កំពង់ធំៈ បទល្មើសដឹកជញ្ជូនឈើដោយខុសច្បាប់ របស់ឈ្មួញដុះស្លែរម្នាក់ ត្រូវបានលោក ចន្ទ័ មន្នីនាទ នាយសង្កាត់រដ្ឋបាលព្រៃឈើសណ្តាន់បង្ក្រាបទាំងទើសទាល់ ក្រោមការបញ្ជាផ្ទាល់ពីលោក ឃិន វណ្ណះ នាយរងផ្នែករដ្ឋបាលព្រៃឈើសណ្តាន់ កាលពីយប់វេលាម៉ោង ១១.៣០នាទីថ្ងៃទី ២៣ ខែកុម្ភះ ឆ្នាំ ២០១៦។
តាមប្រភពព័ត៌មាន ច្បាស់ការណ៍ បានបញ្ជាក់ថា បទល្មើសដឹកជញ្ជូនឈើដោយគ្មានច្បាប់អនុញ្ញាតិ បានធ្វើ សកម្មភាពជារៀងរាល់យប់ ដោយគ្មានការអើពើ និងបង្ក្រាបពីសំណាក់សមត្ថកិច្ចជំនាញនោះទេ ជាហេតុធ្វើ ឲ្យមានការសង្ស័យថា សមត្ថកិច្ចមេព្រៃ និងសមត្ថកិច្ចពាក់ព័ន្ឋ មួយចំនួនប្រហែលជាបានទទួលសំណែន ពីឈ្មួញឈ្មោះគ្រូប៊ី និងឈ្មួញឈើឯទៀត ទើបបានជាសកម្មភាពដឹកឈើដោយខុសច្បាប់ ចេញពីព្រៃឡង់ នៅតែធ្វើសកម្មភាពដោយគ្មានខ្លាចញញើតច្បាប់បន្តិចសោះឡើយ។
លោក ចន្ទ័ មន្នីនាទ នាយសង្កាត់រដ្ឋបាលព្រៃឈើសណ្តាន់ បានដឹកនាំកម្លាំងមន្ត្រីក្រោមឳវាទ ចុះឃាត់គោយន្តកន្ត្រៃចំនួន ២គ្រឿង ខណៈពេលដែលកំពុងតែដឹកជញ្ជូន នៅចំនុចផ្លូវចូលទៅក្រុមហ៊ុនCR CK ដែលជា ឈើប្រភេទលេខ២ កំពុងតែធ្វើដឹកទៅទំលាក់ទុកនៅស្រុកសណ្តាន់ តែត្រូវបានអ្នកសារព័ត៌មានជួបប្រទះ ទើបរាយការឲ្យសមត្ថកិច្ចជំនាញបង្ក្រាបតែម្តង។
ចំណែកអ្នកបើកបរ ពុំត្រូវបានទំលាយអត្តសញ្ញាណនោះទេ ដោយសារលោកបានអះអាងថា កាដឹកជញ្ជូនឈើនេះ លោកគ្រាន់តែស៊ីឈ្មួល ដឹកឈើចេញពីព្រៃឡង់ ឲ្យបុគ្គលម្នាក់ឈ្មោះ គ្រូប៊ី ដែលជាឈ្មួញរស់នៅ ស្រុកសណ្តាន់ ខេត្តកំពង់ធំ ចំណែកឈើ និងគោយន្តកន្ត្រៃត្រូវបាននាំយកទៅរក្សាទុក នៅសង្កាត់រដ្ឋបាល ព្រៃឈើសណ្តាន់ តាមការប៉ាន់ស្មានចំនួនឈើមាន៦ម៉ែត្រគូប ។
ដោយ ប៊ុន រដ្ឋា
