ខេត្តសៀមរាប៖បុរសប្រមឹកស្រាម្នាក់បានដើរអុកឡុកកន្លែងលក់ដូរនិងយកពូថៅដេញកាប់អ្នកភូមិបណ្តាលឱ្យជនរងគ្រោះរបួសធ្ងន់២នាក់(ម្នាក់មួយពូថៅចំលលាក្បាលបណ្តាលឱ្យរងរបួសធ្ងន់) ខណៈពេលនោះត្រូវបានកម្លាំងប្រជាការពារភូមិនិងកម្លាំងប៉ុស្តិ៍នគរបាលសង្កាត់សៀមរាបចាប់ឃាត់ខ្លួនភ្លាមៗរួច បញ្ជូនមកកាន់ការិយាល័យនគរបាលព្រហ្មទណ្ឌកំរិតធ្ងន់ខេត្ត ដើម្បីធ្វើការសួរនាំបន្ត។
ហេតុការណ៍ឃាត់ខ្លួនជនសង្ស័យខាងលើធ្វើឡើងនៅវេលាម៉ោង២២និង៣០នាទីថ្ងៃទី២៣ខែកុម្ភះឆ្នាំ២០១៦ ស្ថិតនៅភូមិពោធិ៍បន្ទាយជ័យ សង្កាត់សៀមរាប ក្រុងសៀមរាប ។ប្រភពពីសមត្ថកិច្ចនគរបាលប៉ុស្តិសង្កាត់សៀមរាបបានប្រាប់ឱ្យដឹងនៅថ្ងៃទី២៤ខែកុម្ភៈនេះថា៖ ដោយមានការសហការពីកម្លាំងប្រជាការពារភូមិពោធិ៍បន្ទាយជ័យថា មានក្មេងទំនើង ព្រមទាំងមានកាន់ពូថៅក្នុងដៃ រួចដើរអុកឡុកកន្លែងលក់ទឹកក្រឡុក របស់ជនរងគ្រោះឈ្មោះប៉ែន សារុំ ភេទស្រី អាយុ៤០ឆ្នាំ នឹងយកដុំថ្មគប់ ទៅលើរថយន្តអ្នកធ្វើដំណើរ ឆ្លងកាត់ ផ្លូវនោះ ទើបកម្លាំងប្រជាការពារបានទៅដល់កន្លែងកើតហេតុដើម្បីជួយទប់ស្កាត់នឹងរកឱកាសឃាត់ខ្លួនបុរសប្រមឹករូបនោះ ដើម្បីចាប់ប្រគល់ឱ្យនគរបាលប៉ុស្តិ៍សង្កាត់សៀមរាប តែពេលទៅដល់ភ្លាមបុរសនេះ បានដេញកាប់ជនរងគ្រោះ ពេលនោះជនរងគ្រោះបានរត់គេចខ្លួនតែបានជំពប់ជើងដួល ផ្កាប់មុខ ក៏ត្រូវបានជនសង្ស័យ កាប់មួយពូថៅចំកណ្តាលក្បាលពីក្រោយបណ្តាលឱ្យរងរបួសធ្ងន់។ រីឯ បុរសជាអ្នករត់រឺម៉កម៉ូតូម្នាក់ទៀតកំពុងហូបបង្អែម ងេកមកបំរ៉ុងរកជួយក៏ត្រូវបានជនប្រមឹកកាប់១ពូថៅចំថ្ងាស់ក្បាលពីមុខបណ្តាលឱ្យរងរបួសធ្ងន់ ក្រោយមកជនសង្ស័យ ត្រូវបានប្រជាការពារភូមិនឹងនគរបាលប៉ុស្តិ៍រដ្ឋបាលសង្កាត់សៀមរាប ធ្វើការឃាត់ខ្លួនបានភ្លាមៗ យកមកសាកសួរនៅប៉ុស្តិ។ចំណែកឯជនរងគ្រោះ ប្រុស ស្រីទាំង២នាក់ត្រូវបាន ក្រុមគ្រួសារដឹកបញ្ជូនយកទៅមន្ទីពេទ្យ ដើម្បីជួយសង្គ្រោះជាបន្ទាន់ផងដែរ ។
ប្រភពបានបន្តថា ជនសង្ស័យដែលស្រវឹងស្រាជោគជាំដេញកាប់គេនោះមានឈ្មោះ ភិន ផានិត ភេទប្រុសអាយុ២១ឆ្នាំរស់នៅភូមិពោធ៍បន្ទាយជ័យ សង្កាត់សៀមរាប ក្រុងសៀមរាប។ចំណែកជនរងគ្រោះប្រុស ស្រី ទាំង២នាក់មាន ទី១/ឈ្មោះ ប៉ែន សារុំ ភេទស្រីអាយុ៤០ឆ្នាំមុខរបរអ្នកលក់ទឹកក្រឡុកមានទីលំនៅភូមិកើតហេតុខាងលើ បង្កទៅលើស្ត្រីរងគ្រោះ១ពូថៅ ចំលលាក្បាល ពីក្រោយបណ្តាលរបួសធ្ងន់)ព្រមទាំងបំផ្លាញទ្រព្យសម្បត្តិរបស់ជនរងគ្រោះទៀតផង (ហិង្សាដោយចេតនាមានស្ថានទម្ងន់ទោសប្រព្រឹត្តនៅវេលាម៉ោង២២និង០០នាទីថ្ងៃទី២៣ខែកុម្ភៈ)និងទី២/ឈ្មោះ សំ ពិសិដ្ឋ ភេទប្រុសអាយុ៣២ឆ្នាំមុខរបររត់រឺម៉ករស់នៅភូមិជាមួយគ្នាត្រូវ១ពូថៅចំថ្ងាស់ក្បាលខាងមុខបណ្តាលឱ្យរបួសធ្ងន់ដូចគ្នា។ប្រភពបានបន្តថា បន្ទាប់ពីបានឃាត់ខ្លួនបុរសប្រមឹកស្រាម្នាក់ដែលដេញកាប់គេពេញភូមិ រួចមក កម្លាំងនគរបាលប៉ុស្តិសង្កាត់សៀមរាបក៏បានធ្វើការបញ្ជូនទៅការិយាល័យព្រហ្មទណ្ឌកំរិតធ្ងន់ខេត្តដើម្បីធ្វើការសាកសួរ។
ប្រភពបានបន្ថែមទៀតថា៖ បច្ចុប្បន្នជនសង្ស័យនឹងវត្ថុតាងត្រូវបានកម្លាំងជំនាញរបស់ការិយាល័យនគរបាលព្រហ្មទណ្ឌកំរិតធ្ងន់ខេត្ត រៀបចំកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីនៃច្បាប់ ៕ដោយ ច័ន្ទ រស្មី
