( រូបភាពវីដេអូ) ប្រភពព័ត៌មានផ្លូវការរាយការណ៍ថា រដ្ឋមន្ត្រីការពារប្រទេសឡាវ និងមនុស្ស១៥នាក់ទៀត បានត្រូវស្លាប់ក្នុងគ្រោះថ្នាក់ធ្លាក់យន្តហោះមួយ កាលពីព្រឹកថ្ងៃទី១៧ ឧសភា ក្នុងខេត្តស៊ីអេង ឃូអាង ភាគឦសានឡាវ ។ មនុស្សតែម្នាក់គត់អាចនៅរស់រានមានជីវិតក្នុងគ្រោះថ្នាក់នោះ ។ ក្នុងចំណោមអ្នកដំណើរដែលស្លាប់ក្នុងគ្រោះ ថា្នក់នេះ មានបណ្តាអ្នកទទួលខុសត្រូវ
ជាន់ខ្ពស់ឡាវទាំងឡាយ ក្នុងនោះមានឧបនាយករដ្ឋមន្ត្រី និងជារដ្ឋមន្ត្រីការពារប្រទេស លោក ឌូអាង ឆៃភីជិត, រដ្ឋមន្ត្រីសន្តិសុខសាធារណៈ លោក ថុងបាង សេនហ្គាហ្វូន, លេខាគណៈកម្មាធិការកណ្តាលបក្សប្រជាជនបដិវត្តន៍ឡាវ លោក ចឺ អាង សោមប៊ូនខាន់, និងអភិបាលក្រុងវៀងចន្ទ លោកស៊ូខាន់ ម៉ាហាឡាត ។ អ្នកនៅរស់រានមានជីវិតតែម្នាក់គត់គឺ គិលានុប្បដ្ឋាយិកា ម្នាក់ ។ គិលានុប្បដ្ឋាយិកានោះ ត្រូវបានយកចេញពីកម្ទេចយន្តហោះជាមួយមនុស្ស២នាក់ទៀតដែល ស្លាប់ក្រោយមកដោយសារមានរបួសធ្ងន់ពេក ។
ពិធីកាន់មរណទុក្ខចំពោះបណ្តាជនរងគ្រោះដោយ គ្រោះថ្នាក់នេះ ចាប់ផ្តើមនៅរដ្ឋធានីឡាវ ចាប់ពីយប់ថ្ងៃទី១៧ ឧសភា ទៅ ។ យន្តហោះជួបគ្រោះថ្នាក់នេះធុន AN74TK-300D ដែលដឹកបណ្តាតំណាងរដ្ឋាភិបាលទៅចូលរួមក្នុងព្រឹត្តិការណ៍ មួយ អបអរសាទរចំពោះការបង្កើតកងពលធំទី២នៃកងទ័ពឡាវ បានធ្លាក់នាព្រឹកថ្ងៃទី១៧ ឧសភា វេលាម៉ោង៧ ម៉ោងក្នុងស្រុក ក្នុងភូមិណាឌី ស្ថិតនៅក្នុងស្រុកប៉ាអេក ខេត្តស៊ីអេង ឃូអាង ។
ការសុើបអង្កេតមួយត្រូវបានបើកធ្វើ ដើម្បីកំណត់ពីមូលហេតុនៃគ្រោះថ្នាក់ ។ ទីភ្នាក់ងារសារព័ត៌មានរដ្ឋឡាវ KPL គូសបញ្ជាក់ថា ខ្លួននឹងតាមដានការវិវត្តន៍នៃសភាពការណ៍ ។ សាក្សីម្នាក់បញ្ជាក់ប្រាប់ទីភ្នាក់ងារព័ត៌ មានចិនសុីនហួ ថា យន្តហោះបានធ្លាក់ក្នុងតំបន់ព្រៃភ្នំមួយ និងថាពេលកើតមានគ្រោះថ្នាក់នោះ មានអាកាសធាតុល្អ ហើយកងទ័ពឡាវបានឡោមព័ទ្ធតំបន់យន្តហោះធ្លាក់ ៕
