ភ្នំពេញ ៖ រថយន្តក្រុងដែលដឹកអ្នកដំណើរមួយគ្រឿងបានបើកទភបុកម៉ូតូហុងដាឌ្រីមធុន សេ១២៥មួយគ្រឿងបណ្តាលឱ្យអ្នកជិះម៉ូតូរងរបួសធ្ងន់ធ្ងរ ហើយរថយន្តបង្កនេះបានបើកគេចខ្លួនបាត់ស្រមោលពីកន្លែងកើតហេតុ។ ហេតុការណ៏កើតឡើងនៅវេលាម៉ោង ១និង ២០នាទីរំលងអធ្រាតឈានចូលថ្ងៃ ទី ០៩ ខែមេសា ឆ្នាំ២០១៤នៅចំណុច ទល់មុខនិងហាងខារ៉ាអូរខេ ដេវិន តាមបណ្តោយផ្លូវជាតិលេខ ១៩៨៦ ស្ថិតនៅភូមិភ្នំពេញ សង្កាត់ភ្នំពេញ ខណ្ឌសែនសុខ ។
ប្រភពព័ត៌មានពីកន្លែងឱ្យដឹងថា រថយន្តក្រុង ពណ៌សលាយខៀវ អត់មានស្លាកលេខបានបើកយ៉ាងលឿនតាមផ្លូវ១០៨៦ ក្នុងទិសដៅពីកើតទៅលិច ស្រាប់តែមកដល់ចំណុចកើតហេតុខាងលើក៏រថយន្តក្រុងជ្រុលទៅបុកម៉ូតូហុងឌ្រីម ធុនសេ១២៥មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1BV- 8412 ជិះដោយបុរសម្នាក់ បណ្តាលឱ្យអ្នកជិះម៉ូតូដួល បោកក្បាលទៅនិងចិញ្ចើមថ្នល់ របួសយ៉ាងធ្ងន់ហើយរថយន្តក្រុងដែលបង្កហេតុនេះបានបើកគេចខ្លួនបាត់ស្រមោលពីកន្លែងកើតហេតុបាត់ដោយសុវត្តិភាពតែម្តង។
ក្រោយពេលហេតុខាងលើនេះសមត្ថកិច្ចបានចុះមកដល់ និងបានហៅ រថយន្ត សាមុយបានមកដឹក ជនរងគ្រោះយកទៅព្យាបាល ចំណែកម៉ូតូជនរងគ្រោះ ត្រូវបានសមត្ថកិច្ចយកទៅរក្សាទុក នៅខណ្ឌសែនសុខ រងចាំបងប្អូនមកទទួលយកទៅវិញផងដែរ៕
