ខេត្តប៉ៃលិន៖ លើទីលានពហុកីឡាដ្ឋានខេត្តប៉ៃលិន ដែលទើបបង្កើតថ្មី មានរៀបចំការប្រកួតកីឡាសិស្សបឋមសិក្សា និងមធ្យមសិក្សាប្រចាំឆ្នាំ២០១៥ ២០១៦ ស្ថិតក្រោមអធិបតីភាព លោក អៀង វុធ អភិបាលរងនៃគណៈអភិបាលខេត្តប៉ៃលិន តំណាងលោក កើត សុធា អភិបាលនៃគណៈអភិបាលខេត្ត ព្រមទាំងមានការចូលរួមពីលោក តង់ ធារ៉ា ប្រធានមន្ទីរអប់រំ យុវជន និងកីឡាខេត្តប៉ៃលិន ,លោក នាក់ ណាង ប្រធានមន្ទីរមុខងារសាធារណៈខេត្ត ,លោក លោកស្រីប្រធាន អនុប្រធាន ជំនាញមន្ទីរជុំវិញខេត្ត ,លោកគ្រូ អ្នកគ្រូ សិស្សានុសិស្ស ក្រុមកីឡាករ កីឡាការីនី យ៉ាងច្រើនកុះករ ។
លោក តង់ ធារ៉ា ប្រធានមន្ទីរអប់រំ យុវជននិងកីឡាខេត្តប៉ៃលិន បានឲ្យដឹងថា៖ ការប្រកួតកីឡានាពេលនេះ គឺធ្វើឡើងដើម្បីជ្រើសរើសជើងអែក ប្រចាំឆ្នាំ និងដើម្បីជំរុញឲ្យកាន់តែខ្លាំងក្លាក្នុងការចូលរួមចំណែកកែលំអរ ព្រមទាំងអភិវឌ្ឍន៏វិស័យកីឡាឈានទៅកាន់កីឡាស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ពិសេសរួមចំណែកក្នុងការអនុវត្តន៏ប្រកបដោយប្រសិទ្ធភាពតាមគោលនយោបាយចតុកោណ របស់រាជរដ្ឋាភិបាលអណិត្តទី៥ ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ ។ លោកប្រធានមន្ទីរ បានបន្តថា៖ ក្រុមកីឡាករ កីឡាការិនី បឋមសិក្សា ដែលចូលរួមប្រកួតក្នុងឆ្នាំសិក្សា២០១៥ ២០១៦ ក្រុមបាល់ទាត់មាន១៣ក្រុម បាល់ទះ០៩ក្រុម បាល់បោះ០៦ក្រុម និងអត្តពលកម្ម១២ក្រុម សរុបមានកីឡាករចំនួន៥៥៦នាក់ ក្នុងកីឡាការិនី១៨០នាក់ ។ ចំណែកក្រុមកីឡាករ កីឡាការិនីមធ្យមសិក្សាវិញ មានបាល់ទាត់ចំនួន១២ក្រុម ក្រុមបាល់ទះ០៦ក្រុម បាល់បោះចំនួន០៥ក្រុម និងអត្តពលកម្មចំនួន១២ក្រុម សរុបមានកីឡាករចំនួន៣៩៦នាក់ ក្នុងនោះកីឡាការិនីចំនួន១៧៤នាក់ ។ លោកប្រធានមន្ទីរ បន្តទៀតថា៖ ការប្រកួតកីឡាគឺមានរយៈពេល០៩ ថ្ងៃ ចាប់ពីថ្ងៃទី០៣ រហូតដល់ថ្ងៃទី១១ ខែមីនា ឆ្នាំ២០១៦ ដោយមានកីឡាករសរុប៩៥២នាក់ កីឡាការិនី ៣៥៤នាក់ ហើយការប្រកួតនេះគឺក្នុងន័យបណ្តុះគំនិតឲ្យបងប្អូនស្រលាញកីឡា បង្កើនការសាមគ្គីភាព មិត្តភាព ចេះរស់នៅជាមួយគ្នាក្នុងការកសាងវប្បធម៌ស្និត្ធស្នាល និងរួមចំណែកកាពារប្រទេសជាតិមួយ ពោរពេញដោយមោទនភាព សមភាព ក្នុងឆាកអន្តរជាតិ និងជាពិសេសក្នុងតំបន់ ។
ឆ្លៀតក្នុងឪកាសនោះដែរ លោក អៀង វុធ អភិបាលរងខេត្ត និងជាតំណាងលោក កើត សុធា អភិបាលនៃគណៈអភិបាលខេត្តប៉ៃលិន បានមានប្រសាសន៏ថា៖ ការប្រកួតកីឡានាពេលនេះ ជាការរួមចំណែកមួយ ដើម្បីបង្កើនសមត្ថភាព និងទេពកោសល្យ របស់កីឡាករកីឡាការិនី ហើយក៏ជាមុខព្រួញដ៏សំខាន់របស់រាជរដ្ឋាភិបាល ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាពិសេសក្រសួងអប់រំ យុវជននិងកីឡា ជាអ្នកទទូលខុសត្រួវផ្ទាល់ ព្រមទាំងយកចិត្តទុកដាក់បំផុត ។ លោកអភិបាលរង មានប្រសាសន៏បន្តថា៖ ផ្នែកអប់រំកាយ និងកីឡា នាំមកនូវសុខភាពរឹងមាំ ប្រាជ្ញាឈ្លាសវៃ កាលណាក្មួយៗមានសុខភាពរឹងមាំ ទើបរៀនសូត្រពូកែ ដូច្នោះក្មួយៗ កុំបោះបង់កីឡាឲ្យសោះ តែក្មួយៗត្រួវរៀនសូត្រឲ្យបានពូកែគ្រប់មុខវិជ្ជាផងដែរ ។ យើងលេងកីឡា គឺយើងជៀសវាងនូវការសេពគ្រឿងញៀន ព្រមទាំងលុបបំបាត់ក្មេងទំនើង ហើយការលេងកីឡានាំមកនូវសុខមាលភាពរបស់មនុស្សជាតិទាំងមូល និងជាពិសេសសួមឲ្យក្មួយៗមេត្តាគោរពនូវច្បាប់ចរាចរណ៏ ព្រោះបញ្ហាចរាចរណ៏ជាបញ្ហាមួយដែលរាជរដ្ឋាភិបាលកំពុងយកចិត្តទុកដាក់ ។ លោកក៏បាននែនាំដល់អាជ្ញាកណ្តាល ធ្វើយ៉ាងណាកាត់សេចក្តីឲ្យបានត្រឹមត្រួវ យុត្តិធម៌ រក្សាឲ្យបាននូវសាមគ្គីភាពជាមួយកីឡាករកីឡាការិនី ចេះយោគយល់គ្នាទៅវិញទៅមក ក្នុងនាមជាអាជ្ញាកណ្តាល , ចំពោះក្មួយៗកីឡាករ កីឡាការិនី ក៏ត្រួវចេះគោរពរាល់នូវបទបញ្ជា នៃការប្រកួតឲ្យបានត្រឹមត្រួវ ហើយក៏ចូលរួមអបរសាទរ ចំពោះលោកគ្រូ អ្នកគ្រូ និងក្មួយៗ កីឡាករ កីឡាការិនី ដែលបានចូលរួមប្រកួតជ្រើសរើសជើងឯក សិស្សបឋមសិក្សា មធ្យមសិក្សាថ្នាក់ខេត្តប្រចាំឆ្នាំ២០១៥ ២០១៦នាពេលនេះផងដែរ ៕
