ភ្នំពេញ៖ បន្ទាប់ពីប្រជាពលរដ្ឋបានថ្អូញថ្អែពីទុក្ខលំបាកដោយសារក្រុមចែកចាយនិងប្រើប្រាស់គ្រឿងញៀនបានរំខានដល់ការរស់នៅរបស់ពួកគាត់នោះ លោក យឹម សារ៉ាន់ អធិការនគរបាលខណ្ឌពោធិ៍សែនជ័យនិងលោក ប្រាក់ សុជាតិ អធិការរងបានដឹកនាំកម្លាំងបញ្ជាដោយផ្ទាល់ចុះសាកសួរប្រជាពលរដ្ឋទាំងយប់និងធ្វើការស្រាវជ្រាវឃាត់ខ្លួនជនសង្ស័យដែលជាមុខសញ្ញាចែកចាយនិងប្រើប្រាស់គ្រឿងញៀនបាន៥នាក់ក្នុងនោះស្រីម្នាក់ និងម៉ូតូចំនួន៧គ្រឿងផងដែរ កាលពីវេលាម៉ោងជាង១០យប់ថ្ងៃទី៤ខែមិនា ឆ្នាំ២០១៦ស្ថិតនៅក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ។
លោក យឹម សារ៉ាន់ បានឲ្យអ្នកយកព័ត៌មានយើងដឹងថា ដោយកន្លងមកប្រជាពលរដ្ឋបានថ្អូញថ្អែពីក្តីកង្វល់របស់ពួកគាត់ដោយសារក្រុមចែកចាយនិងប្រើប្រាស់គ្រឿងញៀននោះ លោកខិតខំធ្វើការស្រាវជ្រាវរហូតដល់ថាក្រុមទាំងនេះបានមកលាក់ខ្លួននៅនឹងសំណង់ផ្ទះអនាធិបតេយ្យក្នុងដីឡូត៍របស់គេនោះ ទើបលោកនិងលោកអធិការបានដឹកនាំកម្លាំងមកឡោមព័ទ្ធពួនស្ទាក់រហូតឈានទៅឃាត់ខ្លួនជន សង្ស័យបាន៥នាក់ ទី១ឈ្មោះ ម៉ាន យឿន ភេទប្រុសអាយុ៤២ឆ្នាំមានមុខរបរជាជាងដែកស្នាក់នៅក្នុង ការដ្ឋានផ្សារដែកភូមិបែកចាន ឃុំបែកចាន ស្រុកអង្គស្នួល ខេត្តកណ្តាល ទី២ឈ្មោះ យឿង អ៊ុត ភេទប្រុសអាយុ២៥ឆ្នាំមានមុខរបរជាកម្មកររោងចក្រ ស្នាក់នៅផ្ទះជួល ក្នុងភូមិ សង្កាត់កើតហេតុខាងលើ ទី៣ឈ្មោះ វ៉ាន់ ចាន់ដារ៉ាវុធ ភេទប្រុសអាយុ៣០ឆ្នាំរស់នៅក្នុងភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យ ទី៤ ឈ្មោះ សាន សុភក្ត្រ ភេទប្រុសអាយុ៣០ឆ្នាំមានមុខរបរជាកម្មករលក់គ្រឿងសំណង់ស្នាក់នៅផ្ទះជួលភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ទី៥ឈ្មោះ ខាន់ ស្រីរ៉ា អាយុ២៥ឆ្នាំ មានមុខរបរជាបុគ្គលិកខារ៉ាអូខេ ស្នាក់នៅបន្ទប់ជួលភូមិអង្គ សង្កាត់ចោមចៅ ខណ្ឌពោធិ៍សែនជ័យ ក្នុងនោះធ្វើការដកហូតម៉ូតូចំនួន៧គ្រឿង សេ១២៥ចំនួន៣គ្រឿង ស្មាស់១គ្រឿង សង់កូរ៉េ ១គ្រឿង វ៉េវ១គ្រឿង និងអេសអិល១គ្រឿងផងដែរ ។
លោកបានបន្តថា ក្រុមចែកចាយនិងប្រើប្រាស់គ្រឿងញៀនទាំងនេះដែលធ្វើឲ្យប្រជាពលរដ្ឋលំបាកបំផុតពីព្រោះពួកនេះ បន្ទាប់ពីវាប្រើប្រាស់រួចហើយនោះ គឺវាអាចធ្វើសកម្មភាពនានាដែលរំខានដល់ការរស់នៅរបស់ប្រជាពលរដ្ឋ ហើយម្យ៉ាងក៏អាចក្លាយទៅជាចោរលួច និងគាស់ផ្ទះផងដែរ ដូច្នេះបើយើងមិនបង្ក្រាន់ឲ្យបាននោះ ប្រជាពលរដ្ឋលោករស់នៅមិនបានស្ងប់នោះទេ ។
សូមបញ្ជាក់ថា មុននឹងឈានដល់ការបង្ក្រាប់មុខសញ្ញាចែកចាយនិងប្រើប្រាស់គ្រឿងញៀនទាំងនេះ លោក យឹម សារ៉ាន់ បានដើរសាកសួរសុខទុក្ខប្រជាពលរដ្ឋនិងបានឲ្យលេខទូរស័ព្ទទៅប្រជាពលរដ្ឋ រួច ផ្តែផ្តាំផងដែរ បើសិនជាបងប្អូនជួបការលំបាក ឬក៏ឃើញជនណាមកអុកឡុកក្នុងមូលដ្ឋានរបស់ពួកគាត់សូមឲ្យទូរស័ព្ទទៅកាន់លោកដោយផ្ទាល់លោកនិងចុះមកបង្ក្រាប់ឬក៏ដោះស្រាយជូនជាបន្ទាន់ ផងដែរ ដូច្នេះនេះសបញ្ជាក់ឲ្យឃើញថា លោកអធិការបានយកចិត្តទុកដាក់គិតពីសុខទុក្ខប្រជាពលរដ្ឋបំផុត៕ប៊ុនធធី
