កែប៖ លោក ទេព យុទ្ធ អភិបាល នៃគណៈអភិបាលរងខេត្តកែប បានស្នើសុំឲ្យប្រជានេសាទផ្តល់ព័ត៌មានពីការចូលនេសាទខុសច្បាប់ របស់ទូកនេសាទវៀតណាម ក្នុងដែនសមុទ្រខេត្តកែប និងសុំឲ្យបញ្ឈប់ការនេសាទដោយប្រើប្រាស់ ឧបករណ៍នេសាទខុសច្បាប់ ។
ក្នុងពិធីផ្សព្វផ្សាយច្បាប់ស្តីពីជលផល និងដុតបំផ្លាញឧបករណ៍នេសាទខុសច្បាប់ នៅរសៀលថ្ងៃទី២៩ ខែមិថុនា ឆ្នាំ២០១៥ នៅកំពង់ទូក ព្រែកតានេន ក្នុងឃុំអង្គោល ស្រុកដំណាក់ចង្អើរ ។
លោកអភិបាលរងខេត្តបានបន្តទៀតថាៈ សូមឲ្យប្រជានេសាទចូលរួមផ្តល់ព័ត៌មានអោយបានឆាប់រហ័សពីការចូលនេសាទខុសច្បាប់ របស់ទូកនេសាទវៀតណាម ឲ្យទាន់ពេលវេលា ដើម្បីឲ្យសមត្ថកិច្ច ធ្វើការទប់ស្កាត់ឲ្យទាន់ពេលវេលា ព្រោះថា សមត្ថកិច្ចកម្ពុជា បច្ចុប្បន្នមានមធ្យោបាយគ្រប់គ្រាន់ ក្នុងការបង្ក្រាបបទល្មើសលើផ្ទៃសមុទ្រ ។
លោកស សូរិន នាយខណ្ឌរដ្ឋបាលជលផលកំពតឲ្យដឹងថាៈ ៦ខែដើមឆ្នាំ ២០១៥នេះសកម្មភាពកម្លាំងត្រួតពិនិត្យបទល្មើសជលផលរបស់ខណ្ទ័រដ្ឋបាលជលផលកំពតបានចេញល្បាតធ្វើការត្រួតពិនិត្យបទល្មើសនេសាទលើផ្ទៃសមុទ្របានចំនួន១៨ លើកសរុបស្មើរ ៥៤ ថ្ងៃ ដោយដកហូតឧបករណ៍នេសាទល្មើសច្បាប់ដូចជា លបវែងចំនួន១៤៥គ្រឿង អាំងវែទ័រឆក់ត្រីចំនួន០៧គ្រឿង និងអួនអូសឈិបយន្តចំនួន០៨ចូរ យកមកដុតកំទេចចោលនៅថ្ងៃនេះ ។
លោកនាយខណ្ឌបានបន្តថាៈ ខណ្ឌរដ្ឋបាលជលផលកំពុងតែអភិរក្សនៅស្មៅសមុទ្រ ផ្កាថ្ម ព្រៃកោងកាង ដែលមានទីតាំង៧កន្លែង ។ ជាមួយគ្នានេះដែរ លោក ស សូរិន បានបន្តផ្សព្វផ្សាយនូវច្បាប់ជលផលដល់អ្នកនេសាទ ព្រមទាំងផ្ដាំផ្ញើអោយប្រជាជនសហគមន៍និងអាជ្ញាធរដែនដីឲ្យចូលរួមផ្តល់ព័ត៌មានឲ្យមន្ត្រីជំនាញរាល់បទល្មើសនេសាទដែលកើតមានក្នុងដែនសមុទ្រ ៕
