កំពង់ធំៈ ឯកឧត្តម ឧត្តមសេនីយ៍ត្រី បន្តការចុះសួរសុខទុក្ខ ក្រុមគ្រួសារអតីតយុទ្ធជន ដែលរស់នៅក្នុងមូលដ្ឋានក្រុងស្ទឹងសែន ខេត្តកំពង់ធំ ជួបនូវវិបិត្តសេដ្ឋកិច្ចគ្រួសារ និងបានពាំនាំនូវអំណោយ សម្រាប់ជួយដល់គ្រួសារអតីតយុទ្ធជន ដែលកំពុងតែជួបនូវការខ្វះខាត នៅរសៀលថ្ងៃទី ២៨ ខែកុម្ភះ ឆ្នាំ ២០១៦ ។
ឧត្តមសេនីយ៍ត្រី សោម ស៊ុន ប្រធានសមាគមអតីតយុទ្ឋជនកម្ពុជា ខេត្តកំពង់ធំ និងសហការី រួម ជាមួយលោកសៀង ហុកឃាន់ អនុប្រធានសមាគមអតីតយុទ្ឋជនកម្ពុជា ក្រុងស្ទឹងសែន បានចុះសាកសួរសុខទុក្ខអតីតយុទ្ឋជន ឈ្មោះ ចាន់ សុខ អាយុ៤៨ឆ្នាំ នៅភូមិបល្ល័ង្គ សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ និងបានផ្តល់នូវអំណោយ សម្រាប់ដោះស្រាយជីវភាព មានអង្ករ៧៥ គីឡូក្រាម មីមួយកេស ទឹកត្រីមួយយួរ ទឹកស៊ីអ៊ីវមួយយួរ ប៊ីចេង ពីរកញ្ចប់ និងថវិកាចំនួន100.000រៀល។
ក្រុមគ្រួសារអតីតយុទ្ធជន ឈ្មោះចាន់ សុខ និងភរិយា បានចិញ្ចឹមចៅបួននាក់ដែល នៅក្នុងបន្ទុកបន្ថែមទៀត បច្ចុប្បន្នបានសាងសង់ខ្ទមរស់នៅ លើដីចំណីស្ទឹងសែន ដែលត្រូវបានជួលពីគេក្នុងមួយខែ10$ (គ្មានដីគ្មានផ្ទះផ្ទាល់ខ្លួន) ជីវភាពជួបនូវការខ្វះខាត ទិញអង្ករក្នុងមួយថ្ងៃមួយគីឡូក្រាមកន្លះ និងអាហារផ្សេងៗប្រចាំថ្ងៃ គាត់មានប្រាក់ខែដែលរាជរដ្ឋាភិបាលផ្តល់ជូនក្នុងមួយខែ450.000រៀលដែរ តែត្រូវចំណាយគ្រប់យ៉ាងទាំងទឹកដោះគោឲ្យចៅផង ថ្នាំសង្កូវព្យាបាលជម្ងឺក្នុងគ្រួសារផង និងត្រូវដោះស្រាយបំណុលដែលចំពាក់គេរុំកោះបន្ថែមទៀត ។
ដោយ ប៊ុន រដ្ឋា
