កំពង់ធំៈ ប្រជាពលរដ្ឋជាច្រើន គ្រួសារបានសំណូមពរ ឲ្យលោក ព្រឹម រដ្ឋា អភិបាលស្រុកស្ទោង និង មេឃុំកំពង់ចិនត្បូង ព្រមប្រធានបរិស្ថាន យកចិត្តទុកដាក់ពីសុខភាពរបស់ ប្រជាពលរដ្ឋខ្លះផង ដោយសារតែបច្ចុប្បន្នមានក្រុមប្រកបអជីវកម្ម ធ្វើត្រីងៀត បានបង្ហូរទឹកកាកសំណល់ទឹកត្រី ទឹកស្អុយ បង្ហូរចូលទឹកស្ទឹង បណ្តាលឲ្យប៉ះពាល់សុខភាពប្រជាពលរដ្ឋរាប់រាយគ្រួសារ ដែលបានប្រើប្រាស់ទឹកស្ទឹងស្ទោងនេះ។
ប្រជាពលរដ្ឋដែលបានប្រើប្រាស់ទឹកស្ទឹងស្ទោងនេះ បាននាំគ្នារអ៊ូរទាំថា បន្ទាប់ពីទឹកស្រក នៅសល់បាតស្ទឹង ប្រជាពលដ្ឋរាប់ពាន់គ្រួសារដែលប្រើប្រាស់ ទឹកស្ទឹងស្ទោង ដែលរស់នៅតាមបណ្តោយមាត់ស្ទឹងទាំងសងខាង ជួបនូវផលពិបាកយ៉ាងខ្លាំង ដោយសារតែទឹកស្ទឹងស្ទោង មានសភាពឡើងត្រា បែកពពុះស្អុយឆ្អាប ដោយសារតែមាន ក្រុមអជីវករធ្វើត្រីងៀត គិម យុុន ទីពីឈ្មោះ យ៉ុន យ៉ុង បានបង្ហូរទឹកស្អុយចួលស្ទឹង បណ្តាលឲ្យខូចទឹកស្ទើទាំងស្រុក ក្នុងការប្រើប្រាស់ប្រចាំថ្ងៃរបស់មនុស្សសត្វ ដែលបានប៉ះពាល់ដល់សុខភាពយ៉ាងធ្ងន់ធ្ងរ នៅចំនុច ភូមិកំពង់ក្ដី ឃុំកំពង់ចិនត្បូង ស្រុកស្ទោង ខេត្ដកំពង់ធំ ។
លោក ប៉ុយ សារពាង មេឃុំកំពង់ចិនត្បូង បានឲ្យដឹងថា ទឹកស្ទឹងនេះស្អុយគឺបណ្ដាលមកពីការបង្ហូរទឹកស្អុយចូល ស្ទឹងទើបបណ្ដាលអោយទឹកស្អុយបែបនេះ កន្លងមកលោកបានធ្វើការណែនាំដែរ ហើយបានដឹកនាំមន្ត្រីភូមិ ឃុំ និងមន្ត្រីបរិស្ថាន ចុះទៅពិនិត្យមើល ពីបីដងដែរ ថែមទាំងបាន ហៅពូកអាជីវករដែលធ្វើត្រីងៀតទាំងនោះមក ធ្វើការណែនាំ ឲ្យធ្វើអាងស្តុបទឹកត្រី ស្អុយនោះសិនចាំពេលមានភ្លៀងច្រើន រឺចាំដល់រដូវវស្សាចាំពូកគាត់បូមចេញ ប៉ុន្តែការណែនាំទាំងនេះមិនទទួលបានផលប្រយោជន៍នោះទេ ដោយសារតែម្ចាស់អជីវកម្មមិនសហការ ។
លោក អែម សំអុន ប្រធានបរិស្ថានស្រុកស្ទោង បានឲ្យដឹងថា បញ្ហាទឹកស្ទឹងដែលបង្ករឲ្យស្អុយ ឆ្អេះឆ្អាបថែម ទាំងបង្ករឲ្យមានផលប៉ះពាល់ដល់បរិស្ថាន យ៉ាងធ្ងន់ធ្ងន់ ជាពិសេសបញ្ហាសុខភាពរបស់ ប្រជាពលរដ្ឋដែលបានប្រើប្រាស់ទឹក ដែលគ្មានអនាម័យ សម្រាប់ទឹកដែលស្អុយនេះ គឺបណ្តាលមកពីទឹកស្អុយដែលសល់ពី ការលាងត្រីងៀតហើយបង្ហូរចូលស្ទឹង ក្នុងនោះក៏មាន ទឹកពីផ្ទះអ្នកនៅតាមថ្នល់បង្ហូរចូលដែរ ក្នុងនោះលោក នឹងធ្វើការណែនាំឲ្យម្ចាស់អជីវកម្ម ធ្វើអាងស្តប់ទឹក ហើយបិទលូបង្ហូរចូលស្ទឹង ។
ដោយ ផន សុជាតិ
