ភ្នំពេញ៖ រថយន្តម៉ាកមែកសឺដែសមួយគ្រឿងបើកបរដោយបុរសជនជាតិចិនម្នាក់ ប្រហែលជាស្រវឹងស្រាហើយ បានជាបើករថយន្តហោះទៅលើរបាំងថ្មពុះចែកទ្រូងផ្លូវ បណ្ដាលឲ្យបាក់ និងរងការខូចខាត ហើយរថយន្តបង្កព្យាយាម បើករត់ ពីកន្លែងកើតហេតុប្រហែលជា៥០ម៉ែត្រទើប រថយន្តនេះឈប់ដោយសារតែបែកកង់ខាងមុខមិនអាចទៅមុខទៀតបាន កាលពីវេលាម៉ោង១២និង៤០នាទីយប់ថ្ងៃទី៣០ ខែមេសា ឆ្នាំ២០១៤ នៅចំណុចស្តុបសន្ធរម៉ុក តាមបណ្ដោយផ្លូវកម្ពុជាក្រោម កែងផ្លូវម៉ៅសេទុង ក្នុងសង្កាត់ទឹកល្អក់១ ខណ្ឌទួលគោក ។
យោង តាមប្រភពព័ត៌មានពីសំណាក់ប្រជាពលរដ្ឋ ដែលបានឃើញហេតុការណ៍ បានឲ្យដឹងថា មុនពេលកើតហេតុ គេបានឃើញរថយន្ត មួយគ្រឿង ម៉ាក មែកសឺដែស ពណ៌ សំបកឪឡឹក ពាក់លេខភ្នំពេញ 2B-3228 ដែលបើកបរដោយបុរសជនជាតិចិនម្នាក់ បានធ្វើដំណើរតាមបណ្ដោយផ្លូវកម្ពុជាក្រោម ក្នុងទិសដៅពីកើតទៅលិច ក្នុងល្បឿនលឿនហើយបើករេ
ពេញផ្លូវនោះ ក៏ជ្រុលចង្កូត ទៅបុកនិងរបាំងថ្មពុះចែកទ្រូងផ្លូវបណ្ដាឲ្យបាក់រងការខូចខាតមួយកង់ ហើយរថយន្តបង្កព្យាយាម បើករត់ ប្រហែលជា៥០ម៉ែត្រ តែរថយន្តបង្កនេះបានបែកកង់ខាងមុខដែលមិនអាចទៅមុខរួចទើបសមត្ថកិច្ចឃាត់បានតែម្តង ។
ក្រោយ ពេលកើតហេតុម្ចាស់រថយន្ត បានចុះពីលើរថយន្តគេចខ្លួនបាត់ ដោយបន្សល់រថយន្តនៅកន្លែងកើតហេតុ។ បច្ចុប្បន្នសមត្ថកិច្ចចុះវាស់វែងរថយន្តបង្កទៅរក្សាទុកនៅការិយាល័យចរាចរជើងគោកស្នងការដ្ឋាននគរបាលរាជធានីភ្នំពេញដើម្បីរង់ចាំធ្វើការដោះស្រាយតាមផ្លូវច្បាប់៕
