ភ្នំពេញ ជនសង្ស័យមួយក្រុមបានដេញវាយប្លន់យកម៉ូតូពីយុវជនមួយក្រុម ២ដង នៅកន្លែងផ្សេងគ្នានិងយកម៉ូតូអស់៣គ្រឿង ។ ហេតុការណ៍ទី១លើឡើងកាលពីវេលាម៉ោង៤នឹង១០នាទីជិតភ្លឺ ឈានចូលថ្ងៃទី៦ ខែមីនា ឆ្នាំ២០១៦ ក្បែរផ្សារកណ្តាល ស្ថិតក្នុងសង្កាត់ផ្សារកណ្តាល១ និងទី២វេលាម៉ោង៤នឹង៤០នាទីថ្ងៃដដែល នៅចំណុចមុខវិមានសន្តិភាព តាមបណ្តោយផ្លូវសហព័ន្ឋរ៉ុស្សី ស្ថិតក្នុងសង្កាត់ស្រះចក ខណ្ឌដូនពេញ។
ក្រុមជនរងគ្រោះបានប្រាប់អោយដឹងថា នៅមុនពេលកើតហេតុពួកគេបានជិះម៉ូតូ៣គ្រឿងមានគ្នាជាច្រើននាក់ បាននាំគ្នាជិះម៉ូតូដើរលេង ខណះមកដល់ចំណុចក្បែរផ្សារកណ្តាល ស្រាប់តែមានក្រុមជនសង្ស័យមានគ្នាប្រមាណជិត២០នាក់ ជិះម៉ូតូជាច្រើនគ្រឿងប្រដាប់ដោយដាវសាម៉ូរៃបានមកកាប់ប្លន់យកម៉ូតូម៉ាកZoomer x មួយគ្រឿងពីពួកគេបានសម្រេចរួខក៏ជិះគេចខ្លួនអស់តែម្តង តែមិនមានអ្នករងរបួសនោះទេ។ ប្រភពបន្តថា បន្ទាប់ពីក្រុមជនសង្ស័យយកម៉ូតូទៅបាត់ពួកគេបានទំនាក់ទំនងទៅមិត្តភក្ត្ររបស់ខ្លួនអោយមកជួបជុំគ្នានៅមុខវិមានសន្តិភាព មិនទាន់ដឹងអីផងស្រាន់តែក្រុមជនសង្ស័យដដែលបានជិះមកឃើញម្តងទៀត ក៏វាយប្លន់យកម៉ូតូម៉ាកនិច២គ្រឿងទៀត ដោយពួកគេនាំគ្នារត់ចោលម៉ូតូព្រោះភ័យខ្លាំងពេក ពេលឃើញក្រុមជនសង្ស័យប្រដាប់ដោយដាវសាម៉ូរៃគ្រប់ដៃបែបនោះ។
ក្រោយមកក្រុមជនរងគ្រោះបានរត់ទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលស្រះចក ហើយក្នុងករណីប្លន់នេះដែរ សមត្ថកិច្ចសឹងមិនជឿថាជាករណីប្លន់ ប៉ុន្តែក្រុមជនរងគ្រោះថាបើមិនប្លន់យ៉ាងមេចបើយកម៉ូតូពួកខ្លួនអស់៣គ្រឿងទៅហើយនោះ៕ដោយ៖ជីម ភារ៉ា
