បុរសម្នាក់ដែលត្រូវបានគេស្គាល់ថា ជាមេបុស្តិ៍ផ្សារដេប៉ូទី២ បានបើករថយន្តវីហ្គូ ទាំងស្ថានភាពស្រវឹងស្រា ហើយបានថយរថយន្តបុករថយន្តប្រជាពលរដ្ឋ ដែលកំពុងតែធ្វើដំណើរ បណ្តាលឱ្យរងការខូចខាតបន្តិច បន្តួចប៉ុណ្ណោះ ប៉ុន្តែនៅពេលមេប៉ុស្តិ៍ម្នាក់នោះ ចុះពីលើរថយន្តមកមិនព្រមទទួលខុសត្រូវ និងបានស្រែឡូឡារបង្កការភ្ញាក់ផ្អើល ដល់អ្នកដំណើរតាមដងផ្លូវចោមរោមមើល យ៉ាងច្រើនកុះករ ។ ហេតុការណ៍នេះបានកើតឡើង កាលពីវេលាម៉ោង៩នឹង៣០នាទីយប់ថ្ងៃទី១៩ ខែឧសភា ឆ្នាំ២០១៥ តាមបណ្តោយផ្លូវឡឥដ្ឋ ស្ថិតក្នុងសង្កាត់ ទួលសង្កែ ខណ្ឌឬស្សីកែវ ។
តាមសាក្សីដែលបានឃើញហេតុការណ៍នេះ បានឱ្យដឹងថា នៅមុនពេលកើតហេតុ គេបានឃើញគេបានឃើញរថយន្តវីហ្គូ ពណ៍ទឹកប្រាក់ ពាក់ស្លាកលេខ រដ្ឋ32 2 – 0002 បើកបរដោយបុរសម្នាក់ ដែលត្រូវបានគេស្គាល់ ថា ជាមេប៉ុស្តិ៍ផ្សារដេប៉ូទី២ បានបើករថយន្តទៅយកប្រពន្ឋនៅម្តុំកន្លែងកើតហេតុ ហើយនៅពេលដល់ម៉ោងរូបគាត់ បានថយរថយន្ត ទាំងស្ថានភាពស្រវឹងស្រាជោគជាំផងនោះ និងមិនបានមើលក្រោយ ក៏បានប៉ះជាមួយនឹងរថយន្ត ម៉ាក ACURA ពណ៍ទឹកប្រាក់ ពាក់ស្លាកលេខភ្នំពេញ 2N-0468 ដែលកំពុងធ្វើដំណើរពីក្រោយរថយន្តវីហ្គូនោះ បណ្តាលឱ្យរងការខូចខាតបន្តិចបន្តួចតែប៉ុណ្ណោះ ។ តែមេប៉ុស្តិ៍នោះមិនបានចុះមកមើលរថយន្ត ដែលខ្លួនបានថយ ប៉ះនោះទេ ថែមទាំងបានរយ៉ែទៅ មុកទៅក្រោយជាច្រើនដង បណ្តាលឱ្យរងការខូចខាតខ្លាំងទៅៗ ។ ប្រភពដដែលបានបន្តថា មិនតែប៉ុណ្ណោះមេប៉ុស្តិ៍ទំនើងម្នាក់នេះ មិនបានចុះពីលើរថយន្តដើម្បីទទួលខុសត្រូវនោះទេ ទើបជនរងគ្រោះបើករថយន្តកាកពីមុខទើបចុះមក និងបានស្រែកឡូឡារទាំងខ្លួនស្រវឹងស្រាជោគជាំ រករឿងជនរងគ្រោះទៅវិញ បង្កឱ្យមានការភ្ញាក់ផ្អើលដល់អ្នកដំណើរ និងប្រជាពលរដ្ឋនៅជិតនោះ នាំគ្នាចោមរោម មើលនិងរិះគន់នូវទង្វើបុរសម្នាក់នេះយ៉ាងខ្លាំង ដោយអាងខ្លួនជាមេប៉ុស្តិ៍ដែលជាអ្នកអនុវត្តន៍ច្បាប់ហើយ បែរជាធ្វើដូចនេះទៅវិញ ក៏ព្រោះតែមានជាតិស្រវឹងនៅក្នុងខ្លួន ។
ក្រោយមកមានសមត្ថកិច្ចជាច្រើននាក់ បានទៅអន្តរាគន៍ដល់កន្លែងកើតហេតុ និងបានធ្វើការសម្របសម្រួលអស់រយះពេលជាយូរ ទើបបុរសជាមេប៉ុស្តិ៍ស្វាងស្រវឹងបន្តិច ដឹងពីកំហុងរបស់ខ្លួន ព្រមសងភាគីម្ខាងទៀត ចំនួន២០០ដុល្លារ ទើបបញ្ចប់រឿងត្រឹមនេះ ៕
