ភ្នំពេញ ៖ រថយន្តកូរ៉ូឡាមួយគ្រឿងបើកក្នុងល្បឿនលឿន បានជែកជាមួយនឹងរថយន្តមួយគ្រឿងទៀត បានជ្រុលបុករបាំងថ្មពុះចែកទ្រូងផ្លូវពេញទំហឹង បណ្ដាលឲ្យបាក់អស់ចំនួន៤កង់រងការខូចខាត កាលពីវេលាម៉ោង៧នឹង១០នាទីយប់ថ្ងៃទី១៤ខែមីនា ឆ្នាំ២០១៦ ក្បែរស្តុបវត្តមហាមន្ត្រី តាមបណ្តោយផ្លូវព្រះសីហនុ ស្ថិតក្នុងសង្កាត់វាល់វង់ ខណ្ឌ៧មករា ។
ប្រភពពត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តកូរ៉ូឡា ពណ៍ទឹកប្រាក់ ពាក់ស្លាកលេខ ភ្នំពេញ 2C-5585 បើកបរដោយបុរសម្នាក់តាមបណ្តោយផ្លូវព្រះសីហនុ ទិសដៅពីកើតទៅលិចក្នុងល្បឿនយ៉ាងលឿន និងបានវ៉ារថយន្តមួយគ្រឿងមិនចាំម៉ាក ពេលមកដល់ចំណុចកើតហេតុបានជ្រុលទៅបុករបាំងថ្មពុះចែកទ្រូងផ្លូវពេញទំហឹង បណ្តាលឱ្យបាក់អស់៤កង់ ចំណែករថយន្តបានរងការខូចខាតផ្នែកខាងមុខ សំណាងល្អមិនមានអ្នករងរបួសនោះទេ ។
ក្រោយកើតហេតុសមត្ថកិច្ចជំនាញបានមកធ្វើការវាស់វែង និងស្ទូចយករថយន្តបង្កទៅរក្សទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយតាមនីតិវិធី ៕
ដោយ ជីម ភារ៉ា
