កំពង់ធំៈ នៅរសៀលថ្ងៃទី៦ ខែមេសា ឆ្នាំ២០១៦ គណៈប្រតិភូមិ យោធាទីក្រុងហូជីមិញ និងប្រតិភូមិយោធា ខេត្តបិញភឿក កងទ័ពប្រជាជនសាធារណៈរដ្ឋសង្គមនិយមវៀតណាម បានអញ្ជើញមកសូរសុខទុក្ខ និងជូនពរឆ្នាំថ្មី២០១៦ ដើម្បីចូលរួមអបអរសាទរ ទទួលទេវតាឆ្នាំថ្មី ក៏ដូចជាការផ្សាភ្ជាប់ និងរឹតបន្តឹងចំណងសាមគ្គីភាពរវាង កងយោធពលយោធាខេត្តបិញភឿក និងប្រតិភូបញ្ជាការដ្ឋានយោធាទីក្រុងហូជីមិញ ។
នៅក្នុងឳកាសនៃពិធីសំណេះសំណាល លោកឡេ ហុកង៉ាយ អនុប្រធានគណបក្សទីក្រុងហូជីមិញ បានកោតសរសើរនិងវាយតំលៃខ្ពស់នូវការខិតខំប្រឹងប្រែងរបស់ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ដែលបានយកចិត្តទុកដាក់ ក្នុងការទំនាក់ទំនងចំណងមិត្តភាព រវាងកងទ័ពទាំងពីរ និងប្រជាជនទាំងពីរប្រទេស ឲ្យកាន់តែទទួលបាននូវភាពជោគជ័យរួមគ្នា ក្នុងនោះដែរ លោកឡេ ហុកង៉ាយ និងបានសន្យាថា និងផ្តល់ជំនួយឧបត្ថម្ភគាំទ្របន្ថែមទៀត ដើម្បីកសាងបន្ទាយ និងផ្តល់នូវសម្ភារៈសម្រាប់ការងារយោធាបន្ថែម ហើយនិងពាំនាំសំណើរជូនដល់ថ្នាក់ដឹកនាំបន្តទៀត ក្នុងនោះដែរលោកបានបញ្ជាក់ថា ដើម្បីបង្កើននូវភាពជិតស្និទ្ធរវាងយោធាទាំងពីរ គឺចាំបាច់ត្រូវចុះអនុសារណៈយោគយល់គ្នា ក្នុងមួយឆ្នាំម្តងជារៀងរាល់ឆ្នាំ ។
ឯកឧត្តម សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានអគុណចំពោះប្រតិភូយោធាខេត្តបិញ ភឿក និងប្រតិភូយោធាទីក្រុងហូជីមិញ ដែលបានអញ្ជើញមកសួរសុខទុក្ខ និងជូនពរក្នុងឳកាសបុណ្យចូលឆ្នាំថ្មី ដល់ថ្នាក់ដឹកនាំនៃតំបន់ប្រតិបត្តិការសឹករងកំពង់ធំ និងបានធ្វើឲ្យមានថ្នាក់ដឹកនាំ និងនាយទាហាន ពលទាហាន បានទទួលនូវភាពកក់ក្តៅ នៅក្នុងឳកាសនោះផងដែរឯកឧត្តម សោម ស៊ុន បានសំណូមពរឲ្យ បញ្ជាការដ្ឋានជួយលើវិស័យកងទ័ព និងកិច្ចការកងសាងបន្ទាយបន្ថែម ក្នុងនោះដែរគណៈប្រតិភូមិបាន អញ្ជើញទស្សនាអាគារដែលកំពុងតែសាងសង់បាន៨០ភាគរយ និងជាជំនួយរបស់បញ្ជាការដ្ឋានយោធា ទីក្រុងហូជីមិញផងដែរ។
ដោយ ប៊ុន រដ្ឋា
