កំពង់ធំៈ ឯកឧត្តម នាយឧត្តមសេនីយ៍ គន់ គីម អនុប្រធានគណៈកម្មធិការកណ្តាល និងជាអគ្គលេខាធិការ សមាគមអតីតយុទ្ធជនកម្ពុជា បានមានប្រសាសន៍ អតីតយុទ្ធជនត្រូវបានចាត់ទុកជាមរតកសន្តិភាព ដោយសារតែក្រុមគ្រួសាររបស់អតីតយុទ្ធជន ជាអ្នកតស៊ូវាយរំដោះពុះពារគ្រប់ឧបស័គ្គតស៊ូជាមួយសត្រូវ ដណ្តើមយកជ័យជំនះដណ្តើមយកសន្តិភាពមកជូនដល់ប្រទេសជាតិរហូតសព្វថ្ងៃ បើគ្មានអតីយុទ្ធជនគឺគ្មានថ្ងៃនេះ ដូច្នេះអតីតយុទ្ធជនឬក្រុមគ្រួសារដ៏អតីតយុទ្ធជនមានសារះសំខាន់បំផុត អាជ្ញាធរកងកម្លាំងប្រដាប់អាវុធត្រួវតែមើលថែទាំងក្រុមគ្រួសារ និងបង្កើនភាពស្និទ្ធស្នាលពិសេសជាងប្រជាជនឯទៀត ទាំងការរស់នៅ ទាំងជីវភាព ទាំងសុវត្តិភាព និងសុខភាព ។
ក្នុងឳកាសនៃពិធីសំណេះសំណាលជាមួយអតីតយុទ្ធជនកម្ពុជា ដែលត្រូវបានចាត់ធ្វើឡើងនៅក្នុងគេហដ្ឋាន ឯកឧត្តមបណ្ឌិត ថោង ឃុន រដ្ឋមន្ត្រីក្រសួងទេសចរណ៍ នៅព្រឹកថ្ងៃទី ៥ ខែសីហា ឆ្នាំ ២០១៦នៅស្រុកបារាយណ៍នេះឯកឧត្តម នាយឧត្តមសេនីយ៍ គន់ គីម បានសន្យានិ ងបង្កើតឲ្យមានភូមិអតីតយុទ្ធជនកម្ពុជា នៅក្នុងខេត្តកំពង់ធំ សម្រាប់ការដោះស្រាយបញ្ហាដែលអតីតយុទ្ធជន មានការខ្វះខាត ដីធ្លី និងផ្ទះសំបែង ដែលជាការយកចិត្តទុកដាក់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងារថ្នាក់ជាតិ ចុះជួយខេត្តកំពង់ធំ បានមានប្រសាសន៍ បងប្អូនអតីតយុទ្ធជនចាត់ទុកជា គំរូដ៏ល្អមួយ ក្នុងការស្វែងរកសន្តិភាព និងការកសាង អភិវឌ្ឍន៍ប្រទេសជាតិ ក្រោមការដឹកនាំរបស់រាជរដ្ឋាភិបាលយើង ដែលមានសម្តេចតេជោ ហ៊ុន សែន ជាប្រមុខ ដែលមានពិលីកម្មដ៏ធំធេងរបស់បងប្អូនទាំងអស់គ្នា បញ្ហាសន្តិភាពជាតិគឺជាបញ្ហាធំណាស់ និងត្រូវការពារឲ្យបាន ដោយការរួមចំណែករបស់បងប្អូន ដែលជាអតីតយុទ្ធជនដើម្បីបន្តការពារសន្តិភាព មានតែសន្តិភាពទេដែលអាចជួយឲ្យមានភាពរីកចម្រើនបាន ហើយត្រូវប្តេជ្ញាថាមិនវិលត្រឡប់ទៅរកសង្គ្រាមវិញទេ ព្រោះសង្គ្រាមមិនបានធ្វើឲ្យអ្នកណាចំណេញទេ អ្នកខាតគឺប្រជាពលរដ្ឋ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានថ្លែងអំណរគុណសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹត្តបណ្ឌិត ដែលបានគិតគូរពីជីវភាពអតីតយុទ្ធជន និងសូមឲ្យទទួលនូវភាពជោគជ័យ ក្នុងអណត្តិបោះឆ្នោតជ្រើសរើសក្រុមប្រឹក្សា ឃុំ សង្កាត់ឆ្នាំ ២០១៧ និងការបោះឆ្នោតសកលឆ្នាំ ២០១៨ ខាងមុខនេះ ពិធីនេះដែរត្រូវបានចូលរួម ពីឯកឧត្តម អ៊ុត សំអន អភិបាលខេត្តកំពង់ធំ និងប្រជាពលរដ្ឋ៦១១នាក់ ដែលជាអតីតយុទ្ធជនស្រុកសន្ទុក និងស្រុកបារាយណ៍ ក្នុងឳកាសនោះឯកឧត្តម នាយឧត្តមសេនីយ៍ គន់ គីម បានជូនថវិការដល់អតីតយុទ្ធជន ទាំង៦១១នាក់ ក្នុងម្នាក់ទទួលបាន ៥ម៉ឺនរៀល ។
ដោយ ប៊ុន រដ្ឋា
