យោងតាមសារព័ត៌មានក្នុងប្រទេសអ៊ីតាលីបានរាយការណ៍ថា ក្លិប AC Milan កំពុងតែសម្លឹងឆ្ពោះទៅរក ការចុះហត្ថលេខាទិញយកខ្សែប្រយុទ្ធ Adel Taarabt របស់ក្លិប QPR ផ្តាច់តែម្តង ។
Taarabt ធ្លាប់បានលើកឡើងពីការចង់វិលមកលេងនៅអង់គ្លេសវិញបន្ទាប់ពីក្លិបយក្សអ៊ីតាលីមួយនេះមិនបានព្រមព្រៀងលក្ខ័ណ្ឌជាមួយរូបគេកាលពីចុងខែ ។
ប៉ុន្តែទោះបីជាយ៉ាងណាក៏ដោយ ឥឡូវនេះមានសេចក្តីរាយការណ៍បានលើកឡើងថា តំណាងរបស់ Taarabt គឺលោក Kia Joorabchian កំពុងតែពិភាក្សាជាមួយលោក Adriano Galliani ដែលជានាយកប្រតិបត្តិរបស់ក្លិប AC Milan ហើយកិច្ចព្រមព្រៀងជាមួយកីឡាករសញ្ជាតិម៉ារ៉ុកវ័យ២៥ឆ្នាំរូបនេះអាចនឹងត្រូវបានធ្វើឡើង ។
គួរបញ្ជាក់ថា អ្នកចាត់ការក្លិប QPR លោក Harry Redknapp កំពុងមានក្តីសង្ឃឹមថា រូបគាត់អាចនឹងទិញ កីឡាករថ្មីៗមួយចំនួនមកពង្រឹងក្រុមនៅរដូវក្តៅនេះហើយនឹងមិនទំនងជាទទួលយកកីឡាករ Taarabt មកកាន់ទឹកដី Loftus Road វិញនោះទេ ៕
