ខេត្តកំពង់ធំៈ ទឹកដីឃុំមានរិទ្ធ ក្នុងស្រុកសណ្តាន់ទទួលបានការអភិវឌ្ឍន៍ និងបានបោះជំហ៊ានសេដ្ឋកិច្ចដ៏សំខាន់ នៅក្នុងខេត្តកំពង់ធំ ធ្វើឲ្យតំបន់នេះមានភាពអធឹកអធ័ម ក្រោមឥទ្ធិពលនៃដំណាំកសិកម្ម និងឧស្សាហកម្ម ធ្វើឲ្យតំបន់ដែលធ្លាប់តែស្ងាត់ជ្រងំ ក្លាយជាតំបន់សសៃរឈាម
សេដ្ឋកិច្ចសំខាន់ នៅក្នុងខេត្តកំពង់ធំ ។
ជាស្តែងនៅព្រឹកថ្ងៃទី ១ ខែ មិនា ឆ្នាំ ២០១៥ មានការសម្ពោធន៍ដាក់ឲ្យប្រើប្រាស់ផ្សារសែនមានរិទ្ធ ក្រោម អអិបតីភាព ឯកឧត្តម គង់ វិមាន អភិបាលរងខេត្តកំពង់ធំ និងលោកជំទាវ ម៉ែន នារីវុឌ្ឍី និងប្រតិភូអមដំណើរ និងមន្ត្រីរាជការ ប្រជាពលរដ្ឋនិងសិស្សានុសិស្សចូលរួមជាច្រើនកុះករ
លោក សុខ ភ័ក្ក ជាប្រជាពលរដ្ឋ រស់នៅក្នុងឃុំមានរិទ្ធ បានសម្តែងនូវការសប្បាយរីករាយ នៅពេលពួកគាត់បានឃើញមានផ្សារនៅជិតផ្ទះរបស់គាត់ ដោយសារតែកន្លងមកនេះមុននឹងទៅផ្សារម្តងៗ គាត់ ត្រូវបានចំណាយពេល ធ្វើដំណើរយ៉ាងតិច៣ម៉ោងទាំងទៅទាំងមក ជួនពេលរដូវភ្លៀងផ្លូវរអិលបង្ករភាពយឺតយ៉ាវ តែពេលនេះបានឃើញភាពរីកចំរើន និងសូមអគុណលោក ជំទាវ ប្រាក់ គឹមហេង ដែលបានបង្កើតផ្សារ ជូនប្រជាពលរដ្ឋនៅដាច់ស្រយាល និងឯកឧត្តម អ៊ុត សំអន អភិបាលនៃគណៈអភិបាលខេត្តកំពង់ធំ ដែលបានគិតគូរពីទុក្ខលំបាក់របស់ប្រជាពលរដ្ឋ ។
លោក ជំទាវ ប្រាក់ គឹមហេង ទីប្រឹក្សាឯកឧត្តម ងួន ញ៉ិល អនុប្រធានទី២រដ្ឋសភា និងជាអ្នកវិនិយោគទុនផ្សារបានមានប្រសាសន៍ថា ការសាងសង់ផ្សារសែនមានរិទ្ធ គឺស្របជាមួយឈ្មោះឃុំមានរិទ្ធ ក្នុងគោលបំណងចង់ជួយរំលែកនូវទុក្ខលំបាក ដល់ប្រជាពលរដ្ឋ និងជាការបង្ហាញឲ្យឃើញនូវការភិវឌ្ឍន៍គ្របដណ្តប់មិនថាទីក្រុងឬជនបទ ដែលកំពុងតែ មានសន្ទុះក្នុងការរីកចំរើន មិនតែប៉ុណ្ណោះផ្សារសែនមានរិទ្ធនេះ ត្រូវបានលើកលែងការបង់ថ្លៃឈ្នួលនិងសេវាកម្ម រយះពេលពេញមួយឆ្នាំសម្រាប់អាជីវករដែលានបមកលក់ក្នុងផ្សារនេះ ។
ឯកឧត្តម គង់ វិមាន អភិបាលរងខេត្តកំពង់ធំ បានមានប្រសាសន៍ថា ទឹកដីស្រុកសណ្តាន់ ស្ថិតនៅឃុំមានរិទ្ធ និងឃុំទំរីង គឺជាបេះដូងសេដ្ឋកិច្ចក្នុងខេត្តកំពង់ធំ ដែលត្រូវបានក្រុមហ៊ុនចំការកៅស៊ូ និងកៅស៊ូឯកជនរាប់ម៉ឺនហិចតាព្រមទាំងដំណាំកសិកម្ម ស្រូវ ស្វាយចន្ទី ដំឡូងមី សណ្តែករាប់ពាន់ហិចតាទៀតផង ម្យ៉ាងទៀត តំបន់នេះប្រៀបបានដូចជាកន្លែងប្រមូលផ្តុំពីតាមបណ្តាខេត្តនានា មកធ្វើជាកម្មករចំការកៅស៊ូ ដូច្នេះខេត្តកំពង់ធំ បានសិក្សាគម្រោងការអភិវឌ្ឍន៍ ផ្លូវថ្នល់ សាលារៀន មន្ទីរពេទ្យ ជូនដល់ប្រជាពលរដ្ឋនៅទីនេះ។
ក្នុងឳកាសនេះផងដែរ ឯកឧត្តម គង់ វិមាន បានព្រមានដល់សមត្ថកិច្ច អង្គការ អ្នកសារពត៌មាន មួយចំនួន ដែលកំពុងតែប្រព្រឹត្តខុស វិជ្ជាជីវៈ ខុសពីវិន័យ ដែលបានដាក់កុងត្រូលជជុះគំរាម ជំរិតទារលុយ ពីប្រជាពលរដ្ឋ ដែលនាំអោយដល់អង្គភាពឬ បុគ្គលដែលគេធ្វើល្អខូចឈ្មោះតាមដែរ ចំណែកប្រជាពលរដ្ឋ ក៏សូមអនុវត្តន៍ ច្បាប់កុំកាប់ កុំអាឈើ រុករាន្ទដុតព្រៃឈើវាតយកដីដោយខុសច្បាប់ និងត្រូវមានលិខិតដឹកជញ្ជូនត្រឹមត្រូវ ។ ប៊ុនរិទ្ធី
