ខេត្តកំពង់ឆ្នាំង៖ « នៅពេលមាត់ធ្មេញ អញ្ចាញមានសុខភាពមិនល្អនោះ សុខភាពរាងកាយក៍ត្រូវប្រឈមនឹងគ្រោះថ្នាក់ដែរ មានជាអាទិ៍ ការធំក្លិនមាត់ រលាកបំពង់ករ ជម្ងឺក្រពះ ឬរហូតដល់មានបញ្ហាបេះដូងក៍មាន » លោក សាន់ យូ នាយកអង្គការមូលនិធិអភិវឌ្ឍន៍សហគ្រាសមូលធន បានថ្លែងបែបនេះ ក្នុងវគ្គប្រជុំផ្សព្វផ្សាយសុខភាពមាត់ធ្មេញ ក្រោមប្រធានបទស្តីពីសុខភាពមាត់ធ្មេញ និងការថែទាំ និងការចែកជូនថ្នាំនិងច្រាសដុសធ្មេញ ដែលឡើងនៅក្នុងសាលាបឋមសិក្សាសាលាលេខប្រាំ ដោយមានសិស្សានុសិស្សចូលរួមជិត១ពាន់នាក់ នៅព្រឹកថ្ងៃទី១៦ ខែកុម្ភៈ ឆ្នាំ២០១៦ ក្នុងស្រុកកំពង់ត្រឡាច គោលបំណងអោយសិស្សបានយល់ដឹងអំពីវិធីសាស្ត្រថែរក្សាអនាម័យ សុខភាពមាត់ធ្មេញ និងការដុសសំអាតធ្មេញ ព្រោះសិស្សានុសិស្សក្នុង វ័យនេះ ងាយនឹងទទួលរងនូវជម្ងឺមាត់ ជម្ងឺពុកធ្មេញ ដែលអាចប៉ះពាល់ដល់ការសិក្សា។
លោក សាន់ យូ នាយកអង្គការមូលនិធិអភិវឌ្ឍន៍សហគ្រាសមូលធនដែលជាអ្នកជួយឧបត្ថមច្រាស់ និងថ្នាំដុសធ្មេញបានថ្លែងបន្តថា៖ ក្មួយៗទាំងអស់ត្រូវដុសធ្មេញអោយបានញឹកញាប់ ក្នុង១ថ្ងៃអោយបានពី២ទៅ៣ដង ដើម្បីសំអាតកាកសំណល់ដែលនៅសល់កកតាមជើងធ្មេញ ក្រោយពេលបរិភោគចំណីអារហាររួច។បើក្មួយៗមានសុខភាពមាត់ធ្មេញល្អ នាំអោយមានសុខភាពទូទៅបានល្អ ជួយបង្កើនសោភ័ណភាពផ្ទៃមុខស្រស់ស្អាត។ម្យ៉ាងទៀតយើងត្រូវទៅជួបលោកគ្រូពេទ្យធ្មេញពីម្តងទៅ២ដងក្នុង១ឆ្នាំ ដើម្បីអោយគ្រូពេទ្យលាងសំអាតធ្មេញរបស់យើង និងដើម្បីធ្វើការត្រួតពិនិត្យក្រែងមានដង្កូវស៊ីឬបញ្ហាផ្សេងៗ ការធ្វើបានបែបនេះ ដើម្បីកុំអោយធ្មេញយើងមានបញ្ហាធ្ងន់ធ្ងរ ត្រូវចំណាយប្រាក់ច្រើននាំអោយខាតបង់សេដ្ឋកិច្ចគ្រួសារ និងខាតពេលវេលារៀនសូត្រទៀតផង។
លោក ឆៃ ឈាន ទន្តពេទ្យប្រចាំមន្ទីរសុខាភិបាលខេត្តបានណែនាំក្មួយៗជាសិស្សទាំងអស់ថា៖ ជាទូទៅជម្ងឺមាត់ធ្មេញដែលកើតជាញឹកញាប់មាន២ប្រភេទសំខាន់គឺ ជម្ងឺពុកធ្មេញ និងជម្ងឺរលាកអញ្ចាញធ្មេញ គឺបាក់តេរីមាននៅគ្រប់ទីកន្លែងទាំងអស់ សូម្បីតែនៅក្នុងមាត់ក៍មានដែរ ដូចនេះយើងគួរតែដុសធ្មេញ ដើម្បីសំលាប់ពពួកបាក់តេរី ឬវីរុសទាំងនោះ។
ក្រោយពីបង្ហាត់បង្ហាញពីរបៀបសំអាតធ្មេញរួចមក លោក ឆាយ ឈាន ក៍បានផ្តាំផ្ញើដល់អាណាព្យាបាលដែលមានកូនចៅទាំងអស់ ឧស្សាហ៍យកចិត្តទុកដាក់ចំពោះកូនចៅរបស់ខ្លួន កុំអោយបរិភោគចំណីអារហារមានរសជាតិផ្អែម ញឹកញាប់ពេក ដែលអាចបណ្តាលអោយមានបញ្ហាសុខភាពមាត់ធ្មេញ ដោយអាណាព្យាបាលគ្រប់រូបគួរចំណាយពេលវេលាចូលរួមក្នុងការដឹកនាំបង្ហាត់បង្ហាញអោយកូនតូចៗរបស់លោកអ្នក អោយមានទំលាប់ទៀងទាត់ល្អក្នុងការដុសសំអាតធ្មេញ និងចេះអំពីរបៀបដុសធ្មេញ ដើម្បីមានសុខភាពមាត់ធ្មេញល្អមិនប៉ះពាល់ដល់ការរៀនសូត្រ មិនខាតបង់ប្រាក់ក្នុងគ្រួសារ៕
