កំពង់ស្ពឺ ៖ មុខសញ្ញាជួញដូរ និងប្រើប្រាស់គ្រឿងញៀនចំនួន ០៣នាក់ត្រូវបានកំលាំងកងរាជអាវុធហត្ថស្រុកសំរោងបង្ក្រាបបានខណ:ពេលចេញល្បាតពេលយប់ដើម្បីការពារសន្តិសុខ សុវត្ថិភាពជួនប្រជាពលរដ្ឋបានប្រទះឃើញមានការសង្ស័យឃាត់សួរនាំឆែកឃើញថ្នាំញៀនចំនួន០៦កញ្ចប់តែម្តង ។
សកម្មភាពបង្ក្រាបបានមុខសញ្ញាជួញដូរគ្រឿងញៀននេះធ្វើឡើងកាលពីវេលាម៉ោង ២២ និង១៥នាទីយប់ថ្ងៃទី ០២ ខែមិនា ឆ្នាំ២០១៦ ស្ថិតតាមផ្លូវក្នុងភូមិដែកភ្លើង ឃុំរលាំងគ្រើល ស្រុកសំរោងទង ខេត្តកំពង់ស្ពឺ ។
មន្ត្រីអាវុធហត្ថបានប្រាប់ថា ជនសង្ស័យទាំង០៣នាក់ ទី១-ឈ្មោះជុំ សារ៉ាត់ ភេទប្រុស អាយុ ២៥ឆ្នាំ មានទីលំនៅភូមិដក់ពរ ឃុំវល្លិស ស្រុកសំរោងទង ទី២-ឈ្មោះឃុន ខា ភេទប្រុស អាយុ ១៧ឆ្នាំរស់នៅភូមិតាគៀត ឃុំត្រពាំងគង ស្រុកសំរោងទង និងទី៣-ឈ្មោះខែន ភិរួត ភេទប្រុស អាយុ ២១ឆ្នាំនៅ ភូមិតាគៀតជាមួយគ្នា ។
សមត្ថកិច្ចប្រាប់ទៀតថា បន្ទាប់ពីឃាត់ខ្លួនជនសង្ស័យខាងលើឆែកឃើញមានគ្រឿងញៀនប្រភេទម៉ាទឹកកកចំនួន ០៦កញ្ចប់ ម៉ូតូម៉ាក FZ មួយគ្រឿងពាក់ស្លាកលេខភ្នំពេញ 1BD.0222 ពណ៌ខ្មៅ លុយ ៥០ដុល្លា លុយខ្មែរចំនួន ១៣ម៉ឺនរៀល ទូរស័ព្ទ ០៤គ្រឿង និងថង់សម្រាប់ច្រកគ្រឿងញៀនមួយចំនួនទៀត ។
មន្ត្រីអាវុធហត្ថបញ្ជាក់ថា កំលាំងអាវុធហត្ថស្រុកសំរោងបានចេញល្បាតតាមគោលដៅសំខាន់ៗក្នុងភូមិសាសន៍របស់ខ្លួនទាំងយប់ទាំងថ្ងៃ ដើម្បីទប់ស្កាត់រាល់បទល្មើសដែងអាចកើតមាន រក្សាសន្តិសុខសណ្តាប់ជួនប្រជាពលរដ្ឋ អនុវត្តន៍ តាមគោលន យោបាយភូមិ ឃុំមានសុវត្ថិភាពរបស់រាជរដ្ឋាភិបាល ក្នុងនោះអាវុធដាក់កំលាំងតាមទីប្រជុំ កន្លែងលក់គ្រឿងអលង្កា ទូរលក់មាសដូរប្រាក់ វីត និងគ្រប់គោលដៅសំខាន់ៗជាច្រើនទៀត ។
បច្ចុប្បន្នជនចែកចាយគ្រឿងញៀនទាំង០៣នាក់រួមទាំងវត្ថុតាងត្រូវបានបញ្ជូនមកកាន់បញ្ជាការដ្ឋានអាវុធហត្ថខេត្តកំពង់ស្ពឺ នៅព្រឹកថ្ងៃទី០៤ ខែមិនានេះ ដើម្បីចាត់ការបន្តតាមផ្លូវច្បាប់ ។
