អួង វឹង.
ខេត្តកំពត. នៅរសៀលថ្ងៃទី ០៣ខែកុម្ភៈឆ្នាំ ២០១៧ ឯ.ឧ បណ្ឌិត ណៅ-ធួករដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងឯ.ឧរដ្ឋមន្ត្រី វេង-សាខុនបាននាំយកនូវ អំណោយសម្ភារៈស័ង្កសីចំនួន១០០០សន្លឹក និងឧបករណ៍ត្រីវិស័យ GPS ចំនួន៤គ្រឿងដើម្បី ប្រគល់ជូនដល់អង្គភាពកងទ័ពវរៈសេនាតូចលេខ៣០២ការពារព្រំដែនចំណុះ
តំបន់សឹករងកំពត ដែលពិធីប្រគល់និងទទួលបានធ្វើឡើងនៅឯទីបញ្ជាការដ្ឋានវរៈស្ថិតនៅក្នុងស្រុកកំពង់ត្រាចខេត្តកំពត។
មានប្រសាសន៍ សំណេះសំណាល ឯ.ឧបណ្ឌិត ណៅ-ធួក ក្នុងនាមតំណាង ឯ.ឧ វែង-សាខុន រដ្ឋមន្ត្រីក្រសួង កសិកម្មរុក្ខាប្រមាញ់និងនេសាទបានពាំនាំនូវការផ្ដាំផ្ញើសួរសុខទុក្ខដោយការនឹករលឹកចំពោះកងទ័ពក្នុងអង្គភាពទាំងអស់។ 
ដែលជានិច្ចកាលទាំងថ្នាក់ដឹកនាំក៏ដូចមន្រ្តីរាជការក្រោមឱវាទក្រសួង តែងតែមានការផ្សារភ្ជាប់នូវមនោសញ្ចេតនានិងចូលរួមចំណែកចែករំលែកជួយឧបត្ថម្ភផ្គត់ផ្គង់ទាំង សម្ភារៈ ថវិកាគ្រឿងឧបភោគបរិភោគនិងការកសាងអង្គភាពជាដើម បន្ទាប់ពីបាន ចុះសម្ព័ន្ធមេត្រីភាពជាមួយអង្គភាពទ័ពវរៈសេនាតូចលេខ៣០២ការពារព្រំដែននារយៈពេលកន្លងមកជាបន្តបន្ទាប់។ 
ជាក់ស្តែងអំណោយស័ង្កសីដែលបានាំយកមកប្រគល់ជូននាពេលនេះ គឺជាការឆ្លើយតបតំរូវការ ក្នុងការរួមចំណែក កសាងអង្គភាពដើម្បីអោយមានលក្ខណៈកាន់តែល្អសមរម្យប្រសើរឡើងសម្រាប់អង្គភាពកងទ័ពបម្រើការងារជាចាំបាច់បន្ថែមទៀតផងដែរ។
តមក ឯ.ឧបណ្ឌិតណៅ-ធួក និងលោកចាន់-រិទ្ធ ប្រធានមន្ទីរកសិកម្មរុក្ខាប្រមាញ់និងនេសាទខេត្តកំពត ក៏បានបន្តទៅចូលរួម ធ្វើការព្រលែងសត្វអណ្ដើកសមុទ្រ ចំនួន២ក្បាល់ នៅតំបន់សហគមន៍បឹងទូកក្នុងស្រុកទឹកឈូ។ ដែលអណ្ដើក២ក្បាលនេះ១ក្បាលមានទម្ងន់១២០គីឡូនិង១ក្បាលទៀតមានទម្ងន់១១០គីឡូដោយបានមកពីក្រុមអធិការកិច្ចនៃខណ្ឌរដ្ឋបាលជលផលកំពតចេញល្បាតនិងធ្វើការដកហូតពីប្រជានេសាទដោយឧបករណ៍នេសាទ អួនអូស នៅឃុំឫស្សីស្រុកខាងលិចស្រុកកំពង់ត្រាចខេត្តកំពត។
ឯ.ឧណៅ-ធួក ក៏បានកោតសរសើរចំពោះប្រជានេសាទក៏ដូចសមត្ថកិច្ចជលផលនិងក៏បានផ្ដាំផ្ញើឲ្យបន្តយកចិត្តទុកដាក់បន្ថែមទៀតដើម្បីថែរក្សា និងអភិរក្សធនធានសមុទ្រដ៏កម្រនេះសម្រាប់មនុស្សជំនាន់ក្រោយៗបានស្គាល់បានឃើញផងដែរ។
សូមជំរាបថា៖ តាមការបញ្ជាក់ឲ្យដឹងពីមន្រ្តីជំនាញសត្វអណ្ដើក ២ក្បាលនេះអាចមានអាយុចន្លោះពី៥០ទៅ៦០ឆ្នាំហើយ និងអាចមានអាយុរស់នៅបានវែងចន្លោះចាប់ពី១០០ឆ្នាំឡើងព្រមទាំងការបន្តពូជមានអាយុចន្លោះចាប់ពី១៨ទៅ២០ឆ្នាំទើបមានការបន្តពូជបាន។
