ភ្នំពេញ៖ លោក អ៊ាង សុីផាន អភិបាល ខណ្ឌច្បារអំពៅ បានដឹកនាំមន្ត្រីរាជការ ជុំវិញសាលាខណ្ឌ កងកម្លាំង ប្រដាប់អាវុធ សិស្សានុសិស្ស សហភាពសហព័ន្ឋ យុវជនខណ្ឌ និងប្រជាពលរដ្ឋ បានដើររើសសំរាម នៅជុំវិញផ្សារច្បារអំពៅ ផ្សារបន្លែ តាមផ្លូវ៣៦៩ និងតាមដងផ្លូវជាតិលេខ១ ចាប់ពីគល់ស្ពានមុនី វង្ស រហូតដល់ព្រំប្រទល់សង្កាត់វាលស្បូវ ភូមិក្តីតាកុយ ដើម្បី អបអរសាទរ ទិវាជាតិទីក្រុងស្អាត ហើយក៏ជាសកម្មភាព មួយឲ្យប្រជាពលរដ្ឋ និងអាជីវករ បានយល់ពីសារៈសំខាន់ នៃទីក្រុងស្អាត និងបានចូលរួមផងដែរ ។
ពិធីនេះធ្វើឡើង កាលពីព្រឹកថ្ងៃទី២៦ ខែកុម្ភៈ ឆ្នាំ២០១៦ ស្ថិតនៅទីធ្លាមុខផ្សារ ច្បារអំពៅ ។ លោក អ៊ាង សុីផាន អភិបាលខណ្ឌច្បារអំពៅ បានមានប្រសាសន៍ថា ចង់អោយ ទីក្រុងយើងស្អាត ខណ្ឌ សង្កាត់ និងផ្សារយើងមាន បរិស្ថានល្អស្អាត ប្រកបដោយសុខមាលភាព ល្អ យើងត្រូវរៀបចំផែនការ អោយជាក់លាក់ ដើម្បីទាញ យកការចូលរួមសំអាតផ្សារ ក៏ដូចជាគ្រប់កន្លែង ពីគ្រប់មជ្ឈដ្ឋាន ពិសេសត្រូវមានការចូលរួមពីអាជីវករ ពីប្រជាពលរដ្ឋគ្រប់ៗរូប ។ លោកបន្តថា តាមរយ:ព្រឹត្តិ ការណ៍នេះ ពិតជាការចូលរួម ចំណែកបន្ថែមទៀត ក្នុងការស្វែងរកកាលានុវត្តភាពថ្មីៗ សម្រាប់ពង្រឹងនិងពង្រីកកិច្ចសហប្រតិបត្តិការក្នុងវិស័យទេសចរណ៍ ពិសេសនាំមកនូវការផ្សព្វផ្សាយអំពីសក្កានុពលអំពីទេសចររបស់ព្រះរាជាណាចក្រកម្ពុជា ឲ្យកាន់តែទូលំទូលាយទៅកាន់បណ្តាប្រទេស តំបន់អាស៊ាន និងពិភពលោក។
លោកអភិបាលខណ្ឌបន្តថា បើទីក្រុងស្អាត មូលដ្ឋានរបស់យើងតាមបណ្តាសង្កាត់ តាមផ្សារ ក៏ត្រូវស្អាត ប្រជាពលរដ្ឋក៏មានសុខភាពទៅតាមនោះដែរ ។ លោកក៏បានណែនាំអោយអាជ្ញាធរ សង្កាត់ទាំង៨ ត្រូវចុះផ្សព្វ ផ្សាយដល់ប្រជាពលរដ្ឋ ដើម្បីចូលរួមសំអាតអនាម័យក្នុងមូលដ្ឋាន ដើម្បីអបអរទិវា ជាតិទីក្រុងស្អាត លើកទី៤ ក្រោមប្រធានបទ “ទីក្រុងខ្ញុំស្អាត សុខសុវត្ថិភាពល្អ ទេសចរណ៍មានកំណើន” ។
លោកអភិបាលខណ្ឌបន្តថា ការប្រារព្ធទិវាជាតិទីក្រុងស្អាតនាពេលនេះ គឺជាព្រឹត្តិការណ៍ដ៏មានសារៈសំខាន់ ដែលបានឆ្លុះបញ្ចាំងឲ្យឃើញពីកិច្ចខិតខំប្រឹងប្រែងរួមគ្នា ពីគ្រប់ភាគីពាក់ព័ន្ធ អាចចូលរួមដល់កិច្ចការពារបរិស្ថាននិងសង្គម ដើម្បីរួមចំណែកលើកកម្ពស់សោភ័ណភាពរាជធានីភ្នំពេញ ។
លោក អ៊ាង សុីផាន បានលើកឡើងទៀតថា តាមរយៈការប្រារព្ធទិវាជាតិ ទីក្រុងស្អាតនាពេលនេះ នឹងនាំមកនូវការផ្សព្វផ្សាយកាន់តែទូលំទូលាយ អំពីសក្តានុពលទេសចរប្រទេសកម្ពុជា ទៅបណ្តាប្រទេសក្នុងតំបន់និងពិភពលោក ហើយព្រឹត្តិការណ៍នឹងជំរុញការប្រឡងប្រណាំងទីក្រុងស្អាតនៅទូទាំងប្រទេស កាន់តែមានភាពសកម្មខ្លាំងខ្លា និងរស់រវើក ក្នុងបុព្វហេតុរួមចំណែកជំរុញការអភិវឌ្ឍន៍សេដ្ឋកិច្ចបៃតង ជំរុញមជ្ឈដ្ឋានការរស់នៅឲ្យកាន់តែល្អប្រសើរ ផ្តល់ភាពកក់ក្តៅសុខមាលភាពរស់នៅ តាមបណ្តា ក្រុង ខេត្ត ស្រុក ខណ្ឌ នៃព្រះរាជាណាចក្រកម្ពុជា ។ នាឱកាសនេះលោកអភិបាល ក៏បានសូមសុំណូមពរដល់បងប្អូនប្រជាពលរដ្ឋដែលធ្វើដំណើតាមផ្លូវជាតិលេខ១មេតាយោកយល់ព្រោះផ្លូវកុំពុងតែស្ថាបនា។
