ភ្នំពេញៈ ផ្លូវបេតុងឆ្អឹងដែក១ខ្សែដែលមាន ទទឹង០៤ម៉ែត្រ ប្រវែង ១៨៧,៥ម៉ែត្រ ជាគម្រោងថវិការបស់រដ្ឋបាលខណ្ឌឆ្នាំ២០១៥ ដែលទើបស្ថាបនារួចកាលពីពេលថ្មីៗនេះ ត្រូវបានលោក នុត ពុធដារ៉ា អភិបាលខណ្ឌដង្កោ ធ្វើការចុះពិនិត្យ និងសំណេះសំណាលជាមួយប្រជាពលរដ្ឋ រួមដំណើរដោយលោក វើក សាមឿន ចៅសង្កាត់ដង្កោ និងមន្ត្រីរាជការសាលាខណ្ឌ សង្កាត់ នាព្រឹកថ្ងៃទី៣ ខែមិនា ឆ្នាំ២០១៦ ស្ថិតក្នុងភូមិតាឡី សង្កាត់ដង្កោ ខណ្ឌដង្កោ ។
ក្នុងឱកាសជួបជាមួយប្រជាពលរដ្ឋ លោក នុត ពុធដារ៉ា បានផ្តាំផ្ញើរការសួរសុខទុក្ខពីសំណាក់សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ព្រមទាំងបានពាំនាំនូវការយកចិត្តទុកដាក់ ពីសំណាក់ឯកឧត្តម ប៉ា សុជាតិវង្ស អភិបាលរាជធានីភ្នំពេញ ដែលជានិច្ចកាលតែងបានគិតគូរដល់ការលំបាក បញ្ហាកង្វល់នានា របស់បងប្អូនប្រជាពលរដ្ឋនៅមូលដ្ឋាន ។ លោកអភិបាលក៏បានទទួលយកនូវសំណូមពរ កង្វល់ និងតម្រូវការផ្សេងៗ របស់ប្រជាពលរដ្ឋទាំងអស់ ហើយនឹងយកទៅដោះស្រាយជូនប្រជាពលរដ្ឋជាបន្តបន្ទាប់។
លោកវើក សាមឿន ក្នុងនាមអាជ្ញាធរសង្កាត់និង បងប្អូនប្រជាពលរដ្ឋបានអបអរសាទរចំពោះសមិទ្ធផលថ្មីនេះ ហើយថ្លែងអំណរគុណដល់អាជ្ញាធរគ្រប់លំដាប់ថ្នាក់ ដែលតែងបានគិតគូរដល់ការលំបាករបស់ពួកគាត់ និងដោះស្រាយបញ្ហានានាក្នុងមូលដ្ឋានបានល្អប្រសើរ។
គួរបញ្ជាក់ថា៖ ផ្លូវបេតុង០១ខ្សែ ស្ថិតក្នុងភូមិតាឡី សង្កាត់ដង្កោ ដែលបានចុះពិនិត្យនាឱកាសនេះ ជាផ្លូវបេតុងឆ្អឹងដែក ទទឹង០៤ម៉ែត្រ ប្រវែង ១៨៧,៥ម៉ែត្រ ជាគម្រោងថវិការបស់រដ្ឋបាលខណ្ឌឆ្នាំ២០១៥ ។ ដោយឡែកសម្រាប់សង្កាត់ដង្កោ ទាំងមូលបានទទួលផ្លូវបេតុងឆ្អឹងដែកដែលជាគម្រោងថវិការបស់រដ្ឋបាលខណ្ឌឆ្នាំ២០១៥ បានចំនួន ០៣ខ្សែ ដោយ០១ខ្សែស្ថិតក្នុងភូមិសំបួរ ប្រវែង ៣០១,២៥ម៉ែត្រ ទទឹង ៥ម៉ែត្រ, ០១ខ្សែទៀត ស្ថិតក្នុងភូមិម័ល ប្រវែង២០០ម៉ែត្រ ទទឹង ០៤ម៉ែត្រ និង០១ខ្សែ ស្ថិតក្នុងភូមិតាឡី ដែលបានចុះពិនិត្យនាព្រឹកនេះ ៕
