ខេត្តសៀមរាប៖ បន្ទាប់ពីមានមនុស្សមួយក្រុមលួចដុតខ្លោងទ្វារអង្គរសង្ក្រាន្តរួចមក ខាង ស ស យ ក បានសាងសង់ជាថ្មីម្តងទៀតទៅតាមរចនាបទ្ធ័ដើមរបស់ខ្មែរ ប៉ុន្តែមិនបានលេងពណ៌ដូចមុននោះទេ។រីឯក្រុមសមត្ថកិច្ចខេត្តសៀមរាបបានស្រាវជ្រាវឃាត់ខ្លួនជនសង្ស័យចំនួន៨នាក់យកមកសាកសួរក្នុងករណីជាប់ពាក់ព័ន្ធលួចដុតខ្លោងទ្វារអង្គរសង្ក្រាន្ត។
ការដាក់តាំងខ្លោងទ្វារអង្គរសង្ក្រាន្តជាថ្មីម្តងទៀតនោះធ្វើឡើងជាមួយគ្នានិងការឃាត់ខ្លួនជនសង្ស័យទាំង៨នាក់គឺធ្វើឡើងនៅថ្ងៃទី១០ខែមេសាឆ្នាំ២០១៥។
លោក សោម រតនា អ្នកនាំពាក្យ ស ស យ ក បានមានប្រសាសន៍ឲ្យដឹងនៅរសៀលថ្ងៃទី១០ ខែមេសា ថា បន្ទាប់ពីមានគេលួចដុត កាលពីយប់ថ្ងៃទី០៧ ខែមេសា ឆ្នាំ២០១៥ កន្លងទៅ ឥឡូវនេះខ្លោងទ្វារស្វាគមន៍អង្គរសង្ក្រាន្តថ្មីបានសាងសង់រួចរាល់ហើយ ដើម្បីត្រៀមទទួលស្វាគមន៍ភ្ញៀវជាតិនិងអន្តរជាតិ ក្នុងថ្ងៃបុណ្យចូលឆ្នាំប្រពៃណីជាតិ ដែលខិតជិតមកដល់
ក្នុងពេលដ៏ខ្លីខាងមុខនេះ។ លោកបន្តថា ទាក់ទងនឹងខ្លោងទ្វារចាស់ បើទោះជាអ្នកជំនាញ បានបញ្ជាក់ ច្បាស់ពីរចនាបទ្ធ័ខ្មែរពិតៗ នៅលើខ្លោងទ្វាចូលព្រឹត្តិការណ៍អង្គរសង្ក្រាន្តក៏ដោយ ក្នុងសា្មរតីមហាគ្រួសារខ្មែរ យើងក៏ មិនចង់ ឃើញប្រជាពលរដ្ឋមួយក្រុមណា មានការអាក់អន់ចិត្ត ត្រឹមតែចំពោះការតុបតែងលំអរនោះឡើយ ដូច្នេះក្រុម ការងារបានព្យាយាមកែលម្អរខ្លោងទ្វារថ្មីឲ្យបានប្រសើរជាងនេះ ដោយមិនមានលេងពណ៌ដូចមុននោះទេ គឺដាក់
ពណ៌សុភាពរាបសារជាងមុន។
សមត្ថកិច្ចបានបញ្ជូនជនសង្ស័យទាំង៨នាក់យកមកតុលាការដើម្បីសួរនាំបន្តពីករណីលួចដុតខ្លោងទ្វារអង្គរសង្ក្រាន្តនេះ ប៉ុន្តែសមត្ថកិច្ចបានបញ្ជាក់ថា ករណីនេះសុំមិនទាន់ឲ្យអ្នកសារព័ត៌មានធ្វើការផ្សព្វផ្សាយនេះទេ ព្រោះសមត្ថកិច្ចកំពុងតាមដាន។
យ៉ាងនេះក្តីក្រុមសាច់ញាតិជនសង្ស័យទាំង៨នាក់បាននាំគ្នាមករៀបរាប់នៅមុខតុលាការប្រាប់អ្នកកាសែតថា បងប្អូននៅក្នុងភូមិត្រពាំងសេះទាំងអស់មិនមានការចោតប្រកាន់ដូចពាក្យសមត្ថកិច្ចនិងតុលាការចោទពីបទលួចដុតខ្លោងទ្វារអង្គរសង្ក្រាន្តនេះទេ។តែបងប្អូនទាំង៨នាក់ដែលតុលាការហៅទៅសួរនេះមានទី១/ បិត ឈឿង ភេទប្រុសអាយុ២៥ឆ្នាំមុខរបរម៉តំរីនៅ
អង្គររស់នៅភូមិត្រពាំងសេះ សង្កាត់គោកចក ទី២/ឈ្មោះ ជួប ចាម ភេទប្រុសអាយុ ៤១ឆ្នាំមុខរបរសន្តិសុខ ទី៣/ឈ្មោះ ឆន ម៉ាប់ ភេទប្រុសអាយុ ២៦ឆ្នាំមុខរបរម៉តំរី ទី៤/ឈ្មោះ ស៊ាំ សុង ភេទប្រុសអាយុ៣៥ឆ្នាំមុខរបររឺសម៉កកង់បី ទី៥/ឈ្មោះ វឿន វុន ភេទប្រុសអាយុ២៥ឆ្នាំមុខរបរ បុគ្គលិកអូតែល និងទី៦/ឈ្មោះ ឈឿម កង ភេទប្រុសអាយុ ៣៤ឆ្នាំមុខរបរកម្មករសំណង់ ទី៧/ឈ្មោះ ញ៉ាញ់ ផល អាយុ ៣៥ឆ្នាំមុខរបរកម្មករសំណង់ និងទី៨/ឈ្មោះ គឿង ភេទប្រុសអាយុ ២៧ឆ្នាំ មុខរបរកម្មករសំណង់ អ្នកទាំង៨នាក់នេះរស់នៅក្នុងអង្គរ ភូមិត្រពាំងសេះ សង្កាត់គោកចក ក្រុងសៀមរាប៕
