មណ្ឌលគិរី៖ សភាពការណ៍សន្តិសុខ បទល្មើស និងសណ្តាប់ធ្នាប់សាធារណៈក្នុងខេត្តមណ្ឌលគិរី ឆ្នាំ២០១៥នាពេលកន្លងមកនេះ បទល្មើសព្រហ្មទណ្ឌបានកើតឡើងចំនួន៣២ករណី បើប្រៀបធៀបទៅនឹងឆ្នាំ២០១៤ មានការកើនឡើងចំនួន០៧ករណី ស្មើនឹង៨២ភាគរយ ក្នុងនោះបទឧក្រិដ្ឋចំនួន១១លើក បណ្តាលឲ្យមនុស្សស្លាប់ចំនួន៥នាក់ របួសចំនួន៣នឹងរងគ្រោះចំនួន៣នាក់ ចំណែកបទល្មើសមជ្ឈឹមកើតឡើងចំនួន២១លើក បណ្តាលឲ្យរងរបួសមនុស្សចំនួន៨នាក់ បាត់បងថវិកានឹងសំភារៈមួយចំនួនផងដែរ នេះបើតាមប្រសាសន៍របស់លោកឧត្តមសេនីយ៍ត្រី តូច យ៉ុន ស្នងការនគរបាលខេត្តមណ្ឌលគិរី នៅព្រឹកថ្ងៃទី០២ខែមិនាឆ្នាំនេះ។
លោកឧត្តមសេនីយ៍ត្រីបានឲ្យដឹងទៀតថា ក្នុងកិច្ចប្រតិបត្តិការបង្ក្រាប កម្លាំង នៃស្នងការដ្ឋានខេត្តមណ្ឌលគិរី បានចុះបង្ក្រាបចំនួន៣០ករណី ស្មើនឹង៩៣ភាគរយ (ស្ទើតែទាំងស្រុង)ដោយ
ឃាត់បានខ្លួនជនសង្ស័យចំនួន៥៨នាក់ ក្នុងនោះស្លាប់ចំនួន១នាក់ របួសធ្ងន់ចំនួន១នាក់នឹងរឹបអូសវត្ថុតាងបានមួយចំនួន ព្រមទាំងបានកសាងសំណុំរឿងបញ្ជូនទៅតុលាការ។ រីឯគ្រោះថ្នាក់ចរាចរនៅទូទាំខេត្តមណ្ឌលគិរី មានចំនួន៥៦លើក បើប្រៀបធៀបទៅនឹងឆ្នាំ២០១៤មានចំនួនស្មើគ្នា ដែលបណ្តាលឲ្យមនុស្សស្លាប់ចំនួន១៣នាក់ រងរបួសធ្ងន់ចំនួន៥៦នាក់ រងរបួសស្រាលចំនួន២៥នាក់ ព្រមទាំងបណ្តាលឲ្យខូចយានយន្ត នឹងសំភារៈប្រើប្រាស់មួយចំនួនផងដែរ ។
ពាក់ព័ន្ធទៅនឹងសភាពការណ៍នៅតាមខ្សែបន្ទាត់ព្រំដែន ដែលមានខេត្តចំនួន៣ នៃធារណរដ្ឋសង្គមនិយមវៀតណាម ពុំមានអ្វីកើតឡើងធ្វើឲ្យប៉ះពាល់ដល់ភាគីទាំងសងខាងឡើយ៕
