ខេត្តសៀមរាប៖ អគ្គីភ័យបានឆាបឆេះ ភោជនីយដ្ឋានកូរ៉េ ដែលមានយីហោ ហ្គាយ៉ា តាមបណ្តោយផ្លូវជាតិលេខ៦ ពីខាងលិច ស្តុបគោកធ្លក បានធ្វើឱ្យមានការភ្ញាក់ផ្អើលពេញក្រុងសៀមរាបនិង មានការកកស្ទះចរាចរពេញផ្លូវមួយសន្ទុះ ផងដែរ ប៉ុន្តែពុំបណ្តាលឱ្យមាននរណាម្នាក់រងរបួសក្នុងហេតុការនោះទេ គឺបណ្តាលមកពីម្ចាស់ហាងបានជួលជាងជួសជុលឱ្យមកផ្សាដំបូលផ្ទះ ខណៈពេលនោះជាង បានប្រុងប្រយ័ត្ន ទើបធ្វើឱ្យកម្ទេចផ្កាភ្លើង ធ្លាក់មកក្រោមឆេះបាដាន ហើយបានរាលធ្លាក់មកឆេះពូកនៅក្នុងបន្ទប់ ខាងក្រោម កន្លែងដែលជាង កំពុងធ្វើការផ្សារជួសជុលដំបូលនោះ ។
ហេតុការណ៍ដែលបង្កឱ្យកើតមានអគ្គីភ័យនេះឡើងនៅវេលាម៉ោង ១៣និង៤០នាទី ថ្ងៃទី២៧ កុម្ភះ ឆ្នាំ២០១៦ ស្ថិតនៅក្រុមទី១០ ភូមិគ្រួស សង្កាត់ស្វាយដង្គំ ក្រុង/ខេត្តសៀមរាប ប្រភពពីបុគ្គលិកបម្រើការនៅក្នុងភោជនីយដ្ឋាន ហ្គាយ៉ានេះបានឱ្យដឹងថា នៅពេលដែលកើតហេតុនេះឡើង ពួកបុគ្គលិកបានឭក្រុមជាងផ្សាជួសជុលដំបូល ស្រែកឱ្យជួយពន្លត់ភ្លើងផង ព្រោះភ្លើងឆេះនៅក្នុងបន្ទប់ហើយ តែភ្លាមៗនោះ ក្រុមបុគ្គលិកដែលមានតែស្រីៗ ពុំមានលទ្ធភាពក្នុងការចូលទៅពន្លត់ភ្លើងនោះ ហើយក្រុមជាងនៅខាងលើដំបូលឯណោះ ក៏បានចុះមកធ្វើការពន្លត់ តែដោយស្ថានភាពភ្លើងឆេះខ្លាំងនោះ ធ្វើឱ្យក្រុមជាងទាំងនោះ បាននាំគ្នារត់គេចខ្លួនបាត់ស្រមោលតែម្តងទៅ ។
ក្នុងនោះដែរក៏ត្រូវបានអ្នកជិតខាង បានទូរស័ព្ទទៅកាន់កម្លាំងសមត្ថកិច្ច ពន្លត់អគ្គីភ័យរបស់ស្នងការនគរបាលខេត្ត និង កងរាជអាវុធហត្ថខេត្ត ចុះមកជួយអន្តរាគមន៍បានទាន់ពេលវេលា ផងដែរលោកវរសេនីយឯក សំ សុជាតិ ស្នងការរងទទួលអាវុធជាតិផ្ទុះនិងអគ្គិភ័យបានប្រាប់កោះសន្តិភាពឱ្យដឹងនៅវេលាម៉ោង៦ល្ងាចថ្ងៃទី២៧ខែកុម្ភៈឆ្នាំ២០១៦នេះថា នេះជាការធ្វេសប្រហែសរបស់ក្រុមជាងផ្សាដំបូល ដោយបានដឹងថា នៅពីក្រោមមានពិដានម្នាងសិលា និង បន្ទប់ដេក ដែលជាភាពងាយឆេះបំផុត ជាមួយនឹងកម្ទេចភ្លើងធូក ផ្សាដែក ហើយដោយរដូវនេះមានអាកាសធាតុក្តៅស្ងួត ដែលងាយបង្កឱ្យមានគ្រោះអគ្គីភ័យកើតឡើង ផង។ លោកបានបន្តឱ្យដឹងថា ម្ចាស់ភោជនីយដ្ឋាន ហ្គាយ៉ា មានឈ្មោះ JUNG MIK YUNG ស្រី អាយុ៤៦ឆ្នាំ ដែលជាអ្នកគ្រប់គ្រងហាងនេះ ត្រូវអគ្គីភ័យឆាបឆេះអស់ប្រមាណ ១០%តែប៉ុណ្ណោះ ដោយមានការចុះជួយអន្តរាគមន៍របស់សមត្ថកិច្ចពន្លត់អគ្គីភ័យ ទាំងពីរអង្គភាព បាន ជួយ ទាន់ពេលវេលា ដោយប្រើប្រាស់ រថយន្តអស់ចំនួន៤ឡាន ក្នុងនោះមានរថយន្តពន្លត់អគ្គីភ័យកងរាជអាវុធហត្តខេត្ត ០២គ្រឿង និងរថយន្តរបស់ស្នងការនគរបាលខេត្ត ចំនួន០២គ្រឿង ប្រើទឹកអស់ ចំនួន ៤ ឡាន ទើបអាចទប់ស្ថានភាពពន្លត់បានជាស្ថាបពរនៅវេលាម៉ោង១៤និង៤០នាទី។ លោកបានបញ្ជាក់ថា ការខូចខាតទ្រព្យសម្បត្តិមានបន្ទប់ទំហំ ៤មX៤ម ខូចខាតទាំងស្រុង និងទ្រព្យសម្បត្តិដែលឆេះ ដូចជា ៖ពូកឆេះអស់២, ទូឈើ បញ្ឈរ ចំនួន ២ ,ទូក្រណាត់ចំនួន៥ ,ខោអាវអស់មួយចំនួនធំ ,សៀវភៅមួយចំនួន ,ម៉ាស៊ីនត្រជាក់អស់២ ៕
ដោយ ច័ន្ទ រស្មី
