ភ្នំពេញ ៖ សាកសពបុរសជនជាតិស្បែកខ្មៅម្នាក់ត្រូវបានគេប្រទះឃើញដេកស្លាប់នៅវាល់ដីខ្សាច់មួយកន្លែង ស្ថិតតាមបណ្តោយផ្លូវ៦០ម៉ែត្រ កាលពីវេលាម៉ោង២០ និង១០នាទីយប់ ថ្ងៃទី២៥ ខែកុម្ភៈ ឆ្នាំ២០១៦ ស្ថិតក្នុងភូមិព្រែកតាយួរ សង្កាត់ចាក់អង្រែលើ ខណ្ឌមានជ័យ ដោយនៅលើក្បាលរបស់ជនរងគ្រោះមានស្លាកស្នាមរបួសដូចជាត្រូវវាយ ។
យោងតាមប្រភពព័ត៌មាន ពីប្រជាពលរដ្ឋនៅម្តុំនោះ បាននិយាយប្រាប់អោយដឹងថា គាត់បានប្រទះឃើញសាកសពបុរសម្នាក់ដែលបានដេកស្លាប់ឡើងធំក្លិនស្អុយទៅហើយ នៅវាល់ដីខ្សាច់មួយកន្លែង ក្បែរបណ្តោយផ្លូវ៦០ម៉ែត្រ ។ ចំពោះសពជនរងគ្រោះមិនត្រូវបានស្គាល់អត្តសញ្ញាណទេ គ្រាន់តែមានភិនភាគរបស់សាកសពនេះគឺជាជនជាតិស្បែកខ្មៅ ដោយគេពាក់អាវយឺតដៃខ្លីពណ៌ក្រហម ស្លៀខោក្រឡាជើងខ្លី មានអាយុប្រមាណជាង ៣០ឆ្នាំ ។ ក្រោយកើតហេតុសមត្ថកិច្ចជំនាញបានចុះទៅត្រួតពិនិត្យតដល់កន្លែងកើតហេតុ ។ សមត្ថកិច្ចបានឲ្យដឹងថា ជំហានដំបូងមន្ត្រីជំនាញមិនទាន់ហ៊ានសន្និដ្ឋាន ច្បាស់លាស់នៅឡើយទេ គ្រាន់តែអះអាងថា ជនរងគ្រោះអាចស្លាប់ដោយសារឃាតកម្ម ព្រោះសាកសព ស្នាមត្រូវគេវាយចំក្បាលផងដែរ ។ បច្ចុប្បន្នសមត្ថកិច្ចជំនាញកំពុងធ្វើកោសល្យវិច័យសព ដើម្បីឲ្យដឹងពីមូលហេតុ និងភិនភាគជនរងគ្រោះច្បាស់ ៕
