួយចំនួន ដែលនៅរារែកមិនទាន់សំរេចចិត្ត គាំទ្រមកលើគម្រោងអភិវឌ្ឍន៍វិស័យអគ្គីសនីរបស់យើងនេះ ឲ្យគាត់យល់និងចូលរួមដើម្បី ប្រយោជន៏ជាតិយើង ទាំងមូលត្រឡប់ទៅផ្ទះវិញលោកមេភូមិលោកមេឃុំជួយពន្យល់ ណែនាំឲ្យប្រជាពលរដ្ឋយើង គាត់ចូលរួមក្នុងការអភិវឌ្ឍន៏គម្រោងនេះហើយជាផលប្រយោជន៏ របស់យើងគម្រោងនេះមានសារសំខាន់ណាស់ ព្រោះទិសដៅរបស់យើងពីមួយថ្ងៃទៅមួយថ្ងៃ ភ្លើងយើងត្រូវបញ្ចុះថ្លៃហើយគម្រោងនេះ ជាគម្រោងសំខាន់សំរាប់បំពេញ ឲ្យការប្រើប្រាស់វ៉ារីអគ្គីសនីទូទាំងប្រទេសក្នុងឆ្នាំ ២០២០ បើគម្រោងនេះអត់ដើរ អត់ចេញក្នុងឆ្នាំ ២០១៨ និងមិនមានវ៉ារីអគ្គីសនីគ្រប់គ្រាន់ ដើម្បីង្នឹងបំរើប្រជាពលរដ្ឋទូទាំងប្រទេសទេ នេះជាផែនការរបស់យើង ហើយយើងធ្វើម៉េចឲ្យទំនប់វ៉ារីអគ្គីសនីសេសានក្រោម២នេះ ឲ្យទៅជាវ៉ារអគ្គីសនីទំនប់មួយគំរូ ក្នុងការដោះស្រាយគោលនយោបាយ សំរាប់ ជូនប្រជាពលរដ្ឋ ។
លោក សៀក មេគុង មេឃុំស្រែគរ បានទទួលស្គាល់ថាៈ គណៈកម្មការថ្នាក់ខេត្តរួមនឹងក្រុមហ៊ុន បានចុះដោះស្រាយផលប៉ះពាល់ ជូនប្រជាពលរដ្ឋបានល្អប្រសើរ ហើយក្នុងមួយរយៈកន្លងមកនេះ តែប្រជាពលរដ្ឋជិត៣០០គ្រួសារទៀតនោះ គាត់ពុំទាន់បានយល់ព្រមទៅលើការដោះស្រាយសំណងនេះ ដែលពួកគាត់ទាមទារសំណងប្រាស់ចាក ទៅនិងគោលនយោបាយរបស់រាជរដ្ឋាភិបាល ដែលបានកំណត់។
លោកអះអាងថា៖ ក្រោយពីពេលនេះទៅលោកហ្នឹងរួមគ្នា ជាមួយក្រុមប្រឹក្សាឃុំ ពន្យល់បងប្អូនប្រជាពលរដ្ឋទាំងនោះបន្ថែមទៀត ដើម្បីចូលរួមគាំទ្រដល់ គម្រោងសាងសង់ទំនប់វ៉ារីអគ្គីសនីនេះ ខ្ញុំហ្នឹងប្រជុំក្រុមប្រឹក្សាខ្ញុំនិង ឲ្យមេភូមិដើរប្រាប់ប្រជាពលរដ្ឋ ដើម្បីមកប្រជុំផ្សព្វផ្សាយអំពីបញ្ហាហ្នឹង ដើម្បី ឲ្យគាត់យល់ស៊ីជំរៅ មួយកំរិតថែមទៀតដូចខ្ញុំនិយាយពីមុនហ្នឹងហើយ ក្នុងនាមខ្ញុំក៏រងគ្រោះមួយរូបដែរ ខ្ញុំក្រុមប្រឹក្សាឃុំក៏រងគ្រោះទាំងអស់ ក៏យើងពេលនេះ យើងត្រូវការជាតិទាំងអស់គ្នា នេះខ្ញុំសូមសំណូមពរដល់ប្រជាពលរដ្ឋក្នុង ឃុំស្រែគរ ក៏ដូចជាឃុំក្បាលរមាស បើសិនជាដឹងលឺតាមហង្សមាស ក៏សូមឲ្យ ពិចារណាទាំងអស់គ្នា ពីព្រោះប្រទេសជាតិទាំងមូល គឺរាជរដ្ឋាភិបាលមិនមែនគាត់ឲ្យយើងស្លាប់ដោយឯកឯងទេ ហើយក៏គាត់គិតគូរដល់យើងដែលរងគ្រោះទាំង៦ភូមិ ស្មើនឹង ២ឃុំហ្នឹង ។
សូមបញ្ជាក់ថាការដោះស្រាយសំណងជូនប្រជាពលរដ្ឋទាំងជាង៨៧០គ្រួសារដែលរង ផលប៉ះពាល់ពីការសាងសង់ទំនប់នេះ ក្រុមការងារថ្នាក់ខេត្ត និងក្រុមហ៊ុនបានកំណត់ ទីតាំងធ្វើការអភិវឌ្ឍន៍ភូមិ រួចស្រេចបាច់ហើយ បច្ចុប្បន្នកំពុងធ្វើការឈួសឆាយផ្លូវចូល ដីសំរាប់សាងសង់ផ្ទះ និងដីធ្វើកសិកម្មដើម្បីត្រៀមលក្ខណៈឲ្យប្រជាពលរដ្ឋធ្វើការចាប់ឆ្នោត ជ្រើសរើសមូលដ្ឋានរបស់ខ្លួន និងបានចូលទៅដាំដំណាំនៅមុនពេលទៅរស់នៅជាអចិន្ត្រៃយ៍ ៕
