ភ្នំពេញ៖មនុស្សម្នាក់បានស្លាប់ភ្លាមៗនៅនិងកន្លែងកើតហេតុនិង២នាក់ទៀតបានរងរបួសយ៉ាងធ្ងន់ធ្ងរនិងត្រូវបានដឹកបញ្ជូនយកទៅសង្គ្រោះភ្លាមៗនៅឯមន្ទីរពេទ្យបន្ទាប់ពីផ្សារយ៉ាន់កង់រថយន្ដមិនបានបន្ធូរខ្យល់ចេញឲ្យអស់ទើបបណ្ដាលឲ្យផ្ទុះកង់រថយន្ដដោយកម្លាំងចំហាយខ្យល់ជះត្រូវតែម្ដង។
ហេតុការណ៍ខាងលើបានកើតឡើងនៅវេលាម៉ោង០៩និង១០នាទីព្រឹក ថ្ងៃទី២១ ខែមិនា ឆ្នាំ២០១៦ ត្រង់ចំណុចអង្គភាពកងវិស្វកម្មក្រសួងការពារជាតិតាមបណ្ដោយផ្លូវលំ ក្រុមទី២ ភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ។
មន្ត្រីសមត្ថកិច្ចបានឲ្យដឹងថា ជនរងគ្រោះដែលបានស្លាប់បាត់បង់ជីវិតមានឈ្មោះលី ប៊ុនហ៊ាង ភេទប្រុស អាយុ៤៧ឆ្នាំ មានមុខរបរបើកបររថយន្ដ
ចំណែកជនរងដែលបានរងរបួសធ្ងន់ទី១ឈ្មោះភឹម សូ ភេទប្រុស អាយុ៤០ឆ្នាំ មានមុខរបរយោធាអង្គភាពវិស្វកម្ម (ជាង) ទី២ឈ្មោះសេត ឌីណា ភេទប្រុស អាយុ៤៣ឆ្នាំ មាន មុខរបរយោធាអង្គភាពកងវិស្វកម្ម (ជាង) ។
បើតាមមន្ត្រីសមត្ថកិច្ចបានឲ្យដឹងទៀតថាមុនពេលកើតហេតុ ជាងទាំង២នាក់ដែលជាមន្ត្រីយោធាកំពុងផ្សារដែកធ្វើរបាំងចរាចរណ៍ខណៈនោះជនរងគ្រោះជាតៃកុងឡានបានយកកង់មកផ្សារយ៉ាន់ប៉ុន្តែមិនបានបន្ធូរខ្យល់កង់ចេញឲ្យអស់ខណៈកំពុងផ្សារស្រាប់តែផ្ទុះកង់រថយន្ដតែម្ដងដោយកម្លាំងចំហាយខ្យល់បានជះមកលើជាងផ្សារនិងតៃកុងរថយន្ដទាំង៣នាក់នោះខ្ទាតប៉ើង៤ទៅ៥ម៉ែត្រទើបបណ្ដាលឲ្យជាង២នាក់រងរបួសយ៉ាងធ្ងន់ធ្ងរនិងត្រូវបានដឹកយកទៅសង្គ្រោះភ្លាមៗនៅឯមន្ទីរពេទ្យ១,៧៩នៅខាងជើងវត្តភ្នំ រីឯតៃកុងរថយន្ដម្នាក់ទៀតត្រូវបានស្លាប់ភ្លាមៗនៅនិងកន្លែងកើតហេតុ។
ក្រោយកើតហេតុសមត្ថកិច្ចមូលដ្ឋានសហការនិងសមត្ថកិច្ចជុំនាញបច្ចេកទេសកុសល្យវិច្ច័យបានចុះត្រួតពិនិត្យសាកសពដើម្បីចាត់ការតាមនិតិវិធីដោយវាយតម្លៃថាជនរងគ្រោះពិតជាបានស្លាប់និងរងរបួសដោយសារកម្លាំងចំហាយខ្យល់ផ្ទុះកង់រថយន្ដពិតប្រកដមែនដោយឡែកសាកសពជនរងគ្រោះត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ហាស់ កំសាន្ដ
