កំពង់ឆ្នាំង៖ ការភ្ញាក់ផ្អើលមួយរបស់ប្រជាពលរដ្ឋបានកើតឡើងនៅវេលាម៉ោងប្រមាណជាង៩ព្រឹកថ្ងៃទី២១ ខែឧសភា ឆ្នាំ២០១៥ ខណៈដែលអ្នកស្រុក ទៅបេះត្រួយស្តៅបានប្រទះឃើញ សពបុរសម្នាក់ដេកស្លាប់ហើមប៉ោងស្អុយរលួយនៅគល់ដើមព្រីងមួយ ចំណុចក្រាំងឆាន ស្ថិតក្នុងភូមិផ្សារ ឃុំផ្សារ ស្រុកបរិបូរណ៌ ដែលពីដំបូងឡើងសពជនរងគ្រោះខាងលើមិនត្រូវបានស្គាល់អត្តសញ្ញាណឡើយ ។សមត្ថកិច្ចនគរបាលស្រុកបរិបូណ៌បាននិយាយអោយដឹងថាៈ ក្រោយពីបានទទួលព័ត៌មាននេះសមត្ថកិច្ច ក៏បានទៅព័ទ្ឋខ្យែ ការពារជុំវិញសព តាមជំនាញបច្ចេកទេសរបស់សមត្ថកិច្ច ហើយក៏បានប្រកាស តាមវិទ្យុទាក់ទងតាមប៉ុស្តិនគរបាលរដ្ឋបាលក្នុងស្រុក ដើម្បីជូនដំណឹងដល់ គ្រួសារណាដែលមានបាត់សមាជិករបស់ខ្លួន រហូតដល់ម៉ោងប្រមាណជាង១១ព្រឹកថ្ងៃដដែល បានទទួលព័ត៌មានថាៈ ប្រជាពលរដ្ឋនៅ ភូមិដំរីកូន ឃុំអញ្ចាញរូង ស្រុកបរិបូរណ៌ បានបាត់សមាជិកគ្រួសារម្នាក់ជាបុរស។ក្រោ យមកក្រុមគ្រសារខាងលើបានមកពិនិត្យសពជនរងគ្រោះ ទើបដឹងថា ជាក្រុមគ្រួសារខ្លួនមាន ឈ្មោះ
វង់ សុខ អាយុ៤០ឆ្នាំ មានប្រពន្ឋឈ្មោះ ជាម វ៉ុន មានកូនស្រីម្នាក់ ។
បុរសម្នាក់ឈ្មោះ ផ្លង់ បុល អាយុ ៣៩ឆ្នាំ ដែលត្រូវជាក្មួយបង្កើត ជនរងគ្រោះបាននិយាយអោយដឹងថា៖កាលពីថ្ងៃទី ១៧ ខែឧសភា ឆ្នាំ២០១៥ រូបគាត់និងឪពុកមារ ដែលស្លាប់នេះ បាននាំគ្នាដើររកក្របីដែលបានបាត់ចំនួន៥ ក្បាល ពេលដើរមកដល់ចំណុចមាត់អូរ បានឃើញដានក្របី ហើយបានបំបែកគ្នាដើររករហូតល្ងាចនៅតែមិនឃើញក្របីទេ រូបគាត់ក៏ដើរមកកន្លែងដើមវិញ តែមិនឃើញឪពុកមារនោះទេ
គាត់ក៏ដើរត្រឡប់ ទៅផ្ទះវិញ។ ស្រាប់តែឃើញក្របីទាំង៥ដើរមកដល់ភូមិវិញ ប៉ុន្តែមិនឃើញឪពុកមារនោះឡើយ និងក៏បានប្រាប់ដល់សមត្ថកិច្ចមូលដ្ឋានដែរ លុះស្អែកឡើងនាំគ្នាតាមរកទៀតនៅតែមិនឃើញ។ រហូតដល់ព្រឹកថ្ងៃទី ២១ ខែឧសភា នេះស្រាប់តែប្រជាពលរដ្ឋ ដែលនាំគ្នាទៅបេះត្រួយស្តៅ បានធំខ្លិនស្អុយក៏នាំគ្នាដើររក ក៏បានប្រទះសពឪពុកមារគាត់ដេកស្លាប់នៅក្រោមដើមព្រីង ក្នុងក្រឡុកមួយ ។
សមត្ថកិច្ចនគរបាលបច្ចេកទេសខេត្ត ដែលបានចុះពិនិត្យនិងធ្វើកោសល្យពិច្ច័យ បាននិយាយអោយដឹងថាៈ ជនរងគ្រោះអាចស្លាប់ដោយសារខ្យល់គរពេលក្តៅខ្លាំង បានចូលមកជ្រកនៅក្រោមម្លប់កូនឈើនេះ ដែលមានក្រឡុក និងដែលពិបាកនិងឃើញ ទើបទាល់តែហើមស្អុយមានខ្លិនទៅ ហើយ ទើបប្រជាពលរដ្ឋដែលដើរមកក្បែទើបប្រទះឃើញ។
នៅពេលពិនិត្យធ្វើកោសល្យពិច្ច័យរួចមកសមត្ថកិច្ចបាននិយាយអោយដឹងថា៖នៅលើសាកសពពុំមានស្លាកស្នាមអ្វីគួរអោយសង្ស័យជារឧងឃាតកម្មឡើយ ហើយសមត្ថកិច្ចក៏ប្រគល់សពជនរងគ្រោះអោយទៅក្រុមគ្រួសារយកទៅធ្វើបុណ្យទានតាមប្រពៃណីនៅក្នុងមូលដ្ឋាន៕
