កាលពីវេលាម៉ោង៧និង៣០នាទីយប់ ថ្ងៃទី២១ ខែឧសភា ឆ្នាំ២០១៥មានឧប្បត្តិហេតុគ្រោះថ្នាក់ចរាចរណ៍មួយបានកើតឡើងដោយ សារតែគោយន្តកន្ត្រៃគ្មានភ្លើងបំភ្លឺ និងគ្មានចំណាំងផ្លាតពីក្រោយ បណ្តាលអោយរថយន្ត ម៉ាកឡុចស៊ីស R.X 300 មួយគ្រឿងបានបុកពីក្រោយយ៉ាងពេញទំហឹង នៅលើកំណាត់ផ្លូវជាតិលេខ៥ ក្នុងចន្លោះគីឡូម៉ែត្រលេខ ១០៣ និង១០៤ ស្ថិតក្នុង ភូមិក្នុង ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង បណ្តាលអោយបុរសជាអ្នកបើកគោយន្តរងរបួសមធ្យម និងស្ត្រីជាប្រពន្ឋបានរងរបួសស្រាល ។
នគរបាលការិយាល័យចរាចរណ៏ផ្លូវគោក នៃស្នងការដ្ឋាននគរបាលខេត្តបាន អោយថាៈ អ្នកបើកបរគោយន្តខាងលើមានឈ្មោះ អឹម គឹមសេង អាយុ៥០ឆ្នាំ បានរងរបួសមធ្យម ចំណែកប្រពន្ឋឈ្មោះ ប៉ុល សុផារី អាយុ៤៩ឆ្នាំរបរបួសស្រាល ពួកគាត់មានទីលំនៅ ភូមិត្រពាំងអំពិល ឃុំប្រស្នឹប ស្រុករលាប្អៀរ ខេត្តកំពង់ឆ្នាំង ។ មុនពេលកើតហេតុ គោយន្តកន្ត្រៃខាងលើបានបើកដឹកផ្លែឪឡឹកត្រឡប់ទៅផ្ទះវិញតាមបណ្តោយផ្លូវជាតិ ពីកើតទៅលិច លុះពេលមកដល់ចំណុចកើតហេតុ ស្រាប់តែមានរថយន្តឡុចស៊ីសR.X 300 បើកបរដោយបុរសមិនស្គាល់ឈ្មោះ បានទៅបុកពេញទំហឹងពី ក្រោយគោយន្តតែម្តង ពេលនោះស្ត្រីជាប្រពន្ឋរងរបួសបន្តិចបន្តួចតែប៉ុណ្ណោះ ចំណែកប្តីរងរបួសមធ្យម ដោយឡែកខាងរថយន្តបានរងរបួសខ្លះហើយបានប្រញាប់ទៅមន្ទីរពេទ្យបាត់ទៅ ។
បើតាមបុរសឈ្មោះ អឹមគឹមសេង ជាអ្នកបើកគោយន្តបាននិយាយនៅក្នុងមន្ទីរពេទ្យថាៈគោយន្តគាត់ពិតជាគ្មានចំណាំងផ្លាត និងគ្មានភ្លើងបំភ្លឺមែន ពេលបើកយប់នោះគឺគាត់ប្រើភ្លើងពិលទូរសព្ទ័ចុចបំភ្លឺទៅមុខនិងពេលឃើញភ្លើងឡានមកពីក្រោយគាត់ច្របាច់ពិលនោះមកក្រោយវិញដើម្បីជាសញ្ញាដែរ។
លោក អៀរ ប៊ុនធឿននាយការិយាល័យចរាចរណ៏ផ្លូវគោក បាននិយាយថាៈ គ្រោះថ្នាក់ចរាចរណ៏ខាងលើ គឺបណ្តាលមកពីគោយន្តគ្មានចំណាំងផ្លាត ធ្វើអោយអ្នកបើកបរខាងក្រោយមើលមិនឃើញ។កន្លងទៅលោកបានធ្លាប់ណែនាំរួចហើយអោយម្ចាស់គោយន្តដាក់ចំណាំងផ្លាត ហើយតាមស្រុក និងក្រុងទាំងអស់បានអនុវត្តរួចហើយ នៅសេសសល់មួយចំនួនប៉ុណ្ណោះ ។ ហើយការមិនព្រមដាក់ចំណាំងផ្លាតនេះពេល មានគ្រោះថ្នាក់ម្ចាស់គោយន្តត្រូវទទួលខុសត្រូវដូចករណីនៅស្រុកកំពុងត្រឡាចបុរសម្នាក់បុកគោយន្តពីក្រោយ ពេលនេះម្ចាស់គោយន្តបានជាប់ទោសដល់សព្វថ្ងៃ ។
គោយន្ត និងរថយន្តត្រូវបានស្ទូចមករក្សាទុកនៅការិយាល័យចរាចរណ៏ផ្លូវគោករបស់ស្នការដ្ឋានគរបាលខេត្ត ដើម្បីរង់ចាំការដោះស្រាយតាមផ្លូវច្បាប់ ៕
