សៀមរាប៖ ប្រជាពលរដ្ឋមកពីស្រុកបន្ទាយស្រី ឃុំត្បែង និងភូមិរលំទូកនៃស្រុកស្វាយលើ បាននាំគ្នាស្នាក់នៅមុខតុលាការខេត្តសៀមរាប ដោយមានទាំងស្បៀងអាហារ ព្រមទាំងចង្រ្កាន ចាន ឆ្នាំងមកជាមួយផង។
ពួកគេមានគំរោងស្នាក់នៅជាច្រើនថ្ងៃ ដើម្បីតវ៉ាឱ្យតុលាការដោះលែង តំណាងសហគមន៍ដីធ្លី តំបន់ចំបក៣ដើម ឈ្មោះលោក ចាន់ រិទ្ធ ដែលតុលាការបានសំរេចឃុំខ្លួន នៅក្នុងពន្ធនាគារជាបណ្ដោះអាសន្ន រយៈពេល៤ថ្ងៃមកហើយនោះ។
ភរិយា របស់តំណាងសហគមន៍ទំនាស់ដីធ្លី ចំបក់៣ដើម គឺអ្នកស្រី ឃី ភារម្យ។អ្នកស្រីមានប្រសាសន៍ ក្រោយពីចូលជួបតំណាងអយ្យការនៃសំណុំរឿងក្តី នៅព្រឹកថ្ងៃច័ន្ទទី២៣ខែមករាថាតុលាការបានចោទប្រកាន់ប្ដី របស់អ្នកស្រី ពីបទឆរបោក ក្នុងរឿងលក់ដីធ្លី ទៅឱ្យឈ្មួញ។ អ្នកស្រីបានបដិសេធ ចំពោះរឿងនេះ ហើយថាប្ដី របស់គាត់ មិនដែលឆរបោក នរណាម្នាក់ ក្នុងរឿងលក់ដីធ្លី ដូចការចោទប្រកាន់នោះទេ។
អ្នកស្រី ឃី ភារម្យ យល់ថាការចាប់ខ្លួនប្ដី របស់គាត់នេះ អាចជាការគំរាមកំហែងទៅក្រុមអ្នកតវ៉ាដីធ្លី ហើយអ្នកស្រី ទាមទារឱ្យតុលាការ ត្រូវតែដោះលែង មកវិញ។
ចំណែក អ្នកនាំពាក្យសាលាដំបូង ខេត្តសៀមរាប លោក យិន ស្រាង ឱ្យដឹងថាករណីចាប់ខ្លួនតំណាងសហគមន៍ទំនាស់ដីធ្លី ចំបក់៣ដើម នៅស្រុកបន្ទាយស្រីនោះ គឺជារឿងឆរបោកលុយ ពីអ្នកទិញដី សុទ្ធសាធ មិនមែនជារឿងពាក់ព័ន្ធនិងការតវ៉ារឿងដីធ្លីទេ។ លោកយិន ស្រាង បញ្ជាក់ថា តំណាងសហគមន៍ចំបក់៣ដើម លោកចាន់ រិទ្ធ មានជាប់ពាក់ព័ន្ធនឹងការឆរបាកលុយ ពីអ្នកទិញដីម្នាក់ ដែលលោកសុំមិនប្រាប់ឈ្មោះ ចំនួនជាង២ម៉ឺនដុល្លារអាមេរិក ប៉ុន្តែគ្មានដីឱ្យគេ។
អ្នកស៊ើបអង្កេត របស់អង្គការសិទ្ធិមនុស្ស លីកាដូ(LICADHO)ខេត្តសៀមរាប លោក ចៅ ល័ក្ខវណ្ណា ដែលតាមស្រាវជ្រាវករណីនេះ រកឃើញថាថ្វីត្បិតតែ លោក ចាន់ រិទ្ធ ជាតំណាងសហគមន៍ទំនាស់ដីធ្លីមែន ប៉ុន្តែករណីចាប់ខ្លួន គឺស្ថិតនៅលើរឿងផ្ទាល់ខ្លួន ច្រើនជាងរឿងតវ៉ា សម្រាប់ប្រយោជន៍សហគមន៍។ លោក ចៅ ល័ក្ខវណ្ណា បញ្ជាក់ថាអង្គការរបស់លោក កំពុងសិក្សានឹងស្រាវជ្រាវ ឱ្យស៊ីជម្រៅក្នុងរឿងនេះ ដើម្បីពិចារណាទៅលើ បញ្ហាដែលថាតើគួរផ្ដល់មេធាវី ការពារឬក៏មិនផ្ដល់។
ទីបញ្ជាការដ្ឋាន កងរាជអាវុធហត្ថ ខេត្តសៀមរាប ធ្លាប់បានអញ្ជើញ តំណាងសហគមន៍ទំនាស់ដីធ្លី លោក ចាន់ រិទ្ធិ ឱ្យចូលខ្លួនទៅដោះស្រាយ នៅថ្ងៃទី៥ខែកញ្ញា ប៉ុន្តែត្រូវបានលោកបដិសេធ ហើយកាលពីវេលាម៉ោង៣ទៀបភ្លឺថ្ងៃទី៤ខែកញ្ញា ពេលដែលលោកកំពុងដេកលក់ នៅក្នុងផ្ទះ ស្រាប់តែមានរឿងជនប្រដាប់អាវុធ១ក្រុម ទៅលួចបាញ់ប៉ងធ្វើឃាត បណ្ដាលឱ្យលោក ចាន់ រិទ្ធ រត់ចោលផ្ទះ តាំងតែពីពេលនោះ មក ៕
