ខេត្តបន្ទាយមានជ័យៈក្រុមប្រឹក្សាភិបាល គណៈដឹកនាំគ្រប់គ្រងសាកលវិទ្យាល័យ ភុនចាប ប្រទេសប៉ាគីស្ថាន បានប្រគល់ជាផ្លូវការ នូវសញ្ញាប័ត្របណ្ឌិតកិត្តិយស ជូនឯកឧត្តម អ៊ុង អឿន ប្រធានក្រុមប្រឹក្សាខេត្ត និងជាប្រធានគណៈបក្សប្រជាជនកម្ពុជា ខេត្តបន្ទាយមានជ័យ និងដល់ព្រះសង្ឃ ដល់មន្ត្រី និងបេក្ខជនជ័យលាភី ជនជាតិកម្ពុជា និងថៃចំនួន៣០នាក់ ។
ពិធីនេះធ្វើឡើងនៅក្នុងសណ្ឋាគារព្រហ្មបាយ័ន នាក្រុង/ខេត្តសៀមរាប កាលពីល្ងាចថ្ងៃទី២៧ ខែកុម្ភៈ ឆ្នាំ២០១៦ ដោយមានលោកជំទាវ នួម សុភ័ណ្ឌ អ្នកតំណាងរាស្ត្រ ឯកឧត្តម គោស៊ុំ សារឿត លោកអភិបាលរង លោក លោកស្រី សមាជិកក្រុមប្រឹក្សាខេត្ត ប្រធានមន្ទីរអង្គភាព ភ្ញៀវជាតិ អន្តរជាតិ ជាច្រើននាក់ចូលរួម។
លោកបណ្ឌិតសាស្ត្រាចារ្យ រ៉ាចា វ៉ាហ៊ីត សាកលវិទ្យាធិការ នៃសាកលវិទ្យាល័យ ភុនចាប បានថ្លែងថា សាកលវិទ្យាល័យនេះ មានសាខាជាង៤០កន្លែង ក្នុងពិភពលោក និងបានបង្កើតកម្មវិធីសិក្សាពីចម្ងាយ ហើយផ្តល់ឱកាស ដល់អ្នកគ្មានពេលវេលាគ្រប់គ្រាន់ តែចង់សិក្សាអាចរៀនបានដោយងាយស្រួល ។
លោកបណ្ឌិតបានបន្តថា សាកលវិទ្យាល័យបានទទួលប្រវត្តិរូប ទទួលការចុះឈ្មោះសិក្សា និងវាយតម្លៃ លើលទ្ធផលនៃការសិក្សាពីការងារ ដែលបេក្ខជននានាបានធ្វើ ហើយសម្រេចសម្រាំង និងចម្រាញ់ជម្រើសអ្នកមានចំណេះជំនាញ បទពិសោធន៍ មានសមត្ថភាព អនុវត្តជាក់ស្តែង អ្នកពូកែប៉ិនប្រសព្វទាំងឡាយ ក្នុងពិភពលោក ហើយផ្តល់ជាម្ចាស់ជ័យលាភី ។
ឯកឧត្តម អ៊ុង អឿន បាននិយាយថា លោកបានបម្រើការងាររដ្ឋ៤១ឆ្នាំ ហើយចូលនិវត្តន៍នៅឆ្នាំ២០១៣ ។ បន្តពីនោះឯកឧត្តម ទទួលការតែងតាំងជាទីប្រឹក្សារាជរដ្ឋាភិបាល រួចបន្ទាប់មក ក៏ជាប់ឆ្នោតជាប្រធានក្រុបប្រឹក្សាខេត្ត ក្នុងអណត្តិទី២ កាលពីចុងឆ្នាំ២០១៣កន្លងមក ។ ដំបូងឯកឧត្តម បានចូលបម្រើកងទ័ព នៅឆ្នាំ១៩៧៨ដល់១៩៩៩ ចុងក្រោយជាឧត្តមសេនីយ៍ឯក ។ រីឯក្នុងការងាររដ្ឋបាល ឯកឧត្តមធ្លាប់ជាអភិបាលរងខេត្តសៀមរាប(ខែឧសភាឆ្នាំ២០០០-២០០៨),ជាអភិបាលខេត្តបន្ទាយមានជ័យ(ខែឧសភាឆ្នាំ២០០៨-២០១៣),ជាទីប្រឹក្សាសម្តេចនាយករដ្ឋមន្ត្រីហ៊ុន សែន(២០០៣-២០១៣)ផងដែរ។
ឯកឧត្តម អ៊ុង អឿន មានប្រសាសន៍បន្តថា ក្នុងមុខនាទី ភារកិច្ច ករណីយកិច្ច និងការទទួលខុសត្រូវដែលរដ្ឋាភិបាល និងប្រជាជនប្រគល់ជូន ឯកឧត្តមបានខិតខំយកចិត្តទុកដាក់ ទាំងកម្លាំងកាយ ចិត្ត ប្រាជ្ញា ស្មារតី និងលះបង់ទ្រព្យសម្បត្តិផ្ទាល់ជាច្រើន ដើម្បីរួមចំណែកកសាងមូលដ្ឋាននិងជាតិ ។
ក្រោយចប់សង្គ្រាម និងចូលរួមចំណែកអនុវត្តគោលនយោបាយ របស់រាជរដ្ឋាភិបាល ឯកឧត្តមក៏បានផ្តោតលើការងារអប់រំបណ្តុះបណ្តាល,កសាងធនធានមនុស្ស,ជម្រុញលើកទឹកចិត្ត អ្នកសិក្សារៀនសូត្រ,ដោះស្រាយបញ្ហាទុក្ខកង្វល់ ផ្តល់សេវារដ្ឋបាល សេវាសាធារណៈដល់ប្រជាជន,ដឹកនាំ អនុវត្តនិងជម្រុញអភិវឌ្ឍន័លើគ្រប់វិស័យ រួមចំណែកកាត់បម្ថយភាពក្រីក្រ និងបង្កើនកំណើនសេដ្ឋកិច្ច ។
សូមបញ្ជាក់ថា យោងតាមក្រុមប្រឹក្សាសាកលវិទ្យាល័យ ភុនចាប បានវាយតម្លៃនិងផ្តល់ជូនជ័យលាភី ជាមន្ត្រីរដ្ឋាភិបាល ព្រះសង្ឃ អ្នកបម្រើការសង្គមស៊ីវិល អ្នកជំនួញ អ្នកសិក្សារៀនសូត្រ ប្រមាណ៣០នាក់ មកពីប្រទេសកម្ពុជា និងថៃ ខាងលើនេះ គឺបណ្ឌិតនិងថ្នាក់បន្ទាប់នូវលើផ្នែកទស្សន:វីជ្ជា នៃរដ្ឋាបាល នយោបាយ វប្បធម៍ សាសនា សន្តិភាព អប់រំ (Doctoral Degree in Philosophy of Administration ,Politics,Culture,Religion,and Peace Education) ។ ក្នុងនោះឯកឧត្តម អ៊ុង អឿន ត្រូវទទួលបានបណ្ឌិតកិត្តយស ផ្នែកទស្សនវិជ្ជា នៃរដ្ឋបាលនិងនយោបាយ ៕
