> បាត់ដំបង: ក្មេងប្រុស និងស្ត្រីវ័យចំណាស់ម្នាក់ បានស្លាប់ភ្លាមៗនៅនឹងកន្លែងកើតហេតុ បន្ទាប់ពី ត្រូវបានរថយន្តមួយគ្រឿងដែលអ្នកបើកបរស្រវុឹងជោកជាំ ហើយបានបើកបរក្នុងល្បឿនយ៉ាងលឿនទៅបុកពីក្រោយ កាលពីវេលាម៉ោង 6,30នាទីនៅយប់ថ្ងៃទី 19-5-15 តាមបណ្តោយផ្លូវជាតិលេខ67ត្រង់ចំនុចភូមិគោកពន្លៃ សង្កាត់អូរម៉ាល់ ក្រុងបាត់ដំបង រួចជ្រុលធ្លាក់ចូលទៅក្នុងប្រលាយ។យោងតាមរបាយការណ៍របស់សមត្ថកិច្ចនៃការិយាល័យចរាចរផ្លូវគោកបានអោយដឹងថា នៅមុនពេលកើតហេតុ មានរថយន្តមួយគ្រឿងម៉ាកលុចសុីស RX300 ព៌ណខ្មៅ ពាក់ស្លាកលេខ ខេមរភូមិន្ទ 2-1031 បានបើកបរយ៉ាងលឿនក្នុងទិសដៅពីកើតទៅលិច លុះទៅដល់ចំនុចកើតហេតុបានបុកនឹងកង់ចំពីក្រោយយ៉ាងពេញទំហុឹងដែលមានក្មេងប្រុសម្នាក់ជិះផងនោះ ធ្វើអោយរថយន្តជ្រុលច្រឡោតទៅបុកនឹងម៉ូតូមួយគ្រឿងទៀតដែលមានស្ត្រីម្នាក់ជាអ្នកបើកបរ ធ្វើអោយជនរងគ្រោះ ទាំងពីរនាក់ដេកស្លាប់នៅក្នុងថ្លុកឈាមយ៉ាងអាណោចអាធម។ សមត្ថកិច្ចបានបន្ថែមថា ក្រោយពេលបុករួចភ្លាមៗរថយន្តដែលកំពុងស្ថិតក្នុងភាពបាត់បង់ម្ចាស់ការបានរេទៅធ្លាក់នៅក្នុងប្រលាយខាងឆ្វេង ដោយក្បាលរថយន្តវិលត្រឡប់មកខាងក្រោយវិញចំណែកអ្នកបើកបររថយន្ត គឺមិនបានរត់គេចទៅណាទេដោយសារតែគេមានសភាពស្រវុឹងទន់ទោរទៅហើយនោះ ទើបត្រូវសមត្ថកិច្ចឃាត់ខ្លួនយកមកកាន់ការិយាល័យចរាចរដើម្បីធ្វើការសាកសួរព្រមទាំងវាស់កម្រិតជាតិអាល់កុលដែលមានផ្ទុកនៅក្នុងខ្លួន។អ្នកបើកបររូបនោះមានឈ្មោះថាវ ឡុង ភេទប្រុស អាយុ45ឆ្នាំ ជាមន្ត្រីប៉េអឹមខេត្ត រស់នៅភូមិភ្នំសំពៅកើត ឃុំភ្នំសំពៅ ស្រុកបាណន់ ឯកម្រិតជាតិអាល់កុលមានរហូតដល់93មីល្លីក្រាមក្នុងមួយលីត្រខ្យល់ ដែលជាកម្រិតមួយអាចប្រឈមមុខនឹងការផ្តន្ទាទោសតាមច្បាប់ចរាចរផ្លូវគោក។ដោយឡែកក្មេងប្រុសដែលជិះកង់មានអាយុ14ឆ្នាំ និងស្ត្រីម្នាក់ក្នុងវ័យ54ឆ្នាំ ដែលបានប្រើប្រាស់ ម៉ូតូម៉ាកសង់ធុនC125 ព៌ណខ្មៅ ពាក់ស្លាកលេខបាត់ដំបង 1B 0397 គឺជាអ្នកដែលរស់នៅម្តុំ ភូមិ ឃុំកើតហេតុនេះដែរ ដោយក្រោយពេលកើតហេតុក្រុមគ្រួសារសាច់ញាតិបានមកទទួលយកទៅ ធ្វើបុណ្យតាមប្រពៃណីហើយ ។
> លោកវរ:សេនីយ៍ឯកសាត គឹមសាន នាយការិយាល័យចរាចរផ្លូវគោកបានមានប្រសាសន៍ថាអ្នកបើកបររូបនេះអាចពាក់ព័ន្ធនឹងករណីពីរយ៉ាងទីមួយ ការបើកបរមានផ្ទុកសារធាតុអាល់កុលរហូតដល់93មីល្លីក្រាមក្នុងមួយលីត្រខ្យល់ និងទីពីរ បានបង្កអោយមានគ្រោះថ្នាក់ដល់អាយុជីវិតមនុស្ស ចំណែករឿងស្លាកលេខខេមរភូមិន្ទ គឺសមត្ថកិច្ចនឹងធ្វើការត្រួតពិនិត្យទៅលើឯកសារសិន ប្រសិនបើមិនមានទេនោះអ្នកបើកបរអាចមានបទល្មើសមួយករណីទៀតក្នុងការប្រើប្រាស់ស្លាកលេខយានយន្តក្លែងក្លាយតាមមាត្រាលេខ77 ដូច្នេះអ្នកបើកបរត្រូវបញ្ជូនខ្លួនទៅកាន់សាលាដំបូងដើម្បីចាត់ការតាមផ្លូវច្បាប់៕
