ខេត្តព្រះវិហារ
ប្រជាកសិករមួយចំនួនក្នុងចំណោមប្រជាកសិករទាំងអស់នៅទូទាំងខេត្តព្រះវិហារជាពិសេសគ្រួសារកងទ័ពនិងកសិករនៅតំបន់ព្រំដែនប្រាសាទព្រះវិហារបាននាំគ្នាទិញពូជដំទ្បូងមីរួចរាល់ហើយដើម្បីត្រៀមដាំដុះនៅពេលរដូវវស្សារដែលជិតឈានចូលមកដល់ឆាប់ៗនេះ។
ប្រជាកសិករប្រមាណ៩០ភាគរយនៅទូទាំងខេត្តព្រះវិហារបានពឹងផ្អែកទាំងស្រុងលើវិស័យកសិកម្មដំណាំដំទ្បូងមី,ស្រូវ,ពោតក្រហម,ល្ពៅ,ត្រទ្បាច,ល្ងរ,ចេកនិងដំណាំកសិឧស្សាហកម្មដូចជាកៅស៊ូ,ម្រេច,សណ្ដែកសៀងដើម្បីចំណូលសេដ្ឋកិច្ចដ៍សំខាន់សំរាប់ចិញ្ចឹមផ្គត់ផ្គង់ជីវភាពគ្រួសារអោយមានការរីកចំរើន។កាលណាប្រជាពលរដ្ឋមានជីវភាពធូរធារខាងវិស័យកសិកម្មនោះសេដ្ឋកិច្ចជាតិក៍មានការរីកលូតលាស់ដើរទន្ទឹមគ្នាផងដែរ។
ចូលមកដល់ខែមេសាឆ្នាំ២០១៥យើងសង្កេតឃើញក្រុមឈ្មួញមកពីខេត្តកំពង់ចាមនិងខេត្តត្បូងឃ្មុំជាប់ព្រំដែនវៀតណាមនាំគ្នាសំរុកដឹកពូជដំទ្បូងមីតាមរថយន្ដយីឌុបយកមកលក់ចែកចាយអោយប្រជាកសិករនៅខេត្តព្រះវិហារនិងយកទៅលក់ចែកចាយដល់ព្រំដែនប្រាសាទព្រះវិហារ។រីឯតំលៃពូជដំទ្បូងមីនៅតែមានតំលៃប្រហាក់ប្រហែលដូចឆ្នាំមុនៗដែរគឺមិនទ្បើងថ្លៃនោះទេ។
អាជ្ញាធរដែនដីបានអោយអ្នកសារព័ត៌មានដឹងថាស្រុកគូលែននិងស្រុកជាំក្សាន្តជាស្រុករីកចំរើនខ្លាំងជាងគេខាងវិស័យកសិកម្មដំណាំដំទ្បូងមីនិងស្រូវដោយសារនៅទីនោះមានផ្ទៃដីធំទូលាយនិងសំបូរដីមានជីវជាតិល្អអំណាយផលដល់ការបង្កបង្កើនផលធ្វើស្រែចំការ។កាលពីឆ្នាំ២០១៤ខេត្តព្រះវិហារទទួលបានផលដំទ្បូងមីរាប់ពាន់តោនហើយប្រជាកសិករបានលក់ចេញទៅអោយឈ្មួញកណ្តាលក្នុងតំលៃហាងឆេងសមរម៕
