កំពង់ឆ្នាំង៖ ត្រាក់ទ័រថ្នីសេរីឆ្នាំ២០១៥មួយគ្រឿង ត្រូវបានសមត្ថកិច្ច និងអាជ្ញាធរមូលដ្ឋានចាប់ ឃាត់ទុក នៅពេលដែលលោកសង្ឃមួយអង្គ ជួលមកឈូសឆាយដីព្រៃសហគមន៍ ពោធិជ្រកជំរកពុទ្ធិសែន នៅចំណុចជើងភ្នំពោធិ ឃុំពោធិ ស្រុកកំពង់លែង កាលពីម៉ោង៥ល្ងាច ថ្ងៃទី១០ ខែឧសភា ឆ្នាំ២០១៥។នៅរសៀលថ្ងៃទី២១ ខែឧសភា ឆ្នាំ២០១៥ សមត្ថកិច្ចចំរុះបានចុះមកទទួលយកត្រាក់ទ័រខាងលើនេះ បញ្ជូនមករ្សាទុកនៅ ខ័ណ្ឌរដ្ឋបាលព្រៃឈើកំពង់ឆ្នាំង ដើម្បីកសាងសំណុំរឿងបញ្ជូនទៅសាលាដំបូងខេត្ត។
លោក ហោ ដារ៉ា នាយផ្នែករដ្ឋបាលព្រៃឈើកំពង់ឆ្នាំងជាអ្នកដឹកនាំក្រុមសមត្ថកិច្ចចំរុះចុះមកទទួលយកត្រាក់ទ័រខាងលើនេះបាននិយាយអោយដឹងថា៖ម្ចាស់ត្រាក់ទ័រខាងលើនេះមានទីលំនៅ ក្នុងខេត្តកំពង់ធំ ដែលកាលពីថ្ងៃទី១០ ខែឧសភា ឆ្នាំ២០១៥ ត្រូវបានលោកសង្ឃមួយអង្គ ព្រះនាម វណ្ណ គីម អនុគណស្រុកកំពង់លែង និងជាព្រះចៅអធិការវត្តសំរោងកង្រី បានជួលមកអោយឈូសដីព្រៃសហគមន៍ពោធិជ្រកជំរកពុទ្ធិសែន នៅចំណុចជើងភ្នំពោធិ ស្ថិតក្នុងឃុំពោធិ ស្រុកកំពង់លែង ហើយត្រូវបានអាជ្ញាធរឃុំ និងសមត្ថកិច្ច ព្រមទាំងសហគមន៍ព្រៃឈើ ចាប់ឃាត់ទុកនៅប៉ុស្តិនគរបាលរដ្ឋបាលពោធិ បន្ទាប់មកបានរាយការណ៍ជូនខ័ណ្ឌរដ្ឋបាលព្រៃឈើកំពង់ឆ្នាំងចាតើការតាមផ្លូវច្បាប់ ដោយឡែកអ្នកបើកត្រាក់ទ័របានរត់គេចខ្លួនបាត់។
លោក ធ្លក ជា ប្រធានសហគមន៍ព្រៃឈើបាននិយាយអោយដឹងថា៖ករណីដែលលោកសង្ឃខាងលើ បានរំលោភយកដីព្រៃឈើរបស់សហគមន៍បានកើតឡើងតាំងពីចុងឆ្នាំ២០១៣។ ដោយលើកទី១បានលោកសង្ឃបានជួលគេអោយកាប់រានព្រៃឈើទំរបស់សហគមន៍ហំជិត១ហិកតាកន្លះ បន្ទាប់មកសហគមន៍បានទប់ស្កាត់ និងហាមឃាត់ហើយប្តឹងទៅតុលាការ និងត្រូវបានតុលាការហៅទៅសួរនាំ។លើកទី២ពេលត្រឡប់មកពីតុលាការវិញ ស្រាប់តែឃើញលោកសង្ឃអង្គនោះបានជួលអោយគេបោះរបងថ្មហ៊ុំព័ទ្ធយកដីព្រៃសហគមន៍ ហើយត្រូវបានតុលាការហៅទៅសួរនាំជាលើកទី២។បន្ទាប់មកលើកទី៣ ក៍បានជួលត្រាក់ទ័រមកឈូសឆាយដីព្រៃនៅចំណុចខាងលើនេះម្តងទៀត និងត្រូវបានអាធរនិងសមត្ថកិច្ចមូលដ្ឋានចាប់ឃាត់ទុក។
លោកបានបន្តថា៖ នៅពេលដែលលោកសង្ឃខាងលើរំលោភយកដីព្រៃសហគមន៍លើកទី១និងទី២ អាជ្ញាធរមូលដ្ឋាន និងសហគមន៍បាននិមន្តលោកមកសាកសួរ ហើយបានសំណូមពរអោយលោកប្រគល់ដីព្រៃឈើដែលលោករំលោភយកនោះ ប្រគល់អោយសហគមន៍វិញទៅកុំអោយមានរឿង។ប៉ុន្តែលោកបានមានសង្ឃដីកាថា លោកបានទិញដីព្រៃឈើនេះពីគេ ដូចនេះលោកមិនប្រគល់ដីនេះអោយវិញទេ បើចង់បានវិញទាល់តែអ្នកលក់ដីព្រៃឈើនេះប្រគល់ប្រាក់ថ្លៃទិញដីព្រៃអោយមកលោកវិញ។
លោក ហោ ដារ៉ា បាននិយាយអោយដឹងទៀតថា៖តាមច្បាប់ស្តីពីព្រៃឈើ ការឈូសឆាយបំពានយក ដីព្រៃឈើសហគមន៍ និងដីរបស់រដ្ឋត្រូវផ្តន្ទាទោសតាមមាត្រាទី៩៨នៃច្បាប់ស្តីពីព្រៃឈើ ដែលករណីនេះទាំងម្ចាស់ ត្រាក់ទ័រ និងលោកសង្ឃព្រះនាម វណ្ណ គីម ដែលជាអ្នករំលោភឈូសឆាយយកដីព្រៃសហគមន៍ នឹងត្រូវតុលាការផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នា តាមបញ្ញត្តិច្បាប់ ចំណែកគ្រឿងចក្រត្រាក់ទ័រជាវត្ថុតាងត្រូវរឹបអូសជាសម្បត្តិរដ្ឋ៕
