ភ្នំពេញ៖យុវជនម្នាក់បានជិះម៉ូតូក្នុងល្បឿនយ៉ាងលឿនជ្រុលទៅបុកម៉ូតូមួយគ្រឿងទៀត ដែលជិះដោយបុរសអ្នករត់ម៉ូតូឌុកម្នាក់ចំពីក្រោយពេញទំហឹង បណ្ដាលឲ្យរងរបួសធ្ងន់ម្នាកនិងស្រាលម្នាក់។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង
២១និង២០នាទីយប់ ថ្ងៃទី២ ខែមីនា ឆ្នាំ២០១៦ នៅចំណុចក្បែរមីលីនែរ ថោន តាមបណ្ដោយផ្លូវជាតិលេខ៦A ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ។
បើតាមសាក្សីដែលឃើញហេតុការណ៍ខាងលើនេះបានប្រាប់ឲ្យដឹងថា នៅមុនពេលកើតហេតុគេឃើញយុវជនម្នាក់ជិះម៉ូតូបង្កម៉ាកស៊ុយសុគីឡេត ពណ៌ស ពាក់ស្លាកលេខភ្នំពេញ1FK.5178 ធ្វើដំណើរតាមបណ្ដោយផ្លូវជាតិលេខ៦A ទិសដៅពីត្បួងទៅជើង ក្នុងល្បឿនយ៉ាងលឿន ខណះមកដល់ចំណុចកើតហេតុក៏បានជ្រុលទៅបុកម៉ូតូរងគ្រោះម៉ាកហង់ដាឌ្រីមស៊េរី២០០១ ពណ៌ខ្មៅឆ្នូតលឿង ពាក់ស្លាកលេខ ឍ7556 ភព1 ដែលជិះដោយបុរសអ្នករត់ម៉ូតូឌុបម្នាក់ ចំពីក្រោយពេញទំហឹងបណ្ដាលឲ្យយុវជនជិះម៉ូតូបង្កម៉ាកឡេត រងរបួសធ្ងន់ ចំណែកឯបុរសជិះម៉ូតូរងគ្រោះ ដែលត្រូវបុកពីក្រោយនោះបានរងរបួសស្រាល។
ក្រោយពេលកើតហេតុ យុវជនដែលជិះម៉ូតូបង្កហេតុហើយរងរបួសធ្ងន់នោះ ត្រូវបានរថយន្តសាមុយដឹកយកទៅសង្គ្រោះនៅមន្ទីពេទ្យភ្លាមៗ រីឯបុរសជិះម៉ូតូរងគ្រោះ ដែលរបួសស្រាលនោះ ត្រូវបានសាច់ញាតិដឹកយកទៅលាងរបួសនៅមន្ទីពេទ្យឯកជនក្បែរកន្លែងកើតហេតុ។ ក្រោយមកសមត្ថកិច្ចជំនាញចុះធ្វើការវាស់វែង រួចយកម៉ូតូទាំងពីរគ្រឿងនោះ ទៅរក្សាទុកនៅអធិការនគរបាលដ្ឋានខណ្ឌជ្រោយចង្វារ រងចាំដោះស្រាយតាមក្រោយ៕ដោយៈជីម ភារ៉ា
