ភ្នំពេញ ៖ មនុស្ស៤នាក់រួមនិងក្មេងតូចម្នាក់បានរងរបួសធ្ងន់ស្រាល ដោយសារបុរសម្នាក់ស្រវឹងស្រាបើករថយន្តក្នុងល្បឿនលឿនវ៉ាស្ដាំរថយន្តមួយគ្រឿងនៅខាងមុខបណ្ដាលអោយបុករះម៉ូតូចំនួន២គ្រឿង ដែលហេតុការណ៍នេះបានកើតឡើងកាលពីវេលាម៉ោង៩និង៤០នាទីយប់ថ្ងៃទី១៧ខែឧសភាឆ្នាំ២០១៤ តាមបណ្ដោយមហាវិថីសហព័ន្ធរុស្ស៊ី មុខមន្ទីរពេទ្យកុមារជាតិ ស្ថិតក្នុងសង្កាត់ទឹកល្អក់១ ខណ្ឌទួលគោក។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមានរថយន្តមួយគ្រឿងម៉ាកតូយ៉ូតា ព្រូស ពណ៌ទឹកប្រាក់ ពាក់ស្លាកលេខ ភ្នំពេញ 2U-3940 បើកបរដោយបុរសម្នាក់ក្នុងស្ថានភាពស្រវឹង ធ្វើដំណើរតាមបណ្ដោយមហាវិថីសហព័ន្ធរុស្ស៊ី ក្នុងល្បឿនលឿន ទិសដៅពីលិចទៅកើត ខណៈមកដល់ចំណុចកើតហេតុមុខមន្ទីរពេទ្យកុមារជាតិ រថយន្តបង្កបានព្យាយាមបើកវ៉ាស្ដាំរថយន្តមួយគ្រឿងម៉ាកហុងដាCRV បណ្ដាលអោយបុកម៉ូតូគុបមួយគ្រឿង ពណ៌ទឹកប៊ិចក្រម៉ៅ ពាក់
ស្លាកលេខ ភ្នំពេញ 1J-9717 ជិះធ្វើដំណើរដោយបុរសស្ត្រីចំណាស់២នាក់ បណ្ដាលអោយដួលបោកនិងថ្នល់រងរបួសធ្ងន់ ហើយរថយន្តមិនទាន់អស់ល្បឿនក៏ជ្រុលទៅប៉ះនិងម៉ូតូមួយគ្រឿងទៀតម៉ាកវីវ៉ា ពណ៌ខ្មៅ ពាក់ស្លាកលេខ រដ្ឋ22 1-0030 ជិះធ្វើដំណើរដោយប្ដីប្រពន្ធ២នាក់និងកូនតូចម្នាក់បណ្ដាលអោយដួលរងរបួសស្រាល។ បន្ទាប់ពីកើតហេតុរថយន្តបង្កមិនបានឈប់នៅទទួលខុសត្រូវនោះទេ គឺបានបន្ថែមល្បឿនបើករត់ ខណៈនោះកម្លាំងកងរាជអាវុធហត្ថខណ្ឌទួលគោកកំពុងល្បាត
ប្រទះឃើញរថយន្តបង្ក ក៏បានឃាត់រថយន្តនិងតៃកុងជាប់នៅចំណុចផ្លូវលេខ១២២។ លុះជិតមួយម៉ោងក៏មានបុរស៣នាក់ជិះរថយន្តមួយគ្រឿងបានមកដល់កន្លែងកើតហេតុទាំងស្ថានភាពស្រវឹងបានព្យាយាមចង់រំដោះតៃកុងរថយន្តចេញពីកន្លែងកើតហេតុតែមិនបានសម្រេច ត្រូវបានសមត្ថកិច្ចរារាំង។
ចំណែកជនរងគ្រោះត្រូវបានរថយន្តរបស់មន្ទីរពេទ្យឯកជនដឹកបញ្ជូនទៅសង្គ្រោះនៅមន្ទីរពេទ្យឯកជនភ្លាមៗផងដែរ។ ក្រោយពេលកើតហេតុសមត្ថកិច្ចជំនាញបានចុះធ្វើការវាស់វែងយកម៉ូតូនិងរថយន្តរួមនិងតៃកុងរថយន្តទៅអធិការដ្ឋាននគរបាលខណ្ឌទួលគោកដើម្បីធ្វើការដោះស្រាយតាមផ្លូវច្បាប់៕
