មណ្ឌលគិរី៖យុវជនឈាមរាវម្នាក់ ដោយសារតោះសម្តីជាមួយម្តាយបង្កើតរបស់ខ្លួន បានដុតផ្ទះព្រមទាំងវាយតប់ម្តាយរបស់ខ្លួន ហេតុការណ៍នេះកើតឡើងនៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី វេលាម៉ោង១៥នឹង៥នាទីថ្ងៃ១ខែមិនាឆ្នាំនេះ ។
បើតាមសមត្ថកិច្ចនៅកន្លែងកើតហេតុបានឲ្យដឹងថា ស្ត្រីជាម្តាយឈ្មោះ ទ្រី ណារ៉ន អាយុ៤១ឆ្នាំ ជាជនជាតិខ្មែរ មានស្រុកកំភូមិពោធិទង ឃុំពោធិទង ស្រុកកញ្ច្រៀច ខេត្តព្រៃវែង ដែលបច្ចុប្បន្នបានស្នាក់នៅក្នុងភូមិឃុំកើតហេតុខាងលើ បានឈ្លោះប្រកែកជាមួយកូនប្រុសឈ្មោះ សួន បញ្ញា អាយុ២២ឆ្នាំជនជាតិខ្មែរ បន្ទាប់មកកូនប្រុសនោះក៏បានវាយម្តាយ ហើយថែមទាំងបានដុតផ្ទះដែលខ្លួនធ្លាប់រស់នៅឆេះអស់គ្មានសល សូម្បីសំភារៈនៅក្នុងផ្ទះក៏ឆេះអស់ដែរ។
សមត្ថកិច្ចបានឲ្យដឹងបន្តទៀតថា ផ្ទះដែលយុជនឈាមរាវដុតបំផ្លាញគ្មានសលមានទំហំទទឹង៤,៥ម៉ែត្រ បណ្តោយចំនួន១២ម៉ែត្រ ដំបូលប្រក់ស័ង្កសី រីឯយុវជនឈាមរាវក្រោយពីបានដុតបំផ្លាញផ្ទះរបស់ម្តាយរួចក៏បានរត់គេចខ្លួនបាត់៕ ដោយ ប៊ូស្រា
