កំពង់ធំៈ អតីតយោធិនចំនួន២ រួមបានទទួលការចុះសួរសុខទុក្ខ កាលពីព្រឹកថ្ងៃទី ២៣ ខែកុម្ភះ ឆ្នាំ ២០១៦ពីសំណាក់ឯកឧត្តម ឧត្តមសេនីយ៍ សោម ស៊ុន ប្រធានសមាគមន៍អតីតយុទ្ធជនកម្ពុជា ខេត្តកំពង់ធំ ព្រមទាំងបានពាំនាំយកមកនូវអំណោយបន្តិចបន្តួចចែកជូនដល់ក្រុមគ្រួសារអតីតយុទ្ធជន ក្នុងឳកាសជួបសំណេះសំណាមិត្តចាស់ធ្លាប់រួមរស់ នឹងធ្វើសឹក សម័យសង្គ្រាមកន្លងមក ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិកាសឹករងកំពង់ធំ បានមានប្រសាសន៍ កោតសរសើរដល់អតីតយុទ្ធជន ចំនួន២រូបនេះ ខណៈពេលដែលផុតពីតួនាទីបំរើជាតិ មាតុភូមិហើយ ក៏បុគ្គលទាំង ២នាក់នេះមានឆន្ទះជាអ្នកស្រឡាញ់សន្តិភាព ស្រឡាញ់សន្តិសុខ បានសហការជាមួយនិងសមត្ថកិច្ច ប៉ុស្តិ៍ រដ្ឋបាល ដើម្បីស្ម័គ្រចិត្តជាប្រជាការពារបន្ត ដើម្បីសេចក្តីសុខរបស់ប្រជាពលរដ្ឋ ។ឯកឧត្តម ឧត្តមសេនីយ៍បាន បន្តថា ពីមុនពួកគាត់ធ្លាប់តែកាន់កាំភ្លើងចូលប្រយុទ្ឋក្នុងសមរភូមិដើម្បីការពារជាតិនិងប្រជាជន តែបច្ចុប្បន្នបានក្លាយជាប្រជាការពារ កាន់ដំបង រួមសហការណ៏ជាមួយនគរបាលប៉ុស្តិ៍រដ្ឋបាល ដើម្បីការពារសន្តិសុខ និងសុវត្ថិភាពជូនប្រជាពលរដ្ឋបន្តទៀត។
អតីតយុទ្ឋជនទាំងពីរនាក់១ ឈ្មោះជ័យ ចយ អាយុ៤៤ឆ្នាំ និងទី២ ឈ្មោះ ឆន ផល អាយុ៤២ឆ្នាំ រស់នៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ថ្វីត្បិតតែមានជម្ងឺប្រចាំកាយ ពួកគាត់ខំតស៊ូចិញ្ចឹមជីវិតដោយប្រកបមុខរបរជាកម្មករសំណង់ ព្រោះពួកគាត់មិនមានដីធ្លីសម្រាប់ធ្វើស្រែនិងបង្ករបង្កើនផលឡើយ។
ក្នុងឳកាសនៃការចុះសួរសុខទុក្ខ និងសំណេះសំណាល ផ្តល់កម្លាំងចិត្តផងព្រមទាំងបានផ្តល់ជូននូវគ្រឿងឧបភោគបរិភោគមួយចំនួន មាន អង្ករ១០០គីឡូក្រាម មី២កេស ទឹកត្រី២យួរ ទឹកស៊ីអ៊ីវ២យួរ រួមទាំងថវិកាចំនួន២០ម៉ឺនរៀលផងដែរ ក្នុងនោះដែរឯកឧត្តម ឧត្តមសេនីយ៍ត្រី សោម ស៊ុន បានផ្តាំផ្ញើរឲ្យមើលថែរកូន ចៅ ជម្រុញឲ្យកូនចៅបានចូលរៀន ឲ្យក្លាយជាមនុស្សល្អ ជាថ្នាក់ដឹកនាំល្អ និងជាគ្រួសារល្អ រស់នៅក្នុងសង្គម ជាពិសេសមើលថែសុខភាព ហូបស្អាត ផឹកស្អាត រស់នៅស្អាត ដើម្បីបញ្ច្រៀសនូវរោគភ័យនានា ។
ដោយ ប៊ុន រដ្ឋា
