ខេត្តឧត្តរមានជ័យ៖
ឯកឧត្តម វ៉ាត ប៉ារ៉ានីន អភិបាលរងខេត្តឧត្តរមានជ័យ បានដឹកនាំក្រុមការងារអនុគណៈកម្មការដោះស្រាយដី ចុះទៅផ្សព្វផ្សាយ ដល់ប្រជាពលរដ្ឋដែលកំពុងរស់នៅក្នុងចំណុចអូរអំបិល ក្នុងភូមិអូរតាម៉េង ឃុំ-អន្លង់វែង ខេត្តឧត្តរមានជ័យ ដែលពួកគាត់ពុងតែរស់នៅ ក្នុងដែនជម្រកសត្វព្រៃគូលេន-ព្រហ្មទេព ហើយជាដីរដ្ឋរក្សាទុករបស់ក្រសួងបរិស្ថាន ដោយកន្លងមកពួកគាត់បានប្រឈមមុខនឹងអាជ្ញាធរ និងសមត្ថកិច្ចជំនាញ ចុះរារាំងមិនឱ្យសង់លំនៅដ្ឋាន និងអាស្រ័យផល។
ក្រុមការងារអនុគណៈកម្មការបានចុះផ្សព្វផ្សាយនៅព្រឹកថ្ងៃទី២១ ខែឧសភា ឆ្នាំ២០១៥ ដែលប្រធានក្រុមការងារ ឯកឧត្តម វ៉ាត ប៉ារ៉ានីន ជួបជាមួយតំណាងប្រជាពលរដ្ឋ ទាំង ៣ក្រុម ចំណុចអូរអំបិល ហើយឯកឧត្តម បានប្រកាសថា ក្រុមការងារចុះទៅនៅពេលនេះ ទៅតាមផែនការរបស់ថ្នាក់ជាតិ និងគណៈបញ្ជាការឯកភាពគ្រប់គ្រងដីរដ្ឋថ្នាក់ខេត្ត ឯកឧត្តម ស ថាវី បានសម្រេចប្រគល់ដីជូនប្រជាពលរដ្ឋនៅចំណុចអូរអំបិលនេះ ចំនួន ៣៥០គ្រូសារប៉ុណ្ណោះ ។ ហើយក្នុងនោះជាការសំណូមពរពី ឯកឧត្តម វ៉ាត ប៉ារ៉ានី បានសុំឱ្យប្រជាពលរដ្ឋ នាំគ្នាទៅបោះបង្គោលព្រំដីរបស់ខ្លួន ដើម្បីឱ្យក្រុមការងារជំនាញមានការងាយស្រួល ចុះវាស់វែងលើដី ជូនដល់ពួកគាត់។ ក៏ប៉ុន្តែផ្ទុយទៅវិញ បើដីណាដែលមានទំនាស់ក្រុមការងារនឹងទុកឱ្យធ្វើការដោះស្រាយគ្នារួចសិន ដោយឡែកក្រុមការងារធ្វើយ៉ាងនេះ គឺដើម្បីចង់ដឹងថា តើចំនួនប្រជាពលរដ្ឋ ៣៥០គ្រួសារ ពិតប្រាកដផងដែរ។
ឯកឧត្តមបន្តថា បន្ទាប់ពីធ្វើបច្ចុប្បន្នភាពផ្ទៃដីរួច ក្រុមការងារនឹងស្នើរសុំទៅរាជរដ្ឋាភិបាល ដើម្បីកាត់ចេញអនុប្រយោគពីដីបរិស្ថាន មកជូនប្រជាពលរដ្ឋ និងចេញប័ណ្ណកាប់ប្រើប្រាស់ឱ្យ ព្រោះដីនៅចំណុចអូរអំបិលនេះ គឺជាដីរបស់រដ្ឋគ្រប់គ្រងដោយក្រសួងបរិស្ថាន។ ទោះបីយ៉ាងណាក៏ដោយនៅពេលនេះ បន្ទាប់ពីផ្សព្វផ្សាយរួច ឯកឧត្តមសូមឱ្យប្រជាពលរដ្ឋ ជួយសហការឱ្យបានល្អប្រសើរ ហើយនឹងបានឆាប់បានទទួលបានដី ប្រើប្រាស់ទៅតាមតម្រូវការរបស់ខ្លួនក្នុងគ្រួសារ។
គួរបញ្ជាក់ថា ស្នាក់ការបរិស្ថានដែនជម្រកសត្វព្រៃគូលេន-ព្រហ្មទេព របស់លោក ខេង សុជាតិ ជានាយក ហើយប្រជាពលរដ្ឋ ចំនួន ៣៦០គ្រួសារ មករស់នៅសង់លំនៅដ្ឋាន និងកាប់រុករានដីព្រៃ យកដីអាស្រ័យផល នៅជុំវិញស្នាក់ការបរិស្ថានដែនជម្រកគូលេន-ព្រហ្មទេព ត្រូវបានគេងើងឆ្ងល់ថា នៅពេលប្រជាពលរដ្ឋកមកាប់រុករានដីព្រៃ មូលហេតុបានជាមន្ត្រីបរិស្ថានប្រចាំការនៅស្នាក់ការ ធ្វើការទប់ស្កាត់ តែបែរជាបណ្តោយឱ្យជាពលរដ្ឋ សង់លំនៅដ្ឋាន និងកាប់ដីព្រៃ វៀតយកដី ដើម្បីធ្វើស្រែចំការអាស្រ័យផល រួចហើយបានដេញពួកគាត់ចេញវិញ។ ប្រជាពលបាននិយាយថា កន្លងមកពួកគាត់បានទិញដីពីឈ្មោះ ហេង រី ជាមន្ត្រីបរិស្ថានដែនជម្រកសត្វព្រៃគូលេន-ព្រហ្មទេព ជាកូនចៅរបស់លោក ខេង សុជាតិ ដោយមានលិខិតស្នាម ក្នុងឡូតិ៍ជាប់ផ្លូវជាតិ តំលៃ១០០០ដុល្លា ទៅ ១៥០០ដុល្លា ដូច្នេះទើបពួកគាត់ហ៊ានមកកាប់ព្រៃនៅជុំវិញស្នាក់ការបរិស្ថាននេះបាន។
