ភ្នំពេញៈនៅវិមានព្រឹទ្ឋសភា បានរៀបចំពិធីអបអរសាទរ ខួបអនុស្សាវរីយ៍លើកទី១០៥ ( ១៩១១-២០១៦ ) ទិវាអន្តរជាតិនារី៨មិនា ក្រោមប្រធានបទ វិនិយោគលើសមភាពយេនឌ័រដើម្បីអភិវឌ្ឍប្រកបដោយចីរភាព ដែលពិធីនេះមានការអញ្ជើញចូលរួមពីសំណាក់ឯឧ នៃ ប៉េណា អនុប្រធានទី១ព្រឹទ្ឋសភា តំណាងដ៏ខ្ពង់ខ្ពស់សម្តេចវិបុលសេនាភក្តី សាយ ឈុំ ប្រធានព្រឹទ្ឋសភា នៃព្រះរាជាណាចក្រកម្ពុជា នៅព្រឹកថ្ងៃទី៣ ខែមិនា ឆ្នាំ២០១៦ ។
លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានមានប្រសាសន៍ថា ជារៀងរាល់ឆ្នាំ ប្រទេសកម្ពុជា ក៏ដូចជាប្រទេសនានាលើសកលលោក បានប្រារព្ឋពិធីអបអរសាទរ ទិវានារីអន្តរជាតិ ៨មិនា ក្នុងការរំលឹកពីការតស៊ូរបស់ស្ត្រី ក្នុងការទាមទារសិទ្ឋ សេរីភាព ប្រជាធិបតេយ្យ និងការអនុវត្តន៍ សិទ្ឋស្មើរភាពរវាងបុរសនិងស្ត្រី ដោយពិនិត្យមើលលើសមិទ្ឋផលសម្រេចបាន បញ្ហាប្រឈមនៅសេសសល់ ដើម្បីរៀបចំផែនការសម្រាប់អនុវត្តជាបន្តទៅឆ្នាំមុខទៀត ឆ្ពោះទៅលើកកម្ពស់សមភាពយេនឌ័រ និងផ្តល់ភាពអង់អាចដល់ស្ត្រី ។ លោកជំទាវរដ្ឋមន្ត្រីបន្តថា ឆ្នាំនេះក្រសួងកិច្ចការនារី បានជ្រើសយកប្រធានបទ វិនិយោគលើសមភាពយេនឌ័រដើម្បីអភិវឌ្ឍប្រកបដោយចីរភាព ដែលប្រធានបទនេះបានឆ្លើយតបទៅនឹងការប្តេជ្ញាចិត្តរបស់ប្រមុខរាជរដ្ឋាភិបាលកម្ពុជា ដែលបានថ្លែងនាកិច្ចប្រជុំ ប្រមុខដឹកនាំពិភពលោក នៅអង្គការសហប្រជាជាតិ កាលពីថ្ងៃទី២៧ ខែកញ្ញា ឆ្នាំ២០១៥ ស្តីពីសមភាពយេនឌ័រ និងការលើកកម្ពស់ភាពអង់អាចរបស់ស្ត្រី ផ្តោតលើចំណុចអាទិភាពគន្លឹះចំនួន៤ ព្រមទាំងមានភាពស៊ីចង្វាក់ជាមួយនឹងក្របខណ្ឌអភិវឌ្ឍថ្មីជាសកល គោលការអភិវឌ្ឍប្រកបដោយចីរភាព ( ឆ្នាំ២០១៥-២០៣០ ) ។ ប្រធានបទនេះ បានបង្ហាញអំពីតម្រូវការនៃការកៀរគរធនធានហិរញ្ញ វត្ថុ និងធនធានមនុស្សឱ្យបានគ្រប់គ្នា សម្រាប់អនុវត្តគោលដៅអភិវឌ្ឍជាសាកលនេះឱ្យបានជោគជ័យ នៅត្រង់គោលដៅទី៥ ក្នុងចំណោមគោលដៅទាំង១៧នៃ គោលអភិវឌ្ឍប្រកបដោយចីរភាព ។
ឯឧ នៃ ប៉េណា បានមានប្រសាសន៍ថា នារីគឺមានតួនាទីសំខាន់ណាស់ក្នុងការដឹកនាំសង្គមជាតិ គឺមានសិទ្ធស្មើរនិងប្រុសដែរ ដូច្នេះសូមឲ្យថ្នាក់ដឹកនាំបេក្ខភាពជានារី គ្រប់ស្ថាបណ្ណ័គ្រប់អង្គភាពកំពុងបម្រើការងារនៅក្នុងសង្គម ត្រូវតែបន្ដបង្កើនសមត្ថភាព ដើម្បីចូលរួមអភិវឌ្ឍន៍សង្គមជាតិ ព្រោះនារីជាឆ្នឹងខ្នងសេដ្ឋកិច្ចដ៍សំខាន់មិនអាចខ្វះបាន ដោយហេតុថារាជរដ្ឋាភិបាលបានផ្ដល់សិទ្ធិឲ្យនារីចូលរួមជាកំលាំងចលករ ដ៍សំខាន់ក្នុងការរួមចំណែកជំរុញប្រទេសកម្ពុជា ឆ្ពោះទៅរកការអភិវឌ្ឍលើគ្រប់វិស័យ ។ ឯឧ អនុប្រធានទី១បញ្ជាក់ថា កន្លងមកក៍ដូចបច្ចុប្បន្ន សម្តេចអគ្គមហាសេនាបតីតេជោហ៊ុន សែននិងសម្តេចកិត្ដិព្រឹទ្ធបណ្ឌិត ប្រធានកិតិ្ដយស សមាគនារីកម្ពុជាដើម្បីសន្ដិភាព និងអភិវឌ្ឍន៍ សម្តេចតែងតែផ្តល់ជំនួយស្មារតីនិងសម្ភារៈដល់ក្រុមប្រឹក្សាជាតិកម្ពុជាដើម្បីស្ត្រីគណៈកម្មាធិការជាតិលើកកម្ពស់សីលធម៌សង្គមតម្លៃស្ត្រីខ្មែរ និងគ្រួសារខ្មែរ ព្រមទាំងលើកទឹកចិត្ដដល់នារីនៅគ្រប់បណ្ដាក្រសួង មន្ទីរ អង្គភាព ពាក់ព័ន្ធនានា ឲ្យមានតម្លៃ និងមានលទ្ធភាពបំពេញភារកិច្ចរបស់ខ្លួនប្រកបដោយប្រសិទ្ធភាព ៕
