បន្ទាយមានជ័យ៖ក្នុងឱកាសអបអរសាទរខួបលើកទី១០៥ទិវាអន្តរជាតិនារី០៨មីនា នៅរសៀលថ្ងៃទី០៣ខែមីនាឆ្នាំ២០១៦នេះ លោក សួន បវរ អភិបាលរងខេត្តបន្ទាយមានជ័យព្រមទាំងភរិយាបានដឹកនាំក្រុមសមាគមន៍នារីកម្ពុជាដើម្បីសន្តិភាពនិងអភិវឌ្ឍន៍ជួបសំណេះសំណាលនិងសួរសុខទុក្ខយុវជនផ្តាច់សារធាតុញៀនក្នុងមជ្ឍមណ្ឌលជីវិតថ្មីភ្នំបាក់ស្ថិតក្នុងភូមិភ្នំបាក់សង្កាត់ទឹកថ្លាក្រុងសិរីសោភ័ណ។
លោក ឃុន វុទ្ធី ប្រធានមន្ទីរសង្គមកិច្ចយុវជននិងនិតិសម្បទាខេត្តបន្ទាយមានជ័យបានអោយដឹងថា នៅក្នុងមជ្ឍមណ្ឌលជីវិតថ្មីភ្នំបាក់បច្ចុប្បន្នមានយុវជនជាប់សារធាតុញៀនចំនួន២៧១នាក់ស្ត្រី២១នាក់ដែលកំពុងស្នាក់នៅអប់រំផ្តាច់សារធាតុញៀន។យុវជនទាំងនេះផងដែរគឺមានមួយចំនួនធំបានស្មគ្រ័ចិត្តចូលមកស្នាក់នៅក្នុងមណ្ឌលដើម្បីទទួលយកការអប់រំបន្សាបសារធាតុនេះ។មួយវិញអ្នកដែលកំពុងទទួលបន្សាប មណ្ឌលបានរៀបចំអោយអោយរៀនកាត់ដេរ កសិកម្មនិងសូន្យរូប ពេលដែលពួកគេវិលត្រឡប់អាចយកចំនេះទាំងនេះទៅប្រកបរបរចិញ្ចឹមជិវិតខ្លួនឯងបាន។
លោក សួន បវរ អភិបាលរងខេត្តបន្ទាយមានជ័យបានថ្លែងថា ទោះជាប្អូនៗបានជ្រុលខ្លួនសេពនូវថ្នាំញៀនរហូតមកស្នាក់នៅក្នុងមណ្ឌលកែប្រែនេះមែនតែសង្គមគ្រួសារនិងសង្គមជាតិពិសេសថ្នាក់ដឹកនាំខេត្តមិនបានស្អប់ខ្ពើមប្អូនៗឡើយ ហើយផ្ទុយទៅវិញប្អូនៗគឺជាជនរងគ្រោះដោយសារថ្នាំញៀន។
លោកបានបន្តថា យើងនៅមានឱកាសច្រើនទៀតសំរាប់កសាងជីវិតថ្មីនិងជ្រើសរើសរៀបចំអនាគតខ្លួនឯងព្រោះថាក្នុងពេលដែលប្អូនៗកំពុងតែស្ថិតក្រោមការអប់រំបន្សាបនេះគឺគណះគ្រប់គ្រង់មណ្ឌលបានរៀបចំអោយមានវគ្គសិក្សាសំរាប់ប្អូនៗក្រេបយកចំណេះជំនាញ ហើយពេលចេញទៅវិញអាចយកទៅប្រកបរបរចិញ្ចឹមជីវិតខ្លួនឯងនិងគ្រួសារបាន។លោកក៏បានផ្តាំផ្ញើផងដែរពេលដែលបានជាដាច់ពីសារធាតុនេះហើយពេលត្រឡប់ទៅវិញ សូមប្អូនៗបញ្ឈប់ការសាកល្បងជាមួយថ្នាំញៀនតទៅទៀតហើយបន្តនាំភាពរងគ្រោះពេលប្អូនឆ្លងកាត់ទៅណែនាំពន្យល់ដល់មិត្តភក្តិ បងប្អូន និងអ្នកជិតខាងយើងកុំអោយពួកគាត់ចង់ដឹង ចង់សាក ជាវាអីព្រោះវាពិតជាបំផ្លាញក្រុមគ្រួសារ អនាគតនិងជីវិតយើងទាំងអស់គ្នា។ចូរអោយពួកគាត់ឆ្លើយថាទេចំពោះគ្រឿងញៀន៕ដោយ:ឃិន គន្ធា
